প্ৰাৰ্থী থিয় কৰোৱাৰ ক্ষেত্ৰত অসমৰ খিলঞ্জীয়া মুছলমানক অৱহেলা কৰিছে ৰাজনৈতিক দলসমূহে।
আজি দিছপুৰ প্ৰেছ ক্লাৱত এক সংবাদমেল সম্বোধন কৰি এই গুৰুতৰ অভিযোগ তোলে গৰীয়া মৰিয়া দেশী জাতীয় পৰিষদৰ সাধাৰণ সম্পাদক হাচিফুল ইছলামে।
সংবাদমেলত তেওঁ কয় “গৰিয়া-মৰিয়া দেশী সকল অসমীয়া জাতিৰ এটা অংগ অসমৰ জাতীয় জীৱনৰ অস্তিত্বৰ সংগ্ৰামত বিভিন্ন ক্ষেত্ৰত গৰিয়া-মৰিয়া সকলে আত্মবলিদান দি আহিছে।আজি কিন্তু ৰাজনৈতিক ক্ষেত্ৰ খনত গৰিয়া-মৰিয়া সকল লাঞ্ছিত-বঞ্চিত হৈ পৰিছে।”
অসমত গৰিয়া-মৰিয়া সকলে ১৪টা সমষ্টিত নিৰ্ণয়ক ভূমিকা গ্ৰহণ কৰিব পাৰে যদিও তেওঁলোকক বঞ্চিত কৰা হ’ল বুলি তেওঁ উল্লেখ কৰে।
তেওঁ আৰু কয় “আমি সকলো দলকে আহ্বান জনাইছিলোঁ যে এই সমষ্টি বোৰত গৰিয়া-মৰিয়া সকলক প্ৰাৰ্থিত্ব প্ৰদান কৰিবলৈ কিন্তু কোনো দলে আমাক সঁহাৰি নজনালে।”
“ৰাইজৰ দল আৰু অসম জাতীয় পৰিষদক আমি বাদেই দিছোঁ কাৰণ তেখেত সকল নতুন দল আৰু তেওঁলোকৰ নিজৰ স্থিতিয়ে থৰক-বৰক অৱস্থা।” ইছলামে এইদৰে কয়।
কিন্তু কংগ্ৰেছ-বিজেপি দুয়োটা দলে ইমান দিনে চৰকাৰ থকাৰ সময়তও গৰিয়া-মৰিয়া সকলৰ বাবে এবাৰো নাভাবিলে বুলি দাবী কৰি তেওঁ লগতে কয় “নিৰ্বাচনৰ পূৰ্বে ওলোৱা তালিকাত কংগ্ৰেছে পূৰ্ব বঙ্গীয় প্ৰাৰ্থী হে দিলে কিন্তু গৰিয়া-মৰিয়াৰ প্ৰাৰ্থী এটাও নাই।কংগ্ৰেছে অকল মিঞা সকলক হে এৰি দিছে।কংগ্ৰেছ দলৰ পৰা আমি কেতিয়াও আশা কৰা নাছিলোঁ আৰু ভৱিষ্যতলৈও নকৰোঁ।”
“কিন্তু বিজেপি চৰকাৰে নিৰ্বাচনী ইস্তাহাৰত প্ৰকাশ কৰিছিল গৰিয়া-মৰিয়া সকলৰ কথা। আমি আশা কৰিছিলোঁ বিজেপি চৰকাৰৰ পৰা যিখন চৰকাৰে খিলঞ্জীয়া অসমীয়াৰ কথা, ভূমিপুত্ৰৰ,স্বাভিমান,জাতীয়তাবাদৰ কথা কয় এই চৰকাৰ খনক আমি সঁহাৰি জনাইছিলোঁ কিন্তু বিজেপি চৰকাৰেও আমাৰ কথা নাভাবি মিঞা সকলক প্ৰাৰ্থিত্ব প্ৰদান কৰিলে।” বিজেপিক কটাক্ষ কৰি এইদৰে কয় ইছলামে।
নামনি অসমত যদি গৰিয়া-মৰিয়া লোকক প্ৰাৰ্থিত্ব নিদিয়ে তেনেহলে তেওঁলোকে ইয়াৰ উচিত প্ৰত্যুত্তৰ দিব বুলি হুংকাৰ দিয়ে।
