তিনিচুকীয়া জিলাৰ মাৰ্ঘেৰিটা মহকুমাৰ অন্তৰ্গত লিডু অঞ্চলৰ অন্যতম ধৰ্মীয় অনুষ্ঠান লিডু কেন্দ্ৰীয় নামঘৰে গৌৰৱোজ্জ্বল ৫০ বছৰ সম্পূৰ্ণ কৰা উপলক্ষে ৫ দিনীয়াবিস্তৃত কাৰ্যসূচীৰে অনুষ্ঠিত সোণালী জয়ন্তী সমাৰোহ আৰু মহাপুৰুষ শ্ৰী মন্ত শংকৰদেৱৰ ৫৭০ তম জন্মোৎসৱটি সফল সামৰণি পৰে৷ কালি অন্তিম দিনা পুৱা বিভিন্ন জাতি জনগোষ্ঠীৰ ধৰ্মীয় কীৰ্ত্তন দল তথা সহস্ৰাধিক ধৰ্মপ্ৰাণ ৰাইজৰ অংশগ্ৰহণৰে এক বৰ্ণাঢ্য ভাগৱত ভ্ৰমণ উলিওৱা হয়৷
অনুষ্ঠানত মুখ্য অতিথি ৰূপে উপস্থিত থাকি আউনীআটী সত্ৰৰ সত্ৰাধিকাৰ ডঃ পীতাম্বৰ দেৱ গোস্বামীয়ে সাৰগৰ্ভ বক্তব্য ডাঙি ধৰি ধৰ্মপ্ৰাণ ৰাইজক মন্ত্ৰমুগ্ধ কৰে৷ তেওঁ শৰাই ভাঙিবলৈ বা সকাম ভাঙিবলৈকে নাম নহয় বুলি উল্লেখ কৰি নামৰ তাৎপৰ্য হৃদয়ঙ্গম কৰি তাৰ পালন কৰিব পৰাটোহে নামৰ সাৰ্থকতা বুলি কয়৷
সন্ধিয়া উদযাপন সমিতিৰ সভাপতি লোকনাথ কোঁৱৰৰ পৌৰোহিত্যত এখন মুকলি সভা অনুষ্ঠিত হয়৷ মুখ্য সাধাৰণ সম্পাদক ৰাণাজ্যোতি নেওগে উদ্দেশ্য ব্যাখ্যা কৰা আৰু আতঁ ধৰা সভাখনত মুখ্য অতিথি ৰূপে সত্ৰাধিকাৰ প্ৰেম নাৰায়ণ গোস্বামী উপস্থিত থাকি নামঘৰটিৰ সোণালী ইতিহাস ৰোমন্থন কৰে৷
নিশা যোৰহাটৰ পৰা আমন্ত্ৰিত বৃন্দাবন নাট্যগোষ্ঠীৰ দ্বাৰা বিদুৰথ বিপ্ৰ দামোদৰ আখ্যান শীৰ্ষক নাট ভাওঁনা খনি মঞ্চস্থ কৰা হয়৷
দ্বিতীয় দিনা সদৌ তিনিচুকীয়া জিলা ভিত্তিত প্ৰাইজমানি বৰগীত প্ৰতিযোগিতা শিশু সকলৰ মাজত দিহা নাম সদৌ অসম ভিত্তিত মহিলা সকলৰ মাজত দিহা নাম প্ৰতিযোগিতা অনুষ্ঠিত হয়৷
বিয়লি ৫ বজাত ডঃ ৰমেন হাজৰিকাৰ সঞ্চালনাত মহাপুৰুষ শ্ৰীমন্ত শঙ্কৰদেৱৰ আদৰ্শৰ তাৎপৰ্য শীৰ্ষক বিষয়ৰ ওপৰত এখনি আলোচনা চক্ৰ আৰু স্মৃতিগ্ৰন্থ উন্মোচনী অনুষ্ঠান অনুষ্ঠিত হয়৷
আলোচক ৰূপে ডঃ ৰঞ্জিত দত্ত উপস্থিত থাকি মহাপুৰুষ শ্ৰী মন্ত শংকৰদেৱৰ জীৱনাদৰ্শৰ কথা ব্যক্ত কৰে৷
তৃতীয় দিনা সন্ধিয়া ৭ বজাত স্থানীয় যুৱক সকলৰ দ্বাৰা পঙ্কজ শইকীয়াৰ পৰিচালনাত বেদৱতী উপাখ্যান ভাওঁনা মঞ্চস্থ কৰা হয়। চতুৰ্থ দিনা পুৱা ৭-০০ বজাত আই সকলৰ নাম, যুৱক সকলৰ নাম আৰু শিশু সকলৰ নাম দিনৰ ১১-০০ বজাত নাম প্ৰসংগ অনুষ্ঠিত হয়৷