অসমৰ মাদ্ৰাছাৰ দীৰ্ঘদিনীয়া সমস্যাসমূহ সমাধান নকৰি ৰাজ্যৰ বিজেপি চৰকাৰে এই শিক্ষানুষ্ঠানসমূহ বন্ধ কৰাৰ ‘ষড়যন্ত্ৰ’ কৰা বুলি গুৰুতৰ অভিযোগ উত্থাপন কৰিছে সদৌ অসম মাদ্ৰাছা ছাত্ৰ সন্থাই।
‘‘চৰকাৰে মাদ্ৰাছাসমূহ বন্ধ কৰি দিয়াৰ ষড়যন্ত্ৰত লিপ্ত হৈছে। আমি দীৰ্ঘদিন ধৰি চৰকাৰৰ ওচৰত মাদ্ৰাছাৰ সমস্যাসমূহ সমাধান কৰাৰ বাবে দাবী জনাই আহিছো যদিও আমাক প্ৰতাৰণা কৰি আহিছে,‘’ দেওবাৰে গুৱাহাটী প্ৰে’ছ ক্লাবত এক সংবাদমেলত এই অভিযোগ সন্থাৰ সভাপতি ওৱাহিদ্দুৰ জামানৰ।
ৰাজ্যৰ ৭০৭ খন মাদ্ৰাছাত ২০ বছৰ ধৰি খালী পদসমূহ কোনো নিযুক্তি নোহোৱা বুলি সদৰী কৰি শিক্ষকৰ অভাৱত মাদ্ৰাছাসমূহ ‘বন্ধ হোৱাৰ উপক্ৰম হৈছে’ বুলিও সন্থাই ক্ষোভ প্ৰকাশ কৰে।
“কোনো মাদ্ৰাছাত ৫ শতাধিক ছাত্ৰ-ছাত্ৰী থাকিলেও তাৰ বিপৰীতে আছে মাত্ৰ ২ বা ৩ জন শিক্ষক। গতিকে শিক্ষাৰ ক্ষেত্ৰত মাদ্ৰাছাৰ ছাত্ৰ-ছাত্ৰীৰ অগ্ৰগতি আমাৰ পৰিলক্ষিত হোৱা নাই,” জামানৰ দাবী।
কংগ্ৰেছ চৰকাৰৰ আমোলত ২০১৫ চনৰ জানুৱাৰিত শিক্ষা বিভাগে ৰাজ্যৰ প্ৰাদেশীকৃত মাদ্ৰাছাসমূহৰ বাবে নিয়োগৰ বিজ্ঞাপন প্ৰকাশ কৰাৰ পিছতো আজি পৰ্য্যন্ত ই কাৰ্য্যকৰী নহ’ল বুলিও সন্থাৰ সভাপতিজনে অভিযোগ কৰিছে।
আনহাতে শিক্ষকৰ প্ৰয়োজনীয়তা থকাৰ পিছতো মাদ্ৰাছা টেট উত্তীৰ্ণ ৰাজ্যৰ কেইবা হাজাৰ নিবনুৱাক চৰকাৰে নিযুক্তি দিয়া নাই বুলি অভিযোগ কৰে সন্থাৰ সাধাৰণ সম্পাদক আনোৱাৰ হুছেইনে।
হুছেইনে কয়, “মাদ্ৰাছা টেট উত্তীৰ্ণক সংস্থাপন দিম বুলি চৰকাৰে আশা দি আহিছিল যদিও সেয়া নিৰাশাৰ পথত গতি কৰিছে।’‘
নবেম্বৰৰ ভিতৰত মাদ্ৰাছাসমূহত শিক্ষক নিযুক্তিৰ লগতে অন্যান্য সমস্যাসমূহ সমাধান নকৰিলে পৰৱৰ্তী পৰ্য্যায়ত ব্যাপক আন্দোলন গঢ়ি তোলাৰ হুংকাৰ দিছে সংগঠনটোৱে।
মাদ্ৰাছা বিশ্ববিদ্যালয় স্থাপন, অপ্ৰাদেশীকৃত মাদ্ৰাছাসমূহ প্ৰাদেশীকৰণ কৰা আৰু মাদ্ৰাছা ব’ৰ্ডত এগৰাকী স্থায়ী সঞ্চালকক নিযুক্তি দিয়াৰো দাবী জনাইছে সংগঠনটোৱে।
ইফালে ছাত্ৰ সন্থাৰ অভিযোগসমূহৰ বিষয়ে অৱগত বুলি উল্লেখ কৰি মাদ্ৰাছা বন্ধৰ পৰিৱৰ্তে সমস্যাসমূহ সমাধানৰ বাবে পদক্ষেপ গ্ৰহণৰ আশ্বাস দিছে ৰাজ্যৰ শিক্ষা আয়ুক্ত সচিব প্ৰীতম শইকীয়াই।
“মই ঠিক কেনেকুৱা কি ব্যৱস্থা ল’ম সেইটো ক’ব নোৱাৰিম। কিন্তু কথাটো নোহোৱা নহয়, মই স্মাৰক পত্ৰ ইতিমধ্যে লাভ কৰিছো,” নৰ্থ ইষ্ট নাও-ক জনালে শইকীয়াই।
শইকীয়াই লগতে কয়, “নিশ্চয়কৈ আমি কিবা এটা কৰিব লাগিব। কিন্তু কেনেধৰণৰ পদক্ষেপ লোৱা হ’ব সেয়া ২-৩ দিনৰ পাছতহে আপোনাক ক’ব পাৰিম। শিক্ষা মন্ত্ৰীও কথাটো অৱগত। নিশ্চয় কিবা ব্যৱস্থা লোৱা হ’ব এইক্ষেত্ৰত।”
