যোৱা দুবছৰ ধৰি দুই হাজাৰ টকীয়া নোট ছপা কৰা নাই কেন্দ্ৰই। লোকসভাত এই কথা জানিবলৈ দিয়ে বিত্ত বিভাগৰ কেন্দ্ৰীয় ৰাজ্যমন্ত্ৰী অনুৰাগ ঠাকুৰে।
বিত্ত ৰাজ্যমন্ত্ৰীগৰাকীয়ে এক লিখিত বিবৃতিত জানিবলৈ দিয়া মতে বৰ্তমান দেশত ২৪৯৯০লাখ দুই হাজাৰ টকীয়া নোট প্ৰচলন হৈ আছে।
এয়া মুঠ নোটৰ মাত্ৰ ২.০১শতাংশ বুলি কোৱা হৈছে। তিনি বছৰ পূৰ্বে প্ৰায় ৩৩৬২০লাখ দুই হাজাৰ টকীয়া নোট বজাৰত আছিল। বিগত তিনি বছৰত দেশৰ বজাৰত দুই হাজাৰ টকীয়া নোটৰ সংখ্যা হ্ৰাস পাইছে।
বিবৃতিটোত কোৱা হৈছে যে কোনো বেংক নোট ছপাৰ ক্ষেত্ৰত চৰকাৰে সিদ্ধান্ত লয়। এইক্ষেত্ৰত ৰিজাৰ্ভ বেংক অফ ইণ্ডিয়াৰ দিহা-পৰামৰ্শ গ্ৰহণ কৰা হয়।
মানুহৰ লেনদেনৰ কামত যাতে সুবিধা হয় তালৈ লক্ষ্য ৰাখিয়েই এনে পদক্ষেপ গ্ৰহণ কৰা হয়।
২০১৯ আৰু ২০২০ত কোনো নোট ছপা কৰা হোৱা নাই। ২০১৬-১৭চনত বহুত নোট ছপা কৰা হৈছিল যদিও লাহে লাহে যোৱা কেইবছৰত তাৰ সংখ্যা হ্ৰাস পাইছে আৰু ২০১৯ৰ এপ্ৰিলৰ পাছত কোনো দুই হাজাৰ টকীয়া নোট ছপা কৰা হোৱা নাই।
ক’ৱা টকা জমা ৰখাৰ বাবে লোকে যাতে নিজৰ লগত অধিক ডাঙৰ নোট লুকুৱাই ৰাখিব নোৱাৰে তাৰ বাবেই এই সিদ্ধান্ত লোৱা বুলি জানিব পৰা গৈছে।
২০১৬চ বিমুদ্ৰাকৰণৰ পাছত কেন্দ্ৰই এক হাজাৰ টকীয়া নোট উঠাই দি তাৰ ঠাইত দুই হাজাৰ টকীয়া নোট আনিছিল। প্ৰথমতে মানুহৰ হাতে হাতে দুই হাজাৰ টকাৰ নোট দেখা গৈছিল যদিও সেয়া লাহে লাহে ইয়াৰ ব্যৱহাৰ কমি গৈছে। কেন্দ্ৰই এতিয়া এই সন্দৰ্ভত তথ্যসহকাৰে চিন্তাৰ মোখনি মাৰিলে।
