চাৰি কোটি টকাৰ সোণ হৰলুকি কৰি আত্মগোপন কৰি অৱস্থাত আৰক্ষী উপ-পৰিদৰ্শক নিপু কলিতাই মোবাইলৰ জৰিয়তে শোণিতপুৰ জিলাৰ এজন শীৰ্ষ আই পি এছ বিষয়াৰ লগত সঘন যোগাযোগ ৰাখিছিল। ধৃত নিপু কলিতাৰ মোবাইল কল লিষ্টত এই তথ্য আছে যদিও আৰক্ষীয়ে বিষয়টো গাপ দিয়াৰ চেষ্টা চলাইছে।
ইপিনে, এমাহ অতিক্ৰম কৰাৰ পাছতো আৰক্ষীয়ে বৃহৎ পৰিমানৰ সোণখিনি উদ্ধাৰ কৰিবলৈ সক্ষম হোৱা নাই। আৰক্ষীৰ লোকৰ মাজতে সংঘটিত হোৱা এই ঘটনাটো প্ৰকৃততে গাপ দিয়াৰ চেষ্টা কৰা হৈছে নেকি তাক লৈও প্ৰশ্ন উত্থাপিত হৈছে।
আৰক্ষী বিষয়া নিপু কলিতাৰ মোবাইলৰ কল লিষ্টত উদ্ধাৰ হোৱা তথ্যৰ আলমত আৰক্ষীয়ে তদন্ত আগবঢ়োৱা নাই। কিয়নো সেয়া কৰা হ’লে ইতিমধ্যে ঘটনাৰ ওৰ ওলাই পৰাৰ সম্ভাৱনা নিশ্চিত আছিল। তদুপৰি, সোণ লুট কৰা এই ঘটনাৰ আঁৰত আৰক্ষীৰ শীৰ্ষ বিষয়া জড়িত থকাৰ অভিযোগে বিষয়টোক গভীৰ ৰহস্যৰ মাজলৈ ঠেলি দিছে।
আনহাতে, সাত দিন আৰক্ষীৰ জিম্মাত থকাৰ পাছত নিপু কলিতাক বৃহস্পতিবাৰে কামৰূপ জিলাৰ মুখ্য ন্যায়িক দণ্ডাধীশৰ আদালতত হাজিৰ কৰোৱা হয়। আদালতে ধৃত কলিতাক বৃহস্পতিবাৰে পুনৰ চাৰিদিনৰ বাবে আৰক্ষীৰ জিম্মাত দিয়ে।
জানিব পৰা মতে, আৰক্ষীৰ জিম্মাত থকা সময়ত চাৰি কোটি টকাৰ সোণ হৰলুকিৰ মূল অভিযুক্ত দিচপুৰ থানাৰ উপ-পৰিদৰ্শক নিপু কলিতাই শীৰ্ষ আৰক্ষী বিষয়াই পৃথকে পৃথকে কৰা জেৰাত বিভিন্ন সময়ত বিভিন্ন স্বীকাৰোক্তি দি বিভ্ৰান্ত কৰাৰ চেষ্টা চলায়।
তদন্তকাৰী আৰক্ষী বিষয়াৰ জেৰাত কলিতাই চাৰি কোটি টকাৰ সোণখিনি সেনা বাহিনীয়ে তেওঁৰ হাতৰ পৰা লুট কৰি নিয়া বুলি স্বীকাৰোক্তি দিয়ে। এইদৰে উপ-পৰিদৰ্শক নিপু কলিতাই তদন্তকাৰী আৰক্ষী বিষয়াৰ ওচৰত বিভ্ৰান্তিকৰ তথ্য দাঙি ধৰা বাবে আৰক্ষীয়ে কলিতাৰ ভাষ্য বিশ্বাসত ল’ব পৰা নাই। সেয়েহে, পুনৰ আৰক্ষীয়ে তেওঁক চাৰিদিনৰ জিম্মাত ৰাখি জেৰা কৰিব।
আনহাতে, গোটেই ঘটনাটোত সাঙোৰ খাই পৰা শোণিতপুৰ জিলাৰ আই পি এছ বিষয়াগৰাকী কোন তাক লৈয়ো ৰহস্যৰ সৃষ্টি হৈছে। ঘটনাটোত শীৰ্ষ আৰক্ষী বিষয়াৰ ভূমিকাৰ বাবে এতিয়া তদন্ত প্ৰক্ৰিয়া স্থবিৰ হৈ পৰা বুলি অনুমান কৰা হৈছে।