চাপৰতো ঘটিছে এক চাঞ্চল্য সৃষ্টিকাৰী ঘটনা। নিশা প্ৰায় ৮:৩০ বজাত চাপৰ আৰক্ষী থানাৰ নিচেই কাষতে ১৭ নং ৰাষ্ট্ৰীয় ঘাইপথত ঘটে এক ভয়ংকৰ অপহৰণ কাণ্ড।
মাক-দেউতাকৰ লগত চাপৰৰ নলডোবা গাঁওৰ প্ৰায় ১৬ বছৰীয়া কিশোৰী এগৰাকীয়ে ৰাজপথেৰে খোজকাঢ়ি গৈ থকা অৱস্থাতে পাঁচজনীয়া যুৱকৰ দল এটাই চিনেমাৰ কায়দাৰে এ এছ ১৭/ কে ৬৬৭৪ নম্বৰৰ চাৰিচকীয়া বাহনেৰে কিশোৰী গৰাকীক অপহৰণ কৰি লৈ যায় ।
লগে লগে অঞ্চলটোত তীব্ৰ হুৱা-দুৱাৰ সৃষ্টি হয়। ঘটনাটো সংঘটিত কৰিয়ে গাড়ীখন তীব্ৰ বেগেৰে শালকোচাৰ ফালে গতি কৰে।স্থানীয় যুবকৰ ৪/৫ জনীয়া দল এটাই মটৰ চাইকেলেৰ গাড়ীখনক পিছে পিছে খেদি যায়। চাপৰ থানাৰ ভাৰপ্ৰাপ্ত বিষয়া ৰঞ্জিত কাকতিয়ে ঘটনা সম্পৰ্কে জানিব পাৰি তাৎক্ষণিকভাৱে শালকোচা আৰক্ষী চকীৰ ভাৰপ্ৰাপ্ত বিষয়াক ফোনযোগে গাড়ীখন কৰায়ত্ব কৰিবলৈ নিৰ্দেশ দিয়ে।
শালকোচা আৰক্ষীয়ে তৎপৰতাৰে অপহৃত কিশোৰীগৰাকীক উদ্ধাৰ কৰাৰ লগতে পাঁচটা অপহৰণকাৰী ক্ৰমে ৱাছিম খান, ৰাহুল ইছলাম, আব্দুল মজিদ ,খাইৰুল হক আৰু মোশ্বাৰফ হুছেইনক কৰায়ত্ব কৰি চাপৰ থানালৈ আনে। অপহৰণকাৰী কেউজনৰে ঘৰ গৌৰীপুৰত বুলি জানিব পৰা গৈছে।
ঘটনা সংক্ৰান্তত চাপৰ আৰক্ষীয়ে তদন্ত আৰম্ভ কৰিছে ।
উল্লেখযোগ্য যে কিশোৰীগৰাকীয়ে মোবাইল ফোন যোগে ধৃত মোশ্বাৰফ হুছেইনৰ লগত চিনাকি হৈছিল।
