অতি জঘন্য আৰু পাশৱিকতাৰে শাৰীৰিক আৰু যৌন অত্যাচাৰ কৰা হৈছে এগৰাকী যুৱতীক।
উত্তৰ পূৱৰ বুলি ধাৰণা কৰা এগৰাকী যুৱতীক এটা বন্ধ কোঠাত আৱদ্ধ কৰি এগৰাকী মহিলাসহ পাঁচজন লোকে অতি বৰ্বৰভাৱে শাৰীৰিক অত্যাচাৰ কৰা এক ভিডিঅ ভাইৰেল হৈ পৰিছে সামাজিক মাধ্যমত।
যুৱতীগৰাকীক দলৱদ্ধভাৱে প্ৰহাৰ কৰাৰ লগতে সম্পূৰ্ণৰূপে উলংগ কৰি গুপ্তাংগত বটল আৰু ভৰিৰ বুঢ়া আঙুলি প্ৰৱেশ কৰাৰ উপৰিও ভৰিৰে গুৰিয়াই বৰ্বৰভাৱে আক্ৰমণ কৰা হৈছে। সন্দেহ কৰা হৈছে এইদৰে আক্ৰমণ কৰাৰ পিছত যুৱতীগৰাকীক দলৱদ্ধ ধৰ্ষণ কৰাও হৈছে।
এই নাৰকীয় তথা বৰ্বৰ ঘটনাটোৰ ভিডিঅ’টো ভাইৰেল হোৱাৰ লগে লগে দেশজুৰি তীব্ৰ চাঞ্চল্যৰ সৃষ্টি হোৱাৰ লগতে সামাজিক মাধ্যমত অসংখ্য লোকে ঘটনাটোৰ নিন্দা কৰি সংশ্লিষ্ট কৰ্তৃপক্ষৰ প্ৰতি আক্ৰমণকাৰীৰ বিৰুদ্ধে কঠোৰতম শাস্তি প্ৰদানৰ দাবী উত্থাপন কৰিছে।
কঠোৰ ব্যৱস্থা লোৱাৰ দাবী উত্থাপন হ’লেও ঘটনাটোৰ প্ৰকৃত উৎস আৰু আক্ৰমণকাৰীসকলক চিনাক্ত কৰিবলৈ সক্ষম হোৱা নাই আৰক্ষী প্ৰশাসন।
প্ৰথমাৱস্থাত ভিডিঅ’টো ৰাজস্থানৰ যোধপুৰৰ বুলি ভবা হৈছিল যদিও কেন্দ্ৰীয় মন্ত্ৰী কীৰেন ৰিজিজু আৰু যোধপুৰৰ আৰক্ষীয়ে ঘটনাটো যোধপুৰৰ নহয় বুলি স্পষ্ট কৰি দিছে।
উল্লেখ্য যে কিছুদিন পূৰ্বে যোধপুৰত ধৰ্ষণৰ বলি হোৱা ল’ভিকলি চুমি নামৰ এগৰাকী নগা যুৱতীয়ে আত্মহত্যা কৰিছিল।
ভিডিঅ’টো ভাইৰেল হোৱাৰ পিছতে নাগালেণ্ড এক্সপ্ৰেছ নামৰ সংবাদ প্ৰতিষ্ঠানটোৱে উক্ত ঘটনাটো নাগালেণ্ডৰ উক্ত যুৱতীগৰাকী নহয় বুলি প্ৰকাশ কৰিছে।
ইফালে দিল্লী আৰক্ষীৰ বিশেষ আয়ুক্ত ৰবীন হিবুৱে কয় যে কালপ্ৰিটসকলৰ লগতে নিৰ্যাতিতাক চিনাক্ত কৰিবলৈ দিল্লী আৰক্ষীয়ে ভিডিঅ’টো পৰীক্ষা কৰি তদন্ত আৰম্ভ কৰিছে।
“আমি দোষীসকলক চিনাক্ত কৰিবলৈ চেষ্টা কৰি আছো।” দিল্লীৰ বিশেষ আৰক্ষী আয়ুক্ত ৰবীন হিবুৱে কয়।
“পৰৱৰ্তী ব্যৱস্থা ল’বলৈ আমি যুৱতীগৰাকীৰো পৰিচয় উদ্ধাৰৰ চেষ্টা কৰি আছো। ভিডিঅ’টো যোধপুৰত আত্মহত্যা কৰা নগা যুৱতী ল’ভিকালি চুমিৰ নহয়। আত্মহত্যা কৰা যুৱতীগৰাকীৰ ভগ্নী আৰু আৰক্ষীয়ে ভিডিঅ’টো পৰীক্ষা কৰি সেয়া নিশ্চিত কৰিছে। মই ব্যক্তিগতভাৱে যোধপুৰৰ ডিচিপৰ সৈতেও কথা পতিছিলো।” ৰবীন হিবুৱে সংবাদ মাধ্যমৰ আগত কয়।
ইফালে কেন্দ্ৰীয় মন্ত্ৰী কীৰেন ৰিজিজুৱে সামাজিক মাধ্যমত কয়, “এগৰাকী মহিলা আৰু চাৰিগৰাকী লোকে বৰ্বৰতাৰে ধৰ্ষণ আৰু অত্যাচাৰ কৰা উত্তৰ পূৰ্ৱৰ এই যুৱতীগৰাকী যোধপুৰৰ ঘটনাটোৰ নহয়। মই যোধপুৰ ঘটনাৰ সন্দৰ্ভত যোধপুৰৰ আৰক্ষী আয়ুক্তৰ সৈতে বিশদভাৱে কথা পাতিছিলো। অৱশ্যে দোষীসকলক কৰায়ত্ত কৰিবলৈ সকলো ৰাজ্যৰ আৰক্ষীয়ে চেষ্টা চলাব লাগিব।”
ভিডিঅ’টো ভাইৰেল হোৱাৰ পিছতে অসম আৰক্ষীয়েও আক্ৰমণকাৰীসকলৰ ফ’টো আপলোড কৰি কৰায়ত্ত কৰাৰ ক্ষেত্ৰত চ’ছিয়েল মিডিয়াৰ যোগে জনসাধাৰণ সহযোগিতা বিচাৰিছে।
“এই অপৰাধ আৰু অপৰাধীসকলৰ সম্পৰ্কীয় যিকোনো তথ্য লাভ কৰা সকলো ব্যক্তিয়ে অনুগ্ৰহ কৰি আমাৰ সৈতে যোগাযোগ কৰিব পাৰে। তেওঁলোকক আকৰ্ষণীয় পুৰস্কাৰ দিয়া হ’ব।” অসম আৰক্ষীয়ে অফিচিয়েল টুইটাৰত কয়।
“ঘটনাটো ক’ত সংঘটিত হৈছে আমি স্পষ্ট নহয়, অসমত সংঘটিত নহ’বও পাৰে। আমি অতি সক্ৰিয়তাৰে অপৰাধীসকলক বিচাৰি উলিয়াবলৈ আগবাঢ়িছো।” আসম আৰক্ষীয়ে লগতে আৰু কয়।