সদৌ অসম সংখ্যালঘু ছাত্ৰ য়ুনিয়ন চমুকৈ “আমছু”ৰ বিৰুদ্ধে সৰৱ হৈ পৰিছে সদৌ অসম গৰিয়া মৰিয়া দেশী জাতীয় পৰিষদ৷
পৰিষদৰ কেন্দ্ৰীয় সমিতিৰ সাধাৰণ সম্পাদক (সাংগঠনিক) হাছিফুল ইছলামে আজি বৰপেটাত “আমছু”ৰ বিৰুদ্ধে কেতবোৰ গুৰুত্বপূৰ্ণ মন্তব্য আগবঢ়ায়।
খিলঞ্জীয়া গৰিয়া মৰিয়া দেশী সকলৰ ক্ষেত্ৰত “আমছু”য়ে দুমুখীয়া স্থিতি অৱলম্বন কৰা বুলি উল্লেখ কৰি গৰিয়া মৰিয়া দেশী সকলৰ সমস্যাক লৈ “আমছু”ৰ মাত মতাৰ অধিকাৰ নাই বুলি স্পষ্ট কৰি দিয়ে গৰিয়া মৰিয়া দেশী জাতীয় পৰিষদৰ সাধাৰণ সম্পাদক গৰাকীয়ে।
সম্পাদক গৰাকীয়ে কয়, “আমি লক্ষ্য কৰিছো যে বিগত কিছুদিনৰ পৰা আমছুৱে খিলঞ্জীয়া ইছলামধৰ্মী ভূমিপুত্ৰ গৰিয়া মৰিয়া দেশীৰ পক্ষত ঠিয় দিয়া পৰিলক্ষিত হৈছে”।
“আমি আচৰিত হৈছো যে আমছুৰ জন্মৰ পিছৰে পৰা কেতিয়াও গৰিয়া মৰিয়াৰ হৈ মাত মতা দেখা নাই। আমছুৱে সকলো মুছলমানকে একাকাৰ কৰাৰ যি পৰিকল্পনা কৰিছিল তাৰ বিৰুদ্ধাচৰণতে গৰিয়া মৰিয়া দেশী জাতীয় পৰিষদৰ জন্ম হৈছিল’, এইদৰে কয় সাধাৰণ সম্পাদক ইছলামে।
সংগঠনটোৰ ফালৰ পৰা স্পষ্ট কৰি দিয়া হয় যে ভৱিষ্যতত আমছুৱে যাতে কোনো কাৰণতে তেওঁলোকৰ কামত হস্তক্ষেপ নকৰে।
