দক্ষিণ কামৰূপৰ গৰৈমাৰী আৰক্ষী থানাৰ অন্তৰ্গত বৰভিঠা গাঁৱত দেওবাৰে নিশা এক শোকাবহ পথ দুৰ্ঘটনা সংঘটিত হয়। অবৈধ বালি পৰিবহণৰ সৈতে জড়িত এখন ডাম্পাৰে নিয়ন্ত্ৰণ হেৰুৱাই এটা বাসগৃহৰ ওপৰত বাগৰি পৰাৰ ফলত এগৰাকী মহিলা আৰু তেওঁৰ ৪ বছৰীয়া কন্যাৰ থিতাতে মৃত্যু হয়।
প্ৰাপ্ত বাতৰি অনুসৰি, মথাউৰিৰ ওপৰত নিৰ্মিত ওখ পথেৰে গৈ থকা অৱস্থাত বালি ভৰ্তি ডাম্পাৰখনে নিয়ন্ত্ৰণ হেৰুৱাই পথৰ পৰা পিচলি পৰে আৰু পোনপটীয়াকৈ তলত থকা এটা আৱাসিক গৃহৰ ওপৰত বাগৰি পৰে। দুৰ্ঘটনাটোৰ সময়ত ঘৰটোৰ গৰাকী হাছান আলীৰ পৰিয়ালৰ পাঁচজন সদস্য গভীৰ নিদ্ৰাত আছিল। ডাম্পাৰখনে ঘৰটো মোহাৰি পেলোৱাৰ ফলত পৰিয়ালটোৰ সকলো সদস্য ধ্বংসস্তূপৰ মাজত আৱদ্ধ হৈ পৰে।
স্থানীয় লোকে আৰ্তনাদ শুনি লগে লগে ঘটনাস্থলীত উপস্থিত হয় আৰু উদ্ধাৰ কাৰ্যত সহায় কৰে। পাছত গৰৈমাৰী, জোৰশিমুলী আৰু চন্তলী আৰক্ষী থানাৰ জোৱানসকলে স্থানীয় ৰাইজৰ সহযোগত কেইবা ঘণ্টা ধৰি উদ্ধাৰ অভিযান চলায়। ডাম্পাৰখন আঁতৰোৱাৰ পাছত দুগৰাকীৰ মৃতদেহ উদ্ধাৰ কৰা হয় যদিও আন তিনিজনক জীৱন্তে উদ্ধাৰ কৰিবলৈ সক্ষম হয়।
মৃত লোক দুগৰাকীক ছালেহা খাতুন আৰু তেওঁৰ চাৰি বছৰীয়া কন্যা মাজেদা খাতুন বুলি চিনাক্ত কৰা হৈছে। আনহাতে, গুৰুতৰভাৱে আহত হাছিনা খাতুন, তাছলিমা খাতুন আৰু এবছৰীয়া এটি শিশুক সংকটজনক অৱস্থাত উদ্ধাৰ কৰি লগে লগে হাস্পতাললৈ প্ৰেৰণ কৰা হয়।
এই ঘটনাই সমগ্ৰ অঞ্চলটোত তীব্ৰ চাঞ্চল্য আৰু ক্ষোভৰ সৃষ্টি কৰিছে। স্থানীয় ৰাইজৰ অভিযোগ অনুসৰি, অঞ্চলটোত দীৰ্ঘদিন ধৰি অবৈধ বালি মাফিয়াৰ দ্ৰুতবেগী ডাম্পাৰৰ সন্ত্ৰাস চলি আহিছে। এনে অবৈধ বালি খনন আৰু পৰিবহণৰ বিৰুদ্ধে চৰকাৰক কঠোৰ ব্যৱস্থা গ্ৰহণ কৰিবলৈ ৰাইজে দাবী জনাইছে যাতে ভৱিষ্যতে এনে শোচনীয় ঘটনাৰ পুনৰাবৃত্তি নহয়।
