এজন লুধিয়ানাৰ কাপোৰ ব্যৱসায়ীয়ে কৃত্ৰিম বুদ্ধিমত্তাৰ সহায় লৈ উচ্চতম ন্যায়ালয়ত এখন জনস্বাৰ্থজড়িত আবেদন দাখিল কৰিছিল, কিন্তু ন্যায়ালয়ৰ কঠোৰ প্ৰশ্নৰ সন্মুখীন হোৱাৰ পাছত তেওঁৰ সেই আবেদন নাকচ কৰা হয়। আবেদনখনৰ ভিতৰত থকা জটিল আইনী শব্দৰ অৰ্থ ব্যাখ্যা কৰিবলৈ গৈ ব্যৱসায়ীজন বিফল হয় আৰু তাৰ পিছতেই ন্যায়ালয়ৰ বিচাৰপীঠে তেওঁক তীব্ৰ ভৰ্ৎসনা কৰে।
ঘটনাটোৰ সূত্ৰপাত হৈছিল যেতিয়া আবেদনকাৰী ৰজনীশ সিদ্ধু নামৰ ব্যৱসায়ীজনে পি এম কেয়াৰছ ফাণ্ডৰ সৈতে জড়িত বিষয় এটাক লৈ আদালতত উপস্থিত হৈছিল। তেওঁৰ শৈক্ষিক পটভূমি আৰু প্ৰস্তুত কৰা আবেদনখনৰ ভাষাৰ মাজত সামঞ্জস্য নথকা দেখি মুখ্য ন্যায়াধীশ সূৰ্য্য কান্তে তেওঁক আবেদনখনত ব্যৱহৃত জটিল শব্দৰ বিষয়ে প্ৰশ্ন কৰে। আবেদনকাৰীজনে নিজেই স্বীকাৰ কৰে যে তেওঁ এই আবেদনখন প্ৰস্তুত কৰিবলৈ এআইৰ সহায় লৈছিল আৰু লগতে আদালতৰ চৌহদৰ এজন টাইপিষ্টৰ সহায় লৈছিল যাৰ বাবদ তেওঁ জেকেট উপহাৰ দিবলগীয়া হৈছিল।
আবেদনকাৰীৰ এনে কাণ্ডত অসন্তুষ্ট হৈ মুখ্য ন্যায়াধীশে কয় যে তেওঁ কেৱল আনৰ দ্বাৰা লিখি দিয়া পাঠ্য পঢ়িছে। আদালতৰ বিচাৰপীঠে তেওঁক উপদেশ দিয়ে যে লুধিয়ানাৰ ব্যৱসায়ত মনোযোগ দিয়াই তেওঁৰ বাবে ভাল হ’ব, কিয়নো এনেদৰে আনৰ পৰা লিখাই আনি আবেদন দাখিল কৰিলে পিছলৈ তেওঁ নিজেই আৰ্থিকভাৱে ক্ষতিগ্ৰস্ত হ’ব পাৰে। লগতে ভৱিষ্যতে এনে ভুলৰ পৰা আঁতৰি থাকিবলৈ তেওঁক কঠোৰ সকীয়নিও প্ৰদান কৰা হয়।
উল্লেখ্য যে, কেৱল এই ব্যৱসায়ীজনেই নহয়, ইয়াৰ আগদিনাও উচ্চতম ন্যায়ালয়ে আন এজন অধিবক্তাৰ এনে ধৰণৰ বহুকেইখন অৰ্থহীন আবেদন খাৰিজ কৰিছিল। পিঁয়াজ আৰু নহৰুৰ ঋণাত্মক শক্তিৰ বিষয়ে বৈজ্ঞানিক অনুসন্ধান বিচাৰি অধিবক্তাজনে কৰা আবেদনক লৈও আদালতে আশ্চৰ্য প্ৰকাশ কৰিছিল। উচ্চতম ন্যায়ালয়ৰ দৰে গুৰুত্বপূৰ্ণ প্ৰতিষ্ঠানত এনেদৰে দায়িত্বজ্ঞানহীনভাৱে আবেদন দাখিল কৰা কাৰ্যক উচ্চতম ন্যায়ালয়ে উদ্বিগ্নতা প্ৰকাশ কৰিছে।
