গুজৰাট উচ্চ ন্যায়ালয়ে গুজৰাট ৰাজ্য চৰকাৰ মন্ত্ৰী ভূপেন্দ্ৰ সিংহ চুদাসামাৰ বিধান সভাৰ সদস্য পদ অবৈধ বুলি ঘোষণা কৰাৰ পিছত গুজৰাট কংগ্ৰেছে প্ৰতিক্ৰিয়া প্ৰকাশ কৰিছে।
উল্লেখ্য যে যোৱা বুধবাৰে গুজৰাট চৰকাৰৰ মন্ত্ৰী চুদাসামাই নিৰ্বাচনত ক্ষমতাৰ অপব্যৱহাৰ কৰি জয়ী হৈছিল বুলি প্ৰমাণিত হোৱাৰ পিছত ন্যায়ালয়ে তেওঁৰ সদস্য পদক অবৈধ বুলি ঘোষণা কৰে।
ইয়াৰ পিছতে গুজৰাট ৰাজ্যিক কংগ্ৰেছে চুদাসামাই প্ৰতিনিধিত্ব কৰা ধ’লকা বিধান সভা আসনখন শূণ্য বুলি ঘোষণা কৰিবলৈ বিধান সভাৰ অধ্যক্ষলৈ পত্ৰ প্ৰেৰণ কৰি দাবী জনাইছে।
ন্যায়ালয়ৰ ৰায়ৰ পিছতে বিৰোধী দলপতি পৰেশ ধানানিয়ে বুধবাৰে বিধান সভাৰ অধ্যক্ষলৈ প্ৰেৰণ কৰা পত্ৰত কৈছে যে অতি শীঘ্ৰেই উক্ত আসনখন খালী বুলি ঘোষণা কৰিব লাগে।
তেওঁ লিখিছে যে উচ্চ ন্যায়ালয়ে চুদাসামাৰ স্থগিত ৰখাৰ আবেদন খাৰিজ কৰাৰ পিছত আসনখন শূণ্য বুলি ঘোষণা নকৰিলে ন্যায়ালয়ৰ নিৰ্দেশক অমান্য কৰা হ’ব।
উল্লেখ্য যে যোৱা ২০১৭ চনৰ গুজৰাট বিধান সভাৰ নিৰ্বাচনত আহমদাবাদ জিলাৰ ধ’লকা বিধান সভা সমষ্টিৰ কংগ্ৰেছ প্ৰাৰ্থী অশ্বিন ৰাথোড়ক ৩২৭ ভোটত পৰাস্ত কৰি চুদাসামাক বিজয়ী বুলি ঘোষণা কৰা হৈছিল।
এই ফলাফলত চুদাসামাই ক্ষমতা অপব্যৱহাৰ কৰাৰ অভিযোগ তুলি কংগ্ৰেছ প্ৰাৰ্থীগৰাকী উচ্চ ন্যায়ালয়ৰ দাৰস্থ হৈছিল। ইতিমধ্যে ন্যায়ালয়ে কংগ্ৰেছ প্ৰাৰ্থীগৰাকীৰ সপক্ষে ৰায়দান কৰিছে।
“উচ্চ ন্যায়ালয়ৰ আদেশৰ ভিত্তিত গুজৰাটৰ ধ’লকা বিধান সভাৰ আসনখন কোনো বিলম্ব নকৰাকৈ শূণ্য বুলি ঘোষণা কৰিবলৈ আপোনাক অনুৰোধ জনালো। কাৰণ ন্যায়ালয়ে ইতিমধ্যে চুদাসামাৰ স্থগিত ৰখাৰ আবেদন খাৰিজ কৰিছে আৰু তাৎক্ষণিকভাৱে ন্যায়ালয়ৰ আদেশ কাৰ্যকৰী কৰিব লাগে।” বিৰোধী দলপতি গৰাকীয়ে পত্ৰখনত এইদৰে কয়।
চুদাসামাই বৰ্তমান বিজয় ৰূপানী গুজৰাট চৰকাৰৰ মন্ত্ৰীসভাৰ শিক্ষা, আইন আৰু ন্যায়, সংসদীয় পৰিক্ৰমা আদি কেবাটাও দপ্তৰৰ দায়িত্বত আছে।