অসমৰ মুখ্যমন্ত্ৰীৰ অতি ঘনিষ্ঠ বুলি ভুৱা পৰিচয় দি অৰুণাচল প্ৰদেশৰ এজন ব্যৱসায়ীক বৃহৎ পৰিমাণৰ ধন প্ৰতাৰণা কৰা গুৱাহাটীৰ ব্যৱসায়ী ঋষিৰাজ বৰকটকী অৱশেষত অৰুণাচল আৰক্ষীৰ জালত পৰিছে। অভিযুক্ত ব্যৱসায়ীজনে নিজকে এগৰাকী প্ৰভাৱশালী ব্যক্তি হিচাপে প্ৰতিষ্ঠা কৰি অসমত এটা ভুৱা ইথানল উৎপাদন প্ৰকল্প স্থাপন কৰাৰ নামত অৰুণাচল প্ৰদেশৰ ব্যৱসায়ী ৰাজেশ আগৰৱালক প্ৰলোভন দিছিল। এই প্ৰকল্পত বিনিয়োগ কৰিলে বৃহৎ লাভ হ’ব বুলি সপোন দেখুৱাই যোৱা প্ৰায় চাৰি বছৰত তেওঁ ব্যৱসায়ীজনৰ পৰা ৩৪ কোটিতকৈও অধিক টকা লুটি লৈছিল। ইয়াৰ পিছতে ভুক্তভোগী ব্যৱসায়ীজনে অৰুণাচল প্ৰদেশৰ বান্দৰদেৱা থানাত যোৱা ৫ জুনত এখন লিখিত এজাহাৰ দাখিল কৰে। এজাহাৰ দাখিল হোৱাৰ মাত্ৰ চৈধ্য দিনৰ ভিতৰতে অৰুণাচল আৰক্ষীয়ে গোচৰটোৰ মূল অভিযুক্ত ঋষিৰাজ বৰকটকীক গ্ৰেপ্তাৰ কৰিবলৈ সক্ষম হয়।
আৰক্ষীৰ সূত্ৰই প্ৰকাশ কৰা অনুসৰি যোৱা ২০ জুনত গুৱাহাটীৰ পৰা ঋষিৰাজ বৰকটকীক গ্ৰেপ্তাৰ কৰা হয়। সোমবাৰে এই সন্দৰ্ভত নাহৰলগুনৰ আৰক্ষী অধীক্ষক নিয়েলাম নেগাই জানিবলৈ দিয়ে যে অভিযুক্তজনে অৰুণাচলৰ ব্যৱসায়ীজনক প্ৰতাৰণা কৰিবলৈ বিভিন্ন ধৰণৰ প্ৰভাৱশালী জাল পেলাইছিল। তেওঁ নিজৰ ফেচবুক প্ৰফাইলত অসম চৰকাৰৰ মুখ্যমন্ত্ৰীৰ বিশেষ কৰ্তব্যৰত বিষয়াৰ পৰা আৰম্ভ কৰি ৰাজ্যখনৰ বহুকেইগৰাকী নাম থকা বিশিষ্ট ব্যক্তি ক্ৰমে শ্যাম কানু মহন্ত, সঞ্জীৱ নাৰায়ণ আৰু ডক্টৰ ননী গোপাল মহন্ত আদিৰ সৈতে থকা ফটো প্ৰদৰ্শন কৰি নিজৰ প্ৰভাৱ বিস্তাৰ কৰিছিল। বিলাসী গাড়ী আৰু দামী ফোন ব্যৱহাৰ কৰা ঋষিৰাজে নিজকে মুখ্যমন্ত্ৰীৰ ইমানেই ঘনিষ্ঠ বুলি দেখুৱাইছিল যে তেওঁ চৰকাৰী অনুমোদনসমূহ অতি সহজে লাভ কৰাই দিব পাৰিব বুলি বিশ্বাস জন্মাইছিল।
আৰক্ষীৰ অনুসন্ধানত পোহৰলৈ আহিছে যে এই প্ৰতাৰণাৰ জালখন অধিক বিশ্বাসযোগ্য কৰিবলৈ ঋষিৰাজে কেন্দ্ৰীয় বিত্ত মন্ত্ৰালয়ৰ নামতো ভুৱা নথিপত্ৰ প্ৰস্তুত কৰি ব্যৱহাৰ কৰিছিল। আনকি তেওঁ মুখ্যমন্ত্ৰীৰ সৈতে বাৰ্তালাপ হোৱা বুলি দাবী কৰা ভুৱা মেছেজ দেখুৱাইছিল আৰু ফোনযোগেও কথোপকথনৰ ব্যৱস্থা কৰি দিছিল। তদন্তকাৰী বিষয়াসকলে সন্দেহ প্ৰকাশ কৰিছে যে ভুক্তভোগী ব্যৱসায়ীজনক শুনোৱা মুখ্যমন্ত্ৰীৰ ফোন কলসমূহত কৃত্ৰিম বুদ্ধিমত্তা অৰ্থাৎ এআই প্ৰযুক্তিৰ জৰিয়তে সৃষ্টি কৰা নকল কণ্ঠস্বৰ ব্যৱহাৰ কৰা হৈছিল। অভিযানৰ সময়ত আৰক্ষীয়ে অভিযুক্তজনৰ পৰা এখন বিলাসী মাৰ্চিডিজ বেঞ্জ গাড়ী, পাঁচটাকৈ ম’বাইল ফোন আৰু আন বহুতো গুৰুত্বপূৰ্ণ সামগ্ৰী জব্দ কৰে। ইয়াৰে এটা ম’বাইল ফোন মুখ্যমন্ত্ৰীৰ কণ্ঠস্বৰ নকল কৰি ভুৱা ফোন কল কৰাৰ বাবে ব্যৱহাৰ কৰা হৈছিল বুলি সন্দেহ কৰা হৈছে আৰু বৰ্তমান ফোনটো ফৰেনছিক পৰীক্ষাৰ বাবে প্ৰেৰণ কৰা হৈছে। গ্ৰেপ্তাৰ কৰা ঋষিৰাজ বৰকটকীক স্থানীয় আদালতত হাজিৰ কৰোৱাৰ পিছত আদালতে তেওঁক দহ দিনৰ বাবে আৰক্ষীৰ জিম্মালৈ প্ৰেৰণ কৰিছে।
