আজি মালিগাঁৱৰ ভৰলুমুখৰ ৮ নং গেটৰ সমীপৰ এটা আৱাসিক ভৱনত এক বৃহৎ অগ্নিকাণ্ড সংঘটিত হয়। ক’লা ধোঁৱাই চৌপাশ আবৰি ধৰাত স্থানীয় ৰাইজৰ মাজত আতংকৰ সৃষ্টি হয়।
জানিব পৰামতে অগ্নিকাণ্ডটো ভৱনটোৰ তৃতীয় মহলাৰ পৰা সংঘটিত হৈছিল। প্ৰথমতে তাঁৰবোৰত শ্বৰ্ট চাৰ্কিটৰ ফলত অগ্নিকাণ্ড হৈছিল বুলি অনুমান কৰা হৈছিল যদিও, শেহতীয়া খবৰ অনুসৰি তাত থকা এটা ঘৰত গেছ চিলিণ্ডাৰ বিস্ফোৰণৰ ফলতহে এই অগ্নিকাণ্ড সংঘটিত হৈছিল। সূত্ৰ অনুসৰি, সেই সময়ত দম্পতীহালৰ কন্যাৰ বাবে এটা সৰু জন্মদিনৰ পাৰ্টি চলি আছিল। জুইৰ শিখা দেখা পোৱাৰ পিছত মানুহে জোৰেৰে বিস্ফোৰণৰ শব্দ শুনে আৰু ধোঁৱাই সকলো আবৰি ধৰে।
খবৰ পোৱাৰ পিছতে অগ্নিনিৰ্বাপক বাহিনীৰ গাড়ী ততাতৈয়াকৈ সেই স্থানত উপস্থিত হয়। অগ্নিনিৰ্বাপক বাহিনীয়ে ঘটনাস্থলীৰ পৰা আৱদ্ধ হৈ থকা দুজন লোকক উদ্ধাৰ কৰে।
অগ্নিকাণ্ডত গুৰুতৰভাৱে আঘাতপ্ৰাপ্ত দেৱ চৌধুৰী (৪৭) আৰু তেওঁৰ পত্নী পম্পী চৌধুৰী (৩৬) ক জৰুৰী চিকিৎসাৰ বাবে গুৱাহাটী চিকিৎসা মহাবিদ্যালয় আৰু চিকিৎসালয়লৈ (GMCH) লৈ যোৱা হৈছিল। দুখৰ বিষয় যে গুৰুতৰভাৱে আঘাতপ্ৰাপ্ত হোৱাৰ ফলত চিকিৎসালয়ত দুয়োৰে মৃত্যু হয়।
আৰক্ষী আৰু বিষয়াসকলে ঘটনা সন্দৰ্ভত তদন্ত অব্যাহত ৰাখিছে। তদন্তৰ অন্ততহে সঠিকভাৱে কিহৰ পৰা অগ্নিকাণ্ড সংঘটিত হ‘ল সেই বিষয়ে জানিব পৰা যাব।
