শুকুৰবাৰে জনতা ভৱনত এক সংবাদমেল সম্বোধন কৰি ২ লাখ যুৱকক সামৰি এখন আঁচনিৰ আজিৰে পৰা কাৰ্য্যকৰী হোৱা বুলি সদৰী কৰে মন্ত্ৰী ড০ হিমন্ত বিশ্ব শৰ্মাই।
মন্ত্ৰীয়ে সংবাদমেলত জনোৱা অনুসৰি সংশোধিত বা পুনৰীজ্জীৱিত স্বয়ম অৰ্থাৎ স্বামী বিবেকানন্দ য়ুথ এমপাৱাৰমেন্ট যোজনা অনুসৰি অহা ৩ মাহত ৰাজ্য চৰকাৰে ১হাজাৰ কোটি টকা খৰচ কৰিব বিচাৰছে।
তেওঁ আৰু কয় ‘বেংকৰ ওপৰত নিৰ্ভৰ নকৰি ৰাজ্য চৰকাৰে পুঁজি পোনে পোনে মুকলি কৰি দিব। আঁচনি অনুসৰি ২ লাখ যুৱক-যুৱতীক ৫০ হাজাৰ টকাকৈ ছাবচিডি চিপ কেপিটেল দিয়া হ’ব।
এই ধন চৰকাৰক ঘূৰাই দিব নালাগে। প্ৰত্যেক বছৰেই এই আঁচনি চলি থাকিব।‘
১ ছেপ্টেম্বৰৰ আগতে আত্ম সহায়ক গোট বা জয়েন্ট ক্লাইভেলিটি গ্ৰুপত বা আন ধৰণৰ সামূহিক প্ৰচেষ্টা আৰম্ভ কৰা সকলক এই ধন দিয়া হ’ব বুলি শৰ্মাই জানিবলৈ দিয়ে।
‘যিবোৰে সামূহিকভাৱে কাম কৰিছে তেনে গ্ৰুপবোৰে এই ধন লাভ কৰিব। ১০ জনীয়া গ্ৰুপ হ’লে পাঁচ লাখ টকা, ২০ জনীয়া গ্ৰুপ হ’লে ১০ লাখ আৰু ৫ জনীয়া গ্ৰুপ হ’লে আঢ়ৈ লাখ দিয়া হ’ব। অৰ্থাৎ প্ৰতিজন ব্যক্তিৰ ভাগত ৫০ হাজাৰ টকাকৈ পৰিব।‘ মন্ত্ৰীয়ে সংবাদমেলত কয়।
ইয়াৰোপৰি, অহা ১৬ ছেপ্টেম্বৰত এটা পৰ্টেল আৰম্ভ কৰিব বিত্ত বিভাগে। সেই পৰ্টেলত বিভিন্ন গ্ৰুপবোৰে আবেদন কৰিব পাৰিব বুলি মন্ত্ৰীয়ে জনায়।
তেওঁ আৰু কয় ‘তাত গ্ৰুপটোৰ বেংক একাউণ্ট নম্বৰ আৰু সদস্যসকলৰো বেংক একাউণ্ট নম্বৰ দিব লাগিব। পূৰ্বতে এইটো উদ্যোগ বিভাগে চোৱা চিতা কৰিছিল এতিয়া বিত্ত বিভাগে পোনে পোনে নিৰীক্ষণ কৰিব জিলা উপায়ুক্তৰ সহায়ত।
যেতিয়া এই আৱেদন পূৰণ কৰিব তেতিয়া সেইখিনি জিলাসমূহলৈ প্ৰেৰণ কৰা হ’ব।‘
মন্ত্ৰীগৰাকীয়ে সংবাদমেলত স্পষ্ট কৰা অনুসৰি ‘কোনো ৰাজনৈতিক ব্যক্তি এই জিলা পৰ্যায়ৰ কমিটীত অন্তৰ্ভুক্ত হ’ব নোৱাৰিব।‘
আবেদন লাভ কৰাৰ পাছত তিনি দিনৰ বাবে চিনাক্ত হোৱা গ্ৰুপবোৰক প্ৰশিক্ষণ দিয়া হ’ব বুলি শৰ্মাই কয়।
তাৰপাছত ৰাজ্য চৰকাৰৰ যিকোনো বিভাগতে যুৱকসকলে এটা ব্যৱসায়ৰ আঁচনি দাখিল কৰিব পাৰিব।
প্ৰতিজন ব্যক্তিৰ ব্যক্তিগত একাউণ্টত টকা জমা কৰি দিয়া হ’ব যদিও গ্ৰুপত সভাপতি -সম্পাদকৰ হাতত প্ৰথমে ৩০ হাজাৰ টকা দিব লাগিব। যদি তেনে নকৰে তেন্তে পাছৰ ২০ হাজাৰ টকা লাভ নকৰিব বুলি মন্ত্ৰীয়ে জনায়।
মন্ত্ৰীয়ে লগতে কয় ‘তেওঁলোকক ৰাজ্য চৰকাৰৰ যিকোনো বিভাগৰ বাবে বিনামূলীয়া কনট্ৰেকটিঙৰ লাইচেন্স দিয়া হ’ব।‘
এই গ্ৰুপটোৰ সদস্যসকলে কমেও মেট্ৰিক পাছ কৰিব লাগিব আৰু বয়সৰ সীমা ৪০ বছৰ হ’ব বুলি মন্ত্ৰীয়ে জনায়।
ইয়াৰোপৰি, হিতাধিকাৰী যুৱক যুৱতীৰ বেংক একাউন্ট চলিত বৰ্ষৰ ১ এচেপ্তেম্বৰলকৈ এক বছৰ পুৰণি হ’ব লাগিব।
গড়কপ্তানি বিভাগৰ যি তৃতীয় পৰ্য্যায়ৰ কাম আছে সেইখিনি এই গ্ৰুপ বিলাকেই লাভ কৰিব বুলি তেওঁ কয়।
গুৱাহাটী উচ্চ ন্যায়ালয়ে কোভিদক লৈ যথেষ্ট চিন্তা-চৰ্চা কৰিছে। কেন্দ্ৰীয় চৰকাৰৰ গাইডলাইন অনুসৰি ৰাজ্য চৰকাৰে কোনো লকডাউন দিব নোৱাৰে। কেন্দ্ৰীয় চৰকাৰৰ অনুমতি লৈহে লকডাউন দিব পাৰিব।
গতিকে মাস্ক আৰু সামাজিক দুৰত্বৰ বাহিৰে বেলেগ অস্ত্ৰ নাই।
গুৱাহাটী উচ্চ ন্যায়ালয়ে মাস্ক নিপিন্ধিলে ৫০০ টকা ফাইন লোৱাটো বাধ্যতামূলক কৰিব লাগে বুলি কৈছে।
দুখীয়া মানুহক বিনামূলীয়া মাস্ক বিতৰণ কৰিব পাৰি নেকি চিন্তা চৰ্চা কৰি থকা হৈছে বুলি তেওঁ কয়।
