গুৱাহাটী মহানগৰীত খোৱাপানী সমস্যাই এক জটিল সমস্যা হিচাপে দেখা দি আহিছে। বিশেষকৈ মাৰ্চ, এপ্ৰিল আৰু মে’ মাহত মহানগৰীত খোৱাপানীৰ যথেষ্ট হাহাকাৰ অৱস্থাৰ সৃষ্টি হয়। কিন্তু চৰকাৰী পানী যোগান ব্যৱস্থাই এতিয়াও গুৱাহাটীৰ আধাতকৈও অধিক মানুহক খোৱাপানী যোগান ধৰিব পৰা নাই।
উল্লেখযোগ্য যে বৰ্তমানৰ জনসংখ্যা অনুযায়ী গুৱাহাটীত দৈনিক ৩২৮.৮৬ নিযুত লিটাৰ খোৱাপানীৰ প্ৰয়োজন। কিন্তু খোৱাপানীৰ যোগান ধৰি অহা তিনিটাকৈ চৰকাৰী বিভাগ ক্ৰমে গুৱাহটী পৌৰ নিগম, জনস্বাস্থ্য কাৰিকৰী বিভাগ আৰু গুৱাহাটী মহানগৰ পানী যোগান আৰু অনাময় পৰিষদে ইয়াৰে মাত্ৰ ৭২.৪০ নিযুত লিটাৰ পানীহে যোগান ধৰিবলৈ সক্ষম হয়।
অৰ্থাৎ মহানগৰীখনত দৈনিক ২৫৬.৪৬ নিযুত লিটাৰ খোৱাপানীৰ অভাৱ থাকে।
চৰকাৰী তথ্য মতে, গুৱাহাটী পৌৰ নিগমে দৈনিক ৪১.২৫ নিযুত লিটাৰ পানী যোগান ধৰাৰ বিপৰীতে জনস্বাস্থ্য কাৰিকৰী বিভাগে দৈনিক ২৩.৬৫ নিযুত লিটাৰ আৰু গুৱাহাটী মহানগৰ পানী যোগান আৰু অনাময় পৰিষদে ৭.৫০ নিযুত লিটাৰ খোৱাপানী যোগান ধৰে।
গুৱাহাটী পৌৰ নিগমৰ অধীনত পানবজাৰ, খাৰঘুলিৰ সাতপুখুৰী আৰু কামাখ্যাত থকা ৩টা পানী যোগান প্ৰকল্পৰ জৰিয়তে ক্ৰমে ২২.৫০, ১৫.৭৫ আৰু ৩ নিযুত লিটাৰ খোৱাপানী যোগান ধৰা হয়।
আনহাতে গুৱাহাটী মহানগৰ পানী যোগান আৰু অনাময় পৰিষদৰ অধীনৰ জুৰোড পানী যোগান প্ৰকল্পৰ জৰিয়তে দৈনিক ৭.৫০ নিযুত লিটাৰ আৰু জনস্বাস্থ্য কৰিকৰী বিভাগৰ অধীনৰ গুৱাহাটী বিশ্ববিদ্যালয় পানী যোগান প্ৰকল্প, গেম ভিলেজ প্ৰকল্প, পানবজাৰ আৰু উত্তৰ গুৱাহাটী পানী যোগান প্ৰকল্পৰ জৰিয়তে দৈনি ২৩.৬৫ নিযুত লিটাৰ খোৱাপানী যোগান ধৰি অহা হৈছে।
মনকৰিবলগীয়া যে গুৱাহাটী পৌৰ নিগমৰ প্ৰকল্পকেইটাৰে যোগান ধৰা পানী প্ৰায়ে ঘোলা, বালিৰ প্ৰলেপ থকা আৰু লেতেৰা হোৱাৰ অভিযোগ উঠে। এই সন্দৰ্ভত পৌৰ নিগমৰ এক সূত্ৰই জনোৱা মতে নিগমৰ তিনিওটা প্ৰকল্পৰে যন্ত্ৰসমূহ বহু পুৰনি। প্ৰকল্প কেইটাৰ মেৰামতিৰ বাবে চৰকাৰে শেহতীয়াকৈ ১০ কোটি টকা দিছে যদিও ইয়াক মেৰামতি কৰি বেছিদিন চলাব পৰা নাযাব বুলি সূত্ৰটোৱে লগতে জনায়।
অনুৰূপভাৱে জনস্বাস্থ্য কাৰিকৰী বিভাগ আৰু মহানগৰ পানী যোগান আৰু অনাময় পৰিষদৰ পানীযোগান প্ৰকল্পকেইটাও আওপুৰনি হৈ পৰিছে। যাৰ বাবে প্ৰকল্পকেইটাৰ পানী যোগান ক্ষমতা পূৰ্বৰ তুলনাত হ্ৰাস পাই আহিছে।
এনে পৰিপ্ৰেক্ষিতত মহানগৰীৰ অধিকাংশ লোকে খোৱাপানীৰ বাবে পানীৰ ব্যৱসায়ীৰ ওচৰতে হাত পাতিব লাগে। কিন্তু এই পানী খোৱাৰ কিমান উপযোগী তাক লৈ সন্দেহৰ অৱকাশ আছে। কাৰণ ব্যৱসায়ীয়ে নিজৰ ইচ্ছামতে দাম নিৰ্দ্ধাৰণ কৰা খোৱাপানীসমূহ পৰীক্ষা কৰাৰ কোনো ব্যৱস্থা নাই, তদুপৰি উক্ত পানী তেওঁলোকে কৰ পৰা সংগ্ৰহ কৰি আনে তাৰো কোনো ঠিকনা নাথাকে। বৰ্তমান গুৱাহটীত প্ৰায় ১০ হাজাৰ অটোভানে দৈনিক খোৱাপানী যোগান ধৰে।
গুৱাহাটী পানী যোগান প্ৰকল্পকেইটা সম্পূৰ্ণ হৈ নুঠালৈকে মহানগৰীত খোৱাপানীৰ নাটনি যে অব্যাহত থাকিব সেয়া নিশ্চিত। উল্লেখযোগ্য যে ২০১০ চনৰ পৰা চলি থকা বৃহৎ গুৱাহাটী পানী যোগান প্ৰকল্পকেইটা আজিলৈকে সম্পূৰ্ণ উঠাৰ মুখ দেখা নাই।