গুৱাহাটী বিশ্ববিদ্যালয়ত ২০১৮-১৯ বৰ্ষৰ পূব মণ্ডল মহিলা বাস্কেটবল প্ৰতিযোগিতা অনুষ্ঠিত কৰিবলৈ লোৱা হৈছে। নতুন দিল্লীৰ ভাৰতীয় বিশ্ববিদালয় সন্থাৰ পৃষ্ঠপোষকতাত এই প্ৰতিযোগিতা অনুষ্ঠিত কৰা হ’ব।
গুৱাহাটী বিশ্ববিদ্যালয়ৰ চৌহদত চলিত বৰ্ষৰ নৱেম্বৰৰ ৯ তাৰিখৰ পৰা ১১ নৱেম্বৰলৈ এই প্ৰতিযোগিতা অনুষ্ঠিত কৰা হ’ব। এই প্ৰতিযোগিতাত ভাৰতৰ ৩৬খন বিশ্ববিদ্যালয়ে অংশগ্ৰহণ কৰিব। উক্ত প্ৰতিযোগিতাত যোগদান কৰা মুঠ ৭০টা দলত সৰ্বমুঠ ৪৫০গৰাকী বাস্কেটবল খেলুৱৈয়ে (cagers) অংশগ্ৰহণ কৰিব।
গুৱাহাটী বিশ্ববিদ্যালয়ৰ শিক্ষাৰ্থী কল্যাণ সঞ্চালক ড০ ৰঞ্জন কুমাৰ কাকতীয়ে এটা সংবাদ বিজ্ঞপ্তিযোগে জনাইছে যে গুৱাহাটী বিশ্ববিদ্যালয়ে খেলুৱৈসকলক আদৰিবলৈ সাজু হৈ আছে আৰু প্ৰতিযোগিতাখন মসৃণভাৱে অনুষ্ঠিত কৰাৰ প্ৰস্তুতি সম্পূৰ্ণ চলাই আছে।
বিশ্ববিদ্যালয়খনৰ উপাচাৰ্য ড০ মৃদুল হাজৰিকা আৰু বিশ্ববিদ্যালয় কৰ্তৃপক্ষ, ফেকাল্টী মেম্বাৰ, কৰ্মচাৰী আৰু স্নাতকোত্তৰ ছাত্ৰ সন্থাৰ (PGSU) সদস্যসকলে এই প্ৰতিযোগিতাখনৰ সফলতাৰ বাবে সম্পূৰ্ণ সমৰ্থন আগবঢ়াইছে।
উল্লেখ্য যে এই প্ৰথম বাৰৰ বাবে ভাৰতীয় বিশ্ববিদালয় সন্থাৰ পৃষ্ঠপোষকতাত অনুষ্ঠিত এই প্ৰতিযোগিতা গুৱাহাটী বিশ্ববিদ্যালয়ৰ চৌহদত অনুষ্ঠিত কৰা হ’ব।
ঘাইকৈ উত্তৰ-পূৰ্বাঞ্চলৰ বাস্কেটবল খেলুৱৈসকল তথা ক্ৰীড়াপ্ৰেমীসকলক অনুপ্ৰাণিত কৰিবলৈ এই প্ৰতিযোগিতাৰ আয়োজন কৰা হৈছে। গুৱাহাটী বিশ্ববিদ্যালয় ক্ৰীড়া পৰিষদে এনে ধৰণৰ ৰাষ্ট্ৰীয় পৰ্যায়ৰ প্ৰতিযোগিতা অনুষ্ঠিত কৰি শিক্ষাৰ্থীসকলৰ মাজত ক্ৰীড়াক উদগণি দিবলৈ প্ৰচেষ্টা চলাই আহিছে।
উল্লেখ্য যে অক্টোবৰৰ অন্তিম সপ্তাহত গুৱাহাটী বিশ্ববিদ্যালয়ৰ চৌহদত বৰ্ষৰ পূব মণ্ডল (পুৰুষ) বেডমিণ্টন প্ৰতিযোগিতা সফলতাৰে অনুষ্ঠিত কৰাৰ এমাহৰ ভিতৰতে এনে ধৰণৰ দ্বিতীয়খন ৰাষ্ট্ৰীয় পৰ্যায়ৰ প্ৰতিযোগিতা অনুষ্ঠিত কৰিবলৈ আগবঢ়া হৈছে।
প্ৰতিযোগিতাৰ আৰম্ভণিৰ দিনা গুৱাহাটী বিশ্ববিদ্যালয়ৰ ক্ৰীড়া চৌহদত পুৱা ৯-৩০ বজাত উদ্বোধনী অনুষ্ঠানৰ আয়োজন কৰা হৈছে আৰু এই অনুষ্ঠানত গুৱাহাটী বিশ্ববিদ্যালয়ৰ সমূহ পৰিয়ালবৰ্গত অংশগ্ৰহণ কৰাৰ বাবে আমন্ত্ৰণ জনোৱা হৈছে।
