উত্তৰ ছিকিম ভ্ৰমণ কৰিব বিচৰা পৰ্যটকসকলৰ বাবে এটা অতি আনন্দৰ খবৰ আহি পৰিছে। দীৰ্ঘদিন ধৰি বন্ধ হৈ থকা লাচেনলৈ যোৱাৰ পথটো অৱশেষত চৰকাৰে পুনৰ মুকলি কৰি দিছে। ২০২৫ চনৰ জুন মাহত হোৱা ভয়ংকৰ প্ৰাকৃতিক দুৰ্যোগৰ বাবে এই গুৰুত্বপূৰ্ণ পথটো বন্ধ হৈ আছিল। এতিয়া পৰিস্থিতি স্বাভাৱিক হোৱাৰ পিছত পৰ্যটকসকলৰ বাবে পুনৰ অনুমতি পত্ৰ বা পাৰমিট দিয়াৰ কাম আৰম্ভ কৰা হৈছে।
যোৱা বছৰৰ জুন মাহত হোৱা ধাৰাসাৰ বৰষুণ আৰু ভূমিস্খলনৰ ফলত উত্তৰ ছিকিমৰ বহুতো পথ আৰু দলং ভাঙি চূৰমাৰ হৈছিল। ইয়াৰ ফলত লাচেনৰ দৰে অতি জনপ্ৰিয় পৰ্যটন থলীসমূহৰ সৈতে যোগাযোগ একেবাৰে বিচ্ছিন্ন হৈ পৰিছিল। এতিয়া পথটো মুকলি হোৱাৰ লগে লগে পৰ্যটকসকলে পুনৰ লাচেন ভ্ৰমণ কৰিব পাৰিব। উল্লেখ্য যে সাগৰ পৃষ্ঠৰ পৰা প্ৰায় ১৭ হাজাৰ ফুট উচ্চতাত অৱস্থিত বিশ্ববিখ্যাত গুৰুদোংমাৰ হ্ৰদৰ প্ৰৱেশদ্বাৰ হৈছে এই লাচেন। এই হ্ৰদটো উত্তৰ ছিকিমৰ এটা প্ৰধান আকৰ্ষণৰ কেন্দ্ৰবিন্দু।
উত্তৰ ছিকিমৰ জিলা দণ্ডাধীশ অনন্ত জৈনে জনোৱা মতে চুংথাংৰ পৰা লাচেনলৈ যোৱা পথটো ইমান দিনে এখন বিশেষ দলঙৰ নিৰ্মাণ কাৰ্য চলি থকাৰ বাবে বন্ধ ৰখা হৈছিল। শেহতীয়াকৈ সেই অঞ্চলত নিৰ্মাণ কৰা নতুন ৪০০ ফুট দীঘল দলংখন উদ্বোধন কৰাৰ পিছতে যান-বাহন চলাচলৰ বাবে পথটো মুকলি কৰি দিয়া হয়। ইয়াৰ লগে লগে এই অঞ্চললৈ পৰ্যটকৰ আহ-যাহ পুনৰ স্বাভাৱিক হৈ পৰিব বুলি আশা কৰা হৈছে।
সুৰক্ষাৰ স্বাৰ্থত এই পথৰ দলংসমূহ পাৰ হোৱাৰ সময়ত চালকসকলৰ বাবে কিছুমান বিশেষ নীতি-নিৰ্দেশনা জাৰি কৰা হৈছে। যিহেতু দলংবোৰৰ প্ৰস্থ কম গতিকে একেলগে দুখনকৈ গাড়ী পাৰ হ’বলৈ দিয়া নহ’ব। একেলগে দুখন গাড়ী পাৰ হ’লে দুৰ্ঘটনা হোৱাৰ সম্ভাৱনা থাকে বাবে এখন গাড়ী পাৰ হোৱাৰ কিছু সময়ৰ পিছতহে আনখন গাড়ীক যাবলৈ দিয়া হ’ব। লগতে চালকসকলে দলঙৰ নিৰ্ধাৰিত ওজন সীমাও মানি চলিব লাগিব।
পৰ্যটন বিভাগ আৰু চেকপোষ্টসমূহক এই নতুন নিৰ্দেশনাৰ বিষয়ে ইতিমধ্যে জনাই দিয়া হৈছে। পৰ্যটকৰ বাবে প্ৰয়োজনীয় প্ৰায় ৯০ শতাংশ অনুমতি পত্ৰই থাৰ্ড মাইল অফিচৰ পৰা অনলাইন যোগে প্ৰদান কৰা হয়। বৰ্তমান পৰ্যটকৰ আহ-যাহত কোনো বাধা নাই বুলি জিলা প্ৰশাসনে স্পষ্ট কৰি দিছে। চুংথাংৰ পৰা লাচেন আৰু লাচুং দুয়োটা দিশৰে পথ এতিয়া যাতায়াতৰ বাবে সম্পূৰ্ণ উপযোগী হৈ উঠিছে।
