স্মাৰ্ট ইণ্ডিয়া হেকাথন ২০১৯ ভাৰতৰ প্ৰযুক্তিবিদ্যাৰ ইতিহাসত এটা অভিনৱ সংযোজন। প্ৰধান মন্ত্ৰী নৰেন্দ্ৰ মোদীৰ ‘স্মাৰ্ট ইণ্ডিয়া’, ডিজিটেল ইণ্ডিয়া গঢ়াৰ স্বপ্ন বাস্তৱয়িত কৰাৰ অৰ্থে ভাৰতৰ উচ্চ শিক্ষা প্ৰতিষ্ঠানৰ শিক্ষাৰ্থীসকলৰ দ্বাৰা জনসাধাৰণৰ বিভিন্ন সমস্যা আৰু তাৰ সমাধানৰ উদ্দেশ্যে আয়োজন কৰা হৈছে এই ‘স্মাৰ্ট ইণ্ডিয়া হেকাথন’।
বিগত দুই বছৰৰ দৰে এইবাৰো ভাৰতৰ কেন্দ্ৰীয় চৰকাৰৰ ১৮ টা মন্ত্ৰালয় আৰু ৯৫ টা উদ্যোগে স্মাৰ্ট ইণ্ডিয়া হেকাথনত অংশ গ্ৰহণ কৰিছে। প্ৰায় ১৩৪৮ সংখ্যক ছাত্ৰ-ছাত্ৰীৰ দলে ৫৩০টা সমস্যা সমাধানৰ অৰ্থে অৰ্ধশতাধিক ন’ডেল কেন্দ্ৰত কডিং কৰিব।
এই উদ্দেশ্যে ২ মাৰ্চত পুৱা ৮ বজাত সমান্তৰালভাৱে প্ৰত্যেকটো ন’ডেল চেণ্টাৰত বিশেষ ভিডিঅ’ কনফাৰেন্সৰ জৰিয়তে মানৱ সম্পদ উন্নয়ন মন্ত্ৰালয়ৰ মন্ত্ৰী প্ৰকাশ জাজেদকাৰে হেকাথনৰ উদ্বোধনী ভাষণ আগবঢ়াব।
উল্লেখযোগ্য যে যোৱা দুবছৰৰ সফল পৰিসমাপ্তিৰ পিছত এইবাৰো গিৰিজানন্দ চৌধুৰী ইনষ্টিটিউট অব মেনেজমেণ্ট এণ্ড টেকনলজিক উত্তৰ-পূব ভাৰতৰ একমাত্ৰ ন’ডেল কেন্দ্ৰ হিচাপে নিৰ্বাচিত কৰিছে। বস্ত্ৰ মন্ত্ৰালয়, সুক্ষ্ম, লঘূ আৰু মধ্যম উদ্যম মন্ত্ৰালয়, পৰিসংখ্যা আৰু পি আই মন্ত্ৰালয়ৰ দ্বাৰা নিৰ্বাচিত, সাতটা সমস্যাৰ ওপৰত দুই শতাধিক প্ৰতিযোগীয়ে কডিং কৰি সমস্যাসমূহৰ সমাধান উলিয়াব।
অহা ২ আৰু ৩ মাৰ্চত ৩৬ ঘণ্টা ধৰি বিৰামহীনভাৱে চলিব লগা এই প্ৰতিযোগিতাসমূহ ভাৰতৰ বিভিন্ন ন’ডেল কেন্দ্ৰৰ লগতে গিৰিজানন্দ চৌধুৰী ইনষ্টিটিউট অব মেনেজমেণ্ট এণ্ড টেকনলজিটো সমান্তৰালভাৱে অনুষ্ঠিত হ’ব। শ্ৰেষ্ঠ তিনিটা প্ৰতিযোগীদলক লক্ষাধিক টকাৰে পুৰস্কৃত কৰা হ’ব।
মন কৰিবলগীয়া যে স্মাৰ্ট ইণ্ডিয়া হেকাথনৰ ফাইনেলত অসমৰ পৰা সৰ্বমুঠ এটা দল নিৰ্বাচিত হৈছে। তাৰে ভিতৰত আজাৰাস্থিত জি আই এম চিৰ এটা দলে কেৰেলাস্থিত ন’ডেল কেন্দ্ৰত অংশ গ্ৰহণ কৰিব। ব্যক্তিগত খণ্ডৰ শিক্ষানুষ্ঠান হিচাপে সৰ্বভাৰতীয় পৰ্য্যায়ৰ এনে এখন প্ৰতিযোগিতা অনুষ্ঠিত কৰিবলৈ পোৱাটো প্ৰতিষ্ঠানটিৰ বাবেই নহয়, সমগ্ৰ উত্তৰ-পূৰ্বাঞ্চলৰ বাবে অতি গৌৰৱৰ বিষয়।