ৰাষ্ট্ৰীয় আৰু আঞ্চলিক চিনেমাৰ স্বকীয়তা তথা উৎকৃষ্টতাক উদযাপন কৰি শেহতীয়াকৈ দ্বিতীয় গুৱাহাটী এছিয়ান ফিল্ম ফেষ্টিভেল (GAFF) ২০২৬ সম্পন্ন হৈ যায়। ১০ খন দেশৰ নিৰ্বাচিত ২৬ খন ছবিৰ প্ৰদৰ্শনেৰে মুখৰিত এই মহোৎসৱত বিশিষ্ট অভিনেতা বিষ্ণু খাৰঘৰীয়াক ‘জীৱনজোৰা সাধনা বঁটা’ৰে সন্মানিত কৰাৰ লগতে মালায়ালম ছবি ‘ভিক্টোৰিয়া’ক শ্ৰেষ্ঠ ছবিৰ বঁটা প্ৰদান কৰা হয়।
মহোৎসৱৰ অংশ হিচাপে আয়োজিত ‘ইণ্ডিয়ান শ্ব’কেচ এৱাৰ্ডছ’ত চলচ্চিত্ৰ নিৰ্মাণৰ উৎকৃষ্টতা, বৈচিত্ৰ্য আৰু কাহিনী কথনৰ গভীৰতাক প্ৰতিফলিত কৰা চলচ্চিত্ৰ নিৰ্মাতা তথা শিল্পীসকলক স্বীকৃতি প্ৰদান কৰা হয়। শিৱৰঞ্জিনীৰ দ্বাৰা পৰিচালিত মালায়ালম ছবি ‘ভিক্টোৰিয়া’ক ইয়াৰ আকৰ্ষণীয় কাহিনী আৰু শক্তিশালী দৃশ্যশৈলীৰ বাবে শ্ৰেষ্ঠ ছবিৰ বঁটা প্ৰদান কৰা হয়। ইয়াৰ উপৰিও, ছবিখনৰ চিনেমেট’গ্ৰাফাৰ আনন্দ ৰবিক তেওঁৰ ব্যতিক্ৰমী চিনেমেট’গ্ৰাফীৰ বাবে বিচাৰকৰ বিশেষ সন্মান আগবঢ়োৱা হয়।
আনহাতে, ত্ৰিবেণী ৰায়ৰ নেপালী ছবি ‘শ্বেপ অৱ মম’-ক সংবেদনশীল কাহিনী কথনৰ বাবে দ্বিতীয় শ্ৰেষ্ঠ ছবিৰ বঁটা প্ৰদান কৰা হয়। উত্তৰ-পূৰ্বাঞ্চলৰ আঞ্চলিক চিনেমাক প্ৰাধান্য দি পংকজ বৰাৰ দ্বাৰা পৰিচালিত অসমীয়া ছবি ‘নৈ কথা’ ক ‘এন ই স্পটলাইট’ (NE Spotlight) বঁটা প্ৰদান কৰা হয়।
জি এ এফ এফ-ৰ মহোৎসৱ সঞ্চালক মনিতা বৰগোহাঁইয়ে এই সন্দৰ্ভত কয় যে এই বঁটাসমূহে সাহসী কাহিনী কথন আৰু আঞ্চলিক বৈচিত্ৰ্যক উদযাপন কৰিছে। শক্তিশালী কাহিনীসমূহে বিভিন্ন সাংস্কৃতিক পটভূমিৰ পৰা আহিও কেনেকৈ বিশ্বজনীন আবেদন লাভ কৰিব পাৰে, বিজয়ী ছবিসমূহে তাকেই প্ৰমাণ কৰিছে বুলি তেওঁ মন্তব্য কৰে।
বিশিষ্ট চলচ্চিত্ৰ নিৰ্মাতা গিৰীশ কাচাৰাৱলীৰ অধ্যক্ষতাত গঠিত বিচাৰক মণ্ডলীত উৎপল বৰপূজাৰী আৰু অনুপমা বসুৱেও সদস্য হিচাপে সেৱা আগবঢ়ায়। ট্ৰেণ্ডিং নাও মিডিয়াৰ দ্বাৰা আয়োজিত এই দ্বিতীয় সংস্কৰণটো ৰাষ্ট্ৰীয় চলচ্চিত্ৰ উন্নয়ন নিগম (NFDC) আৰু ভাৰত চৰকাৰৰ তথ্য আৰু সম্প্ৰচাৰ মন্ত্ৰালয়ৰ সহযোগত অনুষ্ঠিত হয়।
প্ৰতিষ্ঠিত প্ৰতিভাৰ লগতে উদীয়মান চলচ্চিত্ৰ নিৰ্মাতাসকলক এখন মঞ্চ প্ৰদানৰ লক্ষ্যৰে আয়োজিত এই মহোৎসৱতে জ্যেষ্ঠ অভিনেতা বিষ্ণু খাৰঘৰীয়াক ভাৰতীয় চিনেমাৰ প্ৰতি আগবঢ়োৱা অসাধাৰণ অৱদানৰ বাবে ‘জীৱনজোৰা সাধনা বঁটা’ প্ৰদান কৰা হয়।
