থলুৱা উদ্যোগ খণ্ডক শক্তিশালী আৰু সুসংগঠিত ৰূপত বিশ্ব দৰবাৰত প্ৰতিষ্ঠা কৰাৰ লক্ষ্যৰে গুৱাহাটী বিশ্ববিদ্যালয়ত এক বিশেষ কাৰ্যসূচী আৰম্ভ হৈছে। উদীয়মান উদ্যোগপতি, ষ্টাৰ্টআপ আৰু নতুন চিন্তাধাৰাক সুযোগ প্ৰদানৰ লগতে সঠিক দিশ-নিৰ্দেশনা আগবঢ়োৱাৰ উদ্দেশ্যে বিশ্ববিদ্যালয়খনৰ ‘Innovation, Incubation and Startup Cell’ (IIS) ৰ উদ্যোগত সোমবাৰৰ পৰা দুদিনীয়াকৈ ‘GUenARK 2026’ শীৰ্ষক অনুষ্ঠানটিৰ আয়োজন কৰা হৈছে।
উদ্বোধনী ভাষণত গুৱাহাটী বিশ্ববিদ্যালয়ৰ উপাচাৰ্য অধ্যাপক ননী গোপাল মহন্তই উদ্ভাৱন, উদ্যোগশীলতা আৰু আত্মবিশ্বাসৰ ওপৰত আলোকপাত কৰে। তেওঁ উল্লেখ কৰে যে অসমৰ থলুৱা প্ৰতিভা আৰু উদ্ভাৱনী চিন্তাক সঠিক দিশ-নিৰ্দেশনা তথা এক উপযুক্ত মঞ্চ প্ৰদান কৰিব পাৰিলে ৰাজ্যখন উদ্যোগ-উদ্ভাৱনৰ এক শক্তিশালী কেন্দ্ৰ হিচাপে গঢ় লৈ উঠিব। ‘GUenARK 2026’ৰ দৰে পদক্ষেপে অসমৰ যুৱসমাজক আত্মবিশ্বাসী কৰি তোলাৰ লগতে থলুৱা উদ্যোগসমূহক বিশ্ব দৰবাৰত প্ৰতিষ্ঠা কৰাৰ পথ প্ৰশস্ত কৰিছে বুলি তেওঁ মত প্ৰকাশ কৰে।
অনুষ্ঠানত মুখ্য অতিথি হিচাপে উপস্থিত থাকি আই.এ.এছ. ড০ জীৱন বি (সচিব, উদ্ভাৱন আৰু ষ্টাৰ্টআপ বিভাগ)-এ উদ্যোগ খণ্ডৰ বিভিন্ন দিশত গুৰুত্ব আৰোপ কৰে। তেওঁৰ মতে, উদ্ভাৱনেই হৈছে আগন্তুক ভৱিষ্যতৰ পথ-প্ৰদৰ্শক। সঠিক নীতি, আধুনিক প্ৰযুক্তি আৰু প্ৰতিষ্ঠানিক সহায় লাভ কৰিলে অসমৰ যুৱ ব্যৱসায়ীসকলে নিজৰ ধাৰণা আৰু সপোনক বাস্তৱায়িত কৰিব পাৰিব বুলি তেওঁ কয়। লগতে তেওঁ উল্লেখ কৰে যে এই অনুষ্ঠানে শিক্ষানুষ্ঠান, চৰকাৰ আৰু উদ্যোগ জগতৰ মাজত সংযোগ স্থাপন কৰি থলুৱা উদ্যোগসমূহক ৰাষ্ট্ৰীয় আৰু বিশ্ব পৰিসৰত আগুৱাই নিয়াৰ বাবে এক শক্তিশালী ভিত্তি গঢ়ি তুলিব।
এই অনুষ্ঠানৰ বিভিন্ন কাৰ্যসূচীৰ ভিতৰত আইডিয়াথন(Ideathon)ত ৩৫ টা দল, হেকাথন (Hackathon)ত ৪০ টা দল আৰু ষ্টাৰ্টআপ শ্ব’কেচ (Startup Showcase)ত ৭৩ টা ষ্টাৰ্টআপে অংশগ্ৰহণ কৰিছে। শিক্ষাৰ্থী, উদ্ভাৱক আৰু ষ্টাৰ্টআপ প্ৰতিষ্ঠাপকসহ ১৫০০-তকৈ অধিক ব্যক্তিয়ে এই সমাৱেশত অংশ লৈছে।
উক্ত অনুষ্ঠানত সন্মানীয় অতিথিৰূপে ৰুৰেল ইনকিউবেচনৰ উপ-সভাপতি শ্ৰী সুবিৰ সিনহা উপস্থিত থাকে। ইয়াৰ উপৰি আই.আই.এছ.-ৰ অধ্যক্ষ অধ্যাপক ৰাতুল মহন্ত, বাণিজ্য আৰু ব্যৱস্থাপনা শাখাৰ ডীন অধ্যাপক প্ৰশান্ত শৰ্মা, বিজ্ঞান শাখাৰ ডীন অধ্যাপক কুমানন্দ টায়ুং সমন্বিতে বহু বিশিষ্ট ব্যক্তি, গৱেষক শিক্ষাৰ্থী আৰু ছাত্ৰ-ছাত্ৰী অনুষ্ঠানত উপস্থিত থাকে।
