ৰাজ্যৰ ৬৬,২৭,৮৮১ টা ৰেচন কাৰ্ডধাৰী হিতাধিকাৰী পৰিয়ালক বিনামূলীয়া চাউল বিতৰণ কৰা ৩৩,১৬৭ গৰাকী সুলভ মূল্যৰ দোকানীৰ প্ৰাপ্য কমিছন আৰু বকেয়া ধন শীঘ্ৰে মোকলাই দিবলৈ ভাৰতৰ গণতান্ত্ৰিক যুৱ ফেডাৰেছন (ডি ৱাই এফ আই)ৰ অসম ৰাজ্যিক কমিটিয়ে দাবী জনাইছে।
ৰাজ্যৰ গৰিষ্ঠ সংখ্যক জনসাধাৰণলৈ খাদ্য যোগান ধৰি থকা সুলভ মূল্যৰ দোকানীসকলে ২০২৪ বৰ্ষৰ ফেব্ৰুৱাৰী মাহৰ পৰা জুন মাহলৈ অৰ্থাৎ ৬ মাহ ধৰি কমিছনৰ ধন পোৱা নাই।
আশ্চৰ্যকৰ বিষয় যে ২০১৫ চনৰ ডিচেম্বৰ মাহৰ পৰা ২০১৯ চনৰ মাৰ্চ মাহলৈ মুঠ ৪০ মাহৰ বকেয়া ৰাজ্যখনৰ সুলভ মূল্যৰ দোকানীসকলে চৰকাৰৰ পৰা পাবলৈ বাকী আছে। প্ৰতি কুইন্টলত ৪২.৯০ টকাকৈ প্ৰায় ২৩২ টকা কোটি বকেয়া পাবলৈ বাকী আছে।
এই মূল দাবীকে ধৰি সৰ্বমুঠ ১১ টা দাবী সুলভ মূল্যৰ ব্যৱসায়ীসকলে উত্থাপন কৰিছে আৰু তিনিদিনীয়া প্ৰতিবাদী কাৰ্যসূচী ৰূপায়ণ কৰিছে। ডি ৱাই এফ আইয়ে ব্যৱসায়ীসকলৰ দাবীসমূহৰ প্ৰতি পূৰ্ণ সমৰ্থন আগবঢ়াইছে আৰু শীঘ্ৰে পূৰণ কৰাৰ বাবে চৰকাৰৰ ওচৰত দাবী উত্থাপন কৰিছে।
ডি ৱাই এফ আইয়ে কেৱল চাউলেই নহয়, দাইল, তেল, আটাকে ধৰি নিত্যপ্ৰয়োজনীয় সামগ্ৰীসমূহ সুলভ মূল্যৰ দোকানৰ যোগেদি যোগান ধৰিবলৈ দাবী কৰি আহিছে।
উল্লেখযোগ্য যে চৰকাৰে সুলভ মূল্যৰ দোকানৰ যোগেদি যোগান ধৰা সামগ্ৰীৰ এপদ এপদকৈ উঠাই কেৱল মাত্ৰ চাউল যোগানতে সীমাবদ্ধ ৰাখিছে। জনসাধাৰণক মূল্যবৃদ্ধি আৰু ভেজাল সামগ্ৰীৰ পৰা সুৰক্ষা দিবলৈ সুলভ মূল্যৰ দোকানৰ ব্যৱস্থাটো এক শক্তিশালী মাধ্যম কৰিব পাৰে যদিও চৰকাৰে সমগ্ৰ ব্যৱস্থা দুৰ্বল কৰি পেলাইছে। এয়া ৰাজ্যখনৰ জনসাধাৰণৰ স্বাৰ্থৰ পৰিপন্থী।
ডি ৱাই এফ আইয়ে এইটো উপলদ্ধি কৰে যে সুলভ মূল্যৰ দোকানী সন্থাই উত্থাপন কৰা দাবীসমূহ কেৱল সেই অংশৰ দোকানীসকলৰ স্বাৰ্থৰ লগত জড়িত বিষয়ে নহয়, ই হৈছে বৃহত্তৰ ৰাইজৰ স্বাৰ্থৰ লগত জড়িত বিষয়। সেয়ে ডি ৱাই এফ আইয়ে দাবী কৰিছে সুলভ মূল্য দোকানীসকলৰ দাবী মানি লৈ তেওঁলোকৰ সমস্যা সমাধান কৰাৰ মাজেৰে ৰাজ্যখনৰ বৃহত্তৰ জনগণৰ স্বাৰ্থ পূৰণ কৰক।
