মাহামাৰী কোভিড১৯ৰ সংক্ৰমণ প্ৰতিৰোধৰ বাবে সম্প্ৰতি সমগ্ৰ দেশতে ল’কডাউন বলৱৎ হৈ আছে।
ল’কডাউনে দেশৰ অৰ্থনীতিৰ, শিক্ষা আদি বিভিন্ন ক্ষেত্ৰলৈ সংকট নমাই আনিছে।
তেনে এক সন্ধিক্ষণতে কোভিড১৯ কেন্দ্ৰিক ল’কডাউনৰ পৰৱৰ্তী সময়ত কাৰিকৰী শিক্ষাৰ ক্ষেত্ৰত কেনে প্ৰভাৱ পেলাব সেই সম্পৰ্কতে ৰাজ্যৰ অন্যতম কাৰিকৰী শিক্ষানুষ্ঠান গুৱাহাটীস্থিত গিৰিজানন্দ চৌধুৰী ইনষ্টিটিউট অৱ মেনেজমেণ্ট এণ্ড টেকনলজি( GIMT)য়ে এখন ৱেবিনাৰ আয়োজন কৰিছে।
ৱেবিনাৰখন অনুষ্ঠিত হ’ব অহা ১৩ মে’ বুধবাৰে দিনৰ ১১ বজাৰ পৰা ১২.৩০ বজালৈ।
GIMTৰ ৱেবিনাৰ বিষয় হৈছে “কোভিড১৯ কেন্দ্ৰিক ল’কডাউনৰ পৰৱৰ্তী কাৰিকৰী শিক্ষা; প্ৰত্যাহ্বান আৰু সুযোগসমূহ।”
উক্ত কাৰ্যসূচীত কোভিড১৯ কেন্দ্ৰিক ল’কডাউনৰ পৰৱৰ্তী সময়ৰ কাৰিকৰী শিক্ষা ক্ষেত্ৰখনৰ অন্তৰ্গত পাঠদান-শিক্ষণ প্ৰক্ৰিয়াৰ পূৰ্ণনিৰ্মাণ, পৰীক্ষা, কেম্পাছ নিয়োগ, ইন্টাৰ্নশ্বিপ, চাকৰি ক্ষেত্ৰখনৰ পৰিস্থিতি আদি সম্পৰ্কীয় বিভিন্ন প্ৰত্যাহ্বানৰ লগতে সুযোগসমূহ সন্ধান কৰাৰ প্ৰয়াস কৰা হ’ব।
GIMTৰ অধ্যক্ষ থুলেশ্বৰ নাথ, অসম বিজ্ঞান আৰু প্ৰযুক্তিবিদ্যা বিশ্বিবিদ্যালয়( ASTU)ৰ পঞ্জীয়ক ড০ নৃপেন দাস, অসম অভিযান্ত্ৰিক মহাবিদ্যালয়ৰ অধ্যাপক সুদীপ কুমাৰ দেৱ, অধ্যাপক ড০ অমৃতা গাঙ্গুলী আৰু যোৰহাট অভিযান্ত্ৰিক মহাবিদ্যালয়ৰ অধ্যাপক আদিত্য কন্দলীয়ে উক্ত অনুষ্ঠান বিষয়বস্তুৰ ওপৰত বক্তব্য প্ৰদান কৰাৰ লগতে অংশগ্ৰহণকাৰীসকলৰ প্ৰশ্নৰ উত্তৰ দিব।
আগ্ৰহীসকলে ৱেচাইট www.gimt-guwahati.ac.inত গৈ পঞ্জীয়ন কৰি ৱেবিনাৰত অংশগ্ৰহণ কৰিব পাৰিব।
অধিক তথ্যৰ বাবে সমন্বয়ৰক্ষী বিপুল কে তালুকদাৰ (7002474526), ডাঃ দেৱদীপ সাহা (6000702332) আৰু ডাঃ সন্দীপ বৰদলৈৰ (9864504431) সৈতে যোগাযোগ কৰিব পাৰিব।