অসম চৰকাৰৰ বিভিন্ন বিভাগত নিযুক্তি লাভ কৰি নিযুক্তি পত্ৰৰ বাবে অপেক্ষা কৰি থকা ৰাজ্যৰ যুৱক-যুৱতীসকললৈ এক বৃহৎ সুখবৰ কঢ়িয়াই আনিছে মুখ্যমন্ত্ৰী ড০ হিমন্ত বিশ্ব শৰ্মাই। আজি নিজা ফেচবুক একাউণ্টত লাইভযোগে মুখ্যমন্ত্ৰীগৰাকীয়ে ঘোষণা কৰে যে চলিত নৱেম্বৰ আৰু আগন্তুক ডিচেম্বৰ মাহৰ ভিতৰত ভিন্ন বিভাগসমূহৰ নিযুক্তি পত্ৰ বিতৰণ কৰা হ’ব।
অহা ৯ নৱেম্বৰত প্ৰাথমিক বিদ্যালয়ৰ শিক্ষক-শিক্ষয়িত্ৰী পদৰ বাবে যোগ্যতা লাভ কৰাসকলক নিযুক্তি পত্ৰ প্ৰদান কৰা হ’ব। নৱেম্বৰ মাহৰ ভিতৰতে অসম আৰক্ষীৰ কনিষ্টবলসকলক নিযুক্ত দিয়াৰ ব্যৱস্থা কৰা হ’ব। নৱেম্বৰৰ শেষত বা ডিচেম্বৰৰ প্ৰথমভাগত তৃতীয় তথা চতুৰ্থ বৰ্গৰ নিযুক্তি পত্ৰ প্ৰদান কৰিবলৈ চেষ্টা কৰা হ’ব।
মুখ্যমন্ত্ৰীয়ে উল্লেখ কৰে যে প্ৰয়াত শিল্পী জুবিন গাৰ্গৰ অকাল মৃত্যুৰ বাবে হোৱা শোকৰ পৰিৱেশৰ বাবে প্ৰায় এমাহ কাম-কাজ স্তব্ধ হৈ আছিল, সেয়েহে এই প্ৰক্ৰিয়া পূৰ্ণ কৰিবলৈ এমাহ সময়ৰ প্ৰয়োজন।
চলিত নৱেম্বৰ-ডিচেম্বৰৰ ভিতৰত স্নাতকোত্তৰ আৰু স্নাতক শিক্ষকসকলৰ লগতে স্বাস্থ্য বিভাগৰ নিযুক্তিৰ ব্যৱস্থা কৰা হ’ব। এই সন্দৰ্ভত শীঘ্ৰেই তাৰিখ ঘোষণা কৰা হ’ব।
মুখ্যমন্ত্ৰী শৰ্মাই নিশ্চিত কৰে যে ৰাজ্য চৰকাৰে চাহ বাগিছাৰ যুৱক-যুৱতীসকলৰ বাবে চাকৰিত ৩ শতাংশ সংৰক্ষণৰ যি সিদ্ধান্ত লৈছিল, সেয়া এইবাৰ ফলৱৰ্তী হ’ব। সকলো নিযুক্তি ব্যৱস্থা সম্পূৰ্ণ হোৱাৰ পিছত নৱেম্বৰ বা ডিচেম্বৰৰ ভিতৰত চাহ বাগিছাৰ যুৱক-যুৱতীসকলক পৃথকে নিযুক্তি পত্ৰ প্ৰদান কৰা হ’ব।
আৰক্ষী কনিষ্টবল নিযুক্তিৰ পিছদিনাই ৰাজ্য চৰকাৰে পুনৰ প্ৰায় ৪ হাজাৰ পদ মুকলি কৰা হ’ব বুলি ঘোষণা কৰিছে। ইয়াৰ উপৰিও ADRE ৰ নতুন বিজ্ঞাপন প্ৰকাশ সন্দৰ্ভতো লাহে লাহে জনোৱা হ’ব বুলি তেওঁ উল্লেখ কৰে।
