বিষাক্ত সুৰাপানৰ শোকাৱহ ঘটনা সংক্ৰান্তত গোলাঘাট আৰক্ষীয়ে শুকুৰবাৰে অৰ্থাৎ ২২ ফেব্ৰুৱাৰিত গোলাঘাট চহৰৰ ষ্টেশ্যন ৰোডৰ ইন্দুকল্প বৰদলৈ আৰু দেৱ বৰা নামৰ দুজন ব্যৱসায়িক গ্ৰেপ্তাৰ কৰি জে’ললৈ প্ৰেৰণ কৰাৰ পিছত আজি পুনৰ পাঁচজন ব্যৱসায়িক গ্ৰেপ্তাৰ কৰে।
আৰক্ষী সূত্ৰই জনোৱা অনুসৰি গোলাঘাট আৰক্ষী নগৰ সহ উপ পৰিদৰ্শক তাপেশ্বৰ দাসৰ এজাহাৰৰ আধাৰত গোলাঘাট আৰীক্ষয়ে ২২৩/১৯ নম্বৰত ভাৰতীয় দণ্ডবিধিৰ ১২০(বি)/৩২৮/৩০৪(এ) ধাৰাত ৰুজু কৰা এক গোচৰৰ ভিত্তিত উক্ত ব্যক্তি কেইজনক গ্ৰেপ্তাৰ কৰিছে।
গ্ৰেপ্তাৰ কৰা লোক কেইজন হ’ল-ক্ৰমে যোগীবাৰীৰ প্ৰবীণ ফুকন, চেলেঙীৰ ৰাজীৱ ফুকন, ছপাগুৰিৰ সুভাষ পাটৰ, বেটীয়নী চাহ বাগিচাৰ ভাইটি পাটৰ আৰু শালমৰাৰ বালি মিঞ্চ। ইয়াৰ উপৰি কেইবাজনো ব্যক্তিৰ বিৰুদ্ধে গোচৰ ৰুজু কৰা হৈছে বুলি জানিব পৰা গৈছে।
আনহাতে এই সমগ্ৰ ঘটনাক কেন্দ্ৰ কৰি আজি গোলাঘাটৰ ৰাজপথ উত্তাল হৈ পৰে। মদমুক্ত অসম দাবী সমিতি নামৰ সংগঠনটোৱে আজি দুপৰীয়া জিলা উপায়ুক্ত কাৰ্যলয়ৰ সন্মুখত ব্যাপক প্ৰতিবাদী কাৰ্যসূচী ৰূপায়ণ কৰে। উক্ত কাৰ্যসূচীৰ পিছতে সংগঠনৰ সভাপতি প্ৰবীণ দাস আৰু সম্পাদক পুলকৰঞ্জন গগৈয়ে জিলা উপায়ুক্তৰ জৰিয়তে মুখ্য মন্ত্ৰীলৈ স্মাৰকপত্ৰ প্ৰেৰণ কৰে।
একেদৰে আটছাৰ গোলাঘাট জিলা সমিতিৰ নেতৃত্বত অসম চাহ মজদুৰ সংঘৰ গোলাঘাট শাখা, আদিবাসী ছাত্ৰ সন্থাৰ গোলাঘাট জিলা সমিতিয়ে যৌথভাৱে উক্ত স্থানতে আন এক প্ৰতিবাদী ধৰ্ণা কাৰ্যসূচী ৰূপায়ণ কৰে। পাছত আটছাৰ জিলা সভাপতি জগদীশ বৰাইক আৰু সহকাৰী সম্পাদক পিয়ল বাগে জিলা উপায়ুক্তক স্মাৰকপত্ৰ প্ৰদান কৰি মৃতকৰ পৰিয়ালক পাঁচ লাখ টকাৰ ক্ষতিপূৰণকে ধৰি বিভিন্ন দাবী উত্থাপন কৰে।
আজি দুপৰীয়া গোলাঘাট নগৰৰ ত্ৰিমূৰ্তি ক্ষেত্ৰৰ সন্মুখত গোলাঘাট জিলা কংগ্ৰেছয়ো এক প্ৰতিবাদী সভা অনুষ্ঠিত কৰে।গোলাঘাট জিলা কংগ্ৰেছৰ সভাপতি তথা বিধায়ক অজন্তা নেওগৰ নেতৃত্বত অনুষ্ঠিত উক্ত সভাত ঘটনাৰ বুজ ল’বলৈ জিলাখনলৈ অহা কংগ্ৰেছৰ জ্যেষ্ঠ বিধায়ক ৰকিবুল হুছেইন, ৰূপজ্যোতি কুর্মী,ৰাজু শাহু আদি উপস্থিত থাকে। তেওঁলোকে সমগ্ৰ ঘটনাৰ তীব্ৰ গৰিহণা দিয়াৰ লগতে বিজেপি চৰকাৰৰ চৰম বিফলতাৰ বাবে এনেধৰণৰ শোকাৱহ পৰিস্থিতি উদ্ভৱ হোৱা বুলি তীব্ৰ সমালোচনা কৰে।
দুৰ্নীতি নিবাৰক প্রকৃতি সুৰক্ষা সমিতিৰ তিনিজনৰ বিৰুদ্ধে গোচৰ :
আজি সদৌ অসম দুৰ্নীতি নিবাৰক প্রকৃতি সুৰক্ষা সমিতিৰ ৰাজ্যিক সভাপতি নিতুল শইকীয়াই গোলাঘাট জিলাত লালিগুৰৰ ব্যৱসায় কৰি অহা তিনি ব্যবসায়ীৰ বিৰুদ্ধে গোলাঘাট থানাত এক গোচৰ ৰুজু কৰে।
উক্ত ব্যৱসায়ী কেইজন হ’ল মেৰাপানীৰ সুনীল গুপ্তা, দেৰগাঁৱৰ লালচন্দ আগৰৱালা আৰু সুভাষ শাহু। ইয়াৰ উপৰি অবৈধ সুৰা বন্ধৰ ক্ষেত্ৰত গাফিলতি কৰা আবকাৰী আৰু যোগান বিভাগৰ বিষয়াৰ বিৰুদ্ধে তদন্ত কৰি শাস্তি গ্ৰহণৰ দাবী জনাইছে।
