নৱ গঠিত তামুলপুৰ জিলাৰ কচুবাৰীস্থিত ঐতিহ্যমণ্ডিত মহাপ্ৰভু গোপাল আৰু জগন্নাথ থান সত্ৰৰ অন্তৰ্গত সাত খনকৈ গাওঁত উদযাপন কৰা হৈছে মহাপ্ৰভু গোপাল আৰু জগন্নাথৰ প্ৰতীকী গোঁসাই বাঁহ ফুৰোৱা উৎসৱ।
সমগ্ৰ কচুবাৰী অঞ্চল বুৰ গৈছে ভক্তি ৰসত। গোঁসাই বাঁহ ফুৰোৱা উৎসৱত বৰ ঢোল, তাল, শংখ, ঘণ্টাৰ ধ্বনি আৰু হৰি নাম কীৰ্তনত মুখৰিত হৈ পৰিছে তামুলপুৰৰ কচুবাৰীৰ আকাশ বতাহ।
পাঁচশ চৌবিছ বছৰ অতিক্ৰম কৰা তামুলপুৰ জিলাৰ কচুবাৰীস্থিত মহাপ্ৰভু গোপাল আৰু জগন্নাথ থান সত্ৰৰ পৰম্পৰাগত গোহাঁই বাঁহ ফুৰোৱা উৎসৱ উপলক্ষে গৰু বিহুৰ দিনা গোপাল আৰু জগন্নাথৰ প্ৰতীকী গোঁসাই বাঁহ দুডাল অতি ভক্তি ভাৱেৰে নোৱাই ধুৱাই বাঁহ দুডালত ছৰ, গামোচা, ৰুমাল আদিৰে ধুনীয়াকৈ সজাই তোলা হয় আৰু পহিলা বহাগৰ পুৱাৰ পৰা অঞ্চলটোৰ কোঁচ, কলিতা, বড়ো, ৰাভা, শৰণীয়া কছাৰী, হাজং আদিকে ধৰি অঞ্চলটোত বসবাস কৰা বিভিন্ন জাতি জনগোষ্ঠীৰ কেইবা শতাধিক লোকে ঢোল-তাল-শংখ- বৰকাহ বজাই শ্ৰী শ্ৰী গোপাল আৰু জগন্নাথ থান সত্ৰৰ পৰা গোঁসাই বাঁহ ফুৰোৱা উৎসৱ আৰম্ভ কৰে।
ভকত ৰাইজে গোপাল আৰু জগন্নাথ থান সত্ৰৰ অধীনৰ সাতখন গাওঁৰ ২২ টা চুবুৰীৰ ঘৰে ঘৰে এই গোহাঁই বাঁহ লৈ যোৱা পৰ্ব আৰম্ভ কৰে। প্ৰতি ঘৰত গোঁহাই বাঁহ লৈ গৈ নাম কীৰ্তন কৰে আৰু গৃহস্থই মাহ- প্ৰসাদৰ শৰাই আগবঢ়াই গোঁহাইৰ সম্মুখত আঁঠু লৈ ৰাইজৰ আশীৰ্বাদ গ্ৰহণ কৰে। এইদৰে গোঁসাই বাঁহ ফুৰোৱা উৎসৱৰ দিন কেইটাত শংখ, ঘণ্টা, বৰকাঁহৰ ধ্বনিৰে আৰু হৰি নাম কীৰ্তনেৰে মুখৰিত হৈ পৰে অঞ্চলটোৰ আকাশ বতাহ।
এনেদৰে ৰাইজে বহাগৰ ৬ তাৰিখলৈ গাঁৱে গাঁৱে গৈ নাম কীৰ্তন কৰি গোঁসাই বাঁহ ফুৰোৱা উৎসৱ পালন কৰে আৰু এইদৰেই মহাপ্ৰভু শ্ৰীশ্ৰী গোপাল আৰু জগন্নাথ থান সত্ৰৰ এই গোঁসাই বাঁহ ফুৰোৱা উৎসৱৰ সফল সামৰণি মাৰে।
আজি ৭ বহাগৰ দিনা গোপাল আৰু জগন্নাথ থান সত্ৰত ধৰ্মীয় পৰম্পৰা অনুসৰি হৰি নাম কীৰ্তনেৰে গোহাঁই বাঁহ খহোৱা উৎসৱ অনুষ্ঠিত হব। পৰম্পৰাগত গোহাঁই বাঁহ খহোৱা উৎসৱৰ দিনা থান সত্ৰৰ অধীনৰ সাতখন গাঁওৰ লোকৰ উপৰিও অসমৰ ভিন্ন প্ৰান্তৰ পৰা হেজাৰ হেজাৰ ভক্তৰ সমাগম ঘটে এই ঐতিহ্যমণ্ডিত থান সত্ৰখনত। আজি এই সাতখন গাৱঁৰ ২২ টা চুবুৰীৰ কেইবা হাজাৰ লোকে থান সত্ৰৰ চৌহদত পৰম্পৰাগত ভাৱে প্ৰীতি ভোজনত মিলিত হব।
স্থানীয় লোক সকলৰ উপৰিও দূৰ দূৰণিৰ পৰা অহা ভকতসকলেও অংশ লয় এই প্ৰীতি ভোজনত। প্ৰতি বছৰে অনৈক্যৰ মাজত ঐক্যৰ নিদৰ্শনেৰে বিভিন্ন জাতি-জনগোষ্ঠীৰ লোকৰ সমাগামেৰে মিলনৰ তীৰ্থভূমিত পৰিণত হয় তামুলপুৰ জিলাৰ কচুবাৰীস্থিত মহাপ্ৰভু শ্ৰীশ্ৰী গোপাল আৰু জগন্নাথ থান সত্ৰৰ চৌহদ।
