মধ্যপ্ৰাচ্যৰ যুদ্ধ পৰিস্থিতিয়ে ইন্ধনৰ বজাৰত প্ৰভাৱ পেলাবলৈ আৰম্ভ কৰিছে। খাৰুৱা তেলৰ মূল্যৰ উপৰিও যোগান ব্যৱস্থাত অনিশ্চয়তা দেখা গৈছে। এনে পৰিস্থিতিত কেন্দ্ৰীয় চৰকাৰে ৰন্ধন গেছ বা এল পি জিৰ যোগানৰ সম্ভাৱ্য সংকট ৰোধ কৰিবলৈ এক কঠোৰ নিৰ্দেশনা জাৰি কৰিছে।
সংবাদ সংস্থাৰ সূত্ৰ অনুসৰি এল পি জি চিলিণ্ডাৰ বুকিং কৰাৰ নিয়মত বৃহৎ পৰিৱৰ্তন কৰা হৈছে। এতিয়াৰ পৰা দ্বিতীয়টো গেছ চিলিণ্ডাৰ বুকিং কৰিবলৈ কমেও ২৫ দিন অপেক্ষা কৰিব লাগিব। পূৰ্বে বুকিংৰ সময়সীমা আছিল ২১ দিন। চৰকাৰী সূত্ৰ অনুসৰি এই পদক্ষেপ মূলতঃ মজুতকৰণ আৰু ব্লেক মাৰ্কেটিং ৰোধৰ বাবে গ্ৰহণ কৰা হৈছে।
চৰকাৰী তথ্য অনুসৰি, য’ত আগতে সাধাৰণ মানুহে ৫০-৫৫ দিনৰ মূৰে মূৰে গেছ বুকিং কৰিছিল, এতিয়া বহুতে মাত্ৰ ১৫ দিনতে নতুন চিলিণ্ডাৰ বুকিং কৰিছে। ফলত যোগান ব্যৱস্থাৰ ওপৰত চাপ বাঢ়িছে। সেইবাবেই বুকিংৰ সময়সীমা বৃদ্ধি কৰাৰ সিদ্ধান্ত লোৱা হৈছে।
কেৱল বুকিং নিয়ম সলনি কৰাই নহয়, চৰকাৰে আন কিছুমান গুৰুত্বপূৰ্ণ নিৰ্দেশনাও দিছে।
চৰকাৰী সূত্ৰই লগতে জনাইছে যে এল পি জিৰ যোগান নিশ্চিত কৰিবলৈ নতুন আন্তঃৰাষ্ট্ৰীয় অংশীদাৰ বিচাৰি উলিওৱাৰ কাম চলি আছে। ইতিমধ্যে আলজেৰিয়া, অষ্ট্ৰেলিয়া, কানাডা, নৰৱেৰ দৰে কেইবাখনো দেশে ভাৰতক এল পি জি যোগান ধৰাৰ প্ৰস্তাৱ দিছে।
যুদ্ধৰ পৰিস্থিতিৰ বাবে বাণিজ্যিক গেছ যোগানৰ ওপৰত আটাইতকৈ বেছি হেঁচা পৰিছে। বিতৰকসকলে জনোৱা মতে, ইয়াৰ ফলত হোটেল, ৰেষ্টুৰেণ্টকে ধৰি কেইবাটাও ব্যৱসায়িক খণ্ডলৈ গেছ যোগানৰ ক্ষেত্ৰত সমস্যাৰ সৃষ্টি হৈছে।
অৱশ্যে ঘৰুৱা গেছৰ যোগান স্বাভাৱিক হৈ থকাটো নিশ্চিত কৰিবলৈ বিশেষ গুৰুত্ব দিয়া হৈছে বুলি চৰকাৰে দাবী কৰিছে। কিন্তু সাধাৰণ ৰাইজে সোনকালে বুকিং কৰাৰ প্ৰৱণতাৰ বাবে বিতৰকসকলৰ ওপৰত চাপ বাঢ়িছে বুলিও জনা গৈছে।
