প্ৰেমত প্ৰতাৰিত হৈ এগৰাকী যুৱতীয়ে নিজৰ হাত কাটি আত্মহত্যাৰ প্ৰচেষ্টা চলোৱা ঘটনাই বৃহস্পতিবাৰে শিৱসাগৰত চাঞ্চল্যৰ সৃষ্টি কৰে। শিৱসাগৰৰ ঐতিহ্যমণ্ডিত ৰংঘৰৰ ভিতৰতে সংঘটিত ঘটনাটোৱে সকলোকে হতচকিত কৰি তোলে।
জানিব পৰা মতে, শিৱসাগৰৰ জয়াপাৰৰ পাৰ্থ গগৈ নামৰ অগ্নি নিৰ্বাপক বিভাগত চাকৰি কৰা যুৱক জনৰ লগত চাৰিং ফুলপানীচিগাৰ উচ্চতৰ মাধ্যমিকত অধ্যয়নৰত এগৰাকী যুৱতীৰ প্ৰেমৰ সম্পৰ্ক গঢ়ি উঠে। ২০১৭ চনত শিৱসাগৰত অনুষ্ঠিত সাহিত্য সভাত প্ৰথম লগ পাইছিল দুয়ো যুৱক যুৱতীয়ে আৰু তেতিয়াৰ পৰাই লাহে লাহে প্ৰেমৰ সম্পৰ্ক গঢ়ি উঠিছিল।
কিন্তু কিবা কাৰণত দুয়োৰে মাজৰ প্ৰেমৰ সম্পৰ্কত আউল লাগে আৰু দুয়োৰে মাজত যোগাযোগ কমি যায় যদিও যুৱতীগৰাকীয়ে এদিন তেওঁৰ প্ৰেমিকে শিৰত সেন্দুৰ দিবহি বুলি আশাপালি আছিল। পিচে, সেই আশা পূৰণ নহ’ল যুৱতীৰ, প্ৰেমিকে মনে মনে বিয়াও পাতিলে আৰু এটা পুত্ৰ সন্তানৰ পিতৃও হ’ল।
বহু দিনৰ পাছত বৃহস্পতিবাৰে পুনৰ দুয়োৰে মিলন হ’ল যদিও সুখকৰ নহ’ল দুয়োৰে এই মিলন। নিজৰ পত্নী-পুত্ৰৰ সৈতে ৰংঘৰলৈ ফুৰিবলৈ আহি হঠাতে লগ পালে পূৰ্বৰ প্ৰেমিকাক। প্ৰেমিকাই পত্নী-ল’ৰাৰ সৈতে প্ৰেমিকক দেখি খঙত অগ্নিশৰ্মা হৈ পৰিল আৰু দুয়োৰে মাজত ৰংঘৰৰ চৌহদতে তীব্ৰ বাক্ বিতণ্ডা আৰম্ভ হয়।
অৱশেষত যুৱতীগৰাকীয়ে নিজৰ হাত কাটি আত্মহত্যাৰ চেষ্টা চলায়। লগে লগে যুৱতী গৰাকীক যুৱকজনে শিৱসাগৰ অসামৰিক চিকিৎসালয় ভৰ্তি কৰায়।হাতত সাতটা চিলাই পৰা যুৱতী গৰাকী বৰ্তমান সুস্থ।
আনহাতে, জয়সাগৰ আৰক্ষীয়ে যুৱকজনক সোধপোচৰ বাবে থানালৈ লৈ যায়।
