বাতৰি মতে এগৰাকী “বন্দুকধাৰী”ৰ অপহৰণৰ ফলত এখন যাত্ৰীবাহী বিমানে জৰুৰী অৱতৰণ কৰিছে।
দে’ইলি স্তাৰ-ৰ বাতৰি মতে, সন্দেহযুক্ত ব্যক্তিজনে বিমানখনৰ এজন কেবিন ক্ৰু সদস্যক অভিযোগমতে গুলী চলাইছিল আৰু ডুবাই অভিমুখী বিমান বাংলাদেশ এয়েৰলাইনছ বিমানখনৰ ককপিতত প্ৰৱেশৰ চেষ্টা চলাইছিল।
অৱশ্যে পাইলটজনে বাংলাদেশৰ চিতাগংস্থিত শ্বাহ আমানত আন্তঃৰাষ্ট্ৰীয় বিমান বন্দৰত জৰুৰী অৱতৰণ কৰিবলৈ সক্ষম হৈছে।
বাতৰিটোত প্ৰকাশ, ডুবাইলৈ চিতাগং হৈ ঢাকাৰ পৰা গৈ থকা বিমানখনে শ্বাহ আমানত আন্তঃৰাষ্ট্ৰীয় বিমান বন্দৰত ইউ কে’ৰ দুপৰীয়াৰ সময়ৰ ঠিক পূৰ্বে (বাংলাদেশৰ সময় আবেলি ৫:৪০) অৱতৰণ কৰে।
এইটোও প্ৰকাশিত হৈছে যে বিমানখন (বিজি ১৪৭)ৰ সকলো যাত্ৰীয়েই নামি আহিছে, কিন্তু অভিযুক্ত বন্দুকধাৰীজনৰ লগতে দুজন ক্ৰু সদস্য এতিয়াও বিমানখনতে আছে।
ঢাকাৰ হজৰত শ্বাহজালাল আন্তঃৰাষ্ট্ৰীয় বিমান বন্দৰৰ পৰা উৰণৰ পিছতে এজন বন্দুকধাৰীয়ে ককপিত নিয়ন্ত্ৰণ কৰিব খুজিছিল বুলি নাম প্ৰকাশ নকৰাৰ চৰ্তত বিমান বন্দৰৰ এজন বিষয়াৰ উদ্ধৃতিৰে ঢাকা ত্ৰিবিউন-এ এটা বাতৰি প্ৰকাশ কৰিছে।
আনহাতে বিমান বাংলাদেশৰ বিমানবন্দৰৰ ষ্টে’চন মেনে’জাৰ মহফুজুল আলমে বিদিনিউজ২৪.কম-ক নিশ্চিত কৰিছে যে বিমানখন অপহৰণ কৰা হৈছিল, কিন্তু তেওঁ অধিক মন্তব্য কৰিবলৈ অস্বীকাৰ কৰিছে।
আৰক্ষী, ৰেপিদ এক্সন বেতেলিয়ন আৰু সশস্ত্ৰ আৰক্ষী বেতেলিয়নে, বাতৰি মতে, এলেকাটো অৱৰোধ কৰিছে আৰু ৰানৱে’ত বিমানখন ঘেৰি ৰাখিছে। বিমানবন্দৰটোৰ কাম-কাজ বাতিল কৰা হৈছে।
বিমানখনতে থকা চিতাগং ৮ৰ সাংসদ আৰু জাতীয় সমাজতান্ত্ৰিক দলৰ গোটৰ নেতা মইন উদ্দিন বাদলে সময় টিভি-ক কয় যে বন্দুকধাৰীজনে গুলীচালনা কৰিছিল।
