জনজাতীয় বেল্ট আৰু ব্লকৰ পৰা উচ্ছেদৰ শংকাত লাখ লাখ অজনজাতীয় লোক

জনজাতীয় বেল্ট আৰু ব্লকৰ পৰা অজনজাতীয় বা সুৰক্ষিত শ্ৰেণী-বহিৰ্ভূত লোকক উচ্ছেদ কৰিবলৈ গুৱাহাটী উচ্চ ন্যায়ালয়ে দিয়া নিৰ্দেশটোৱে শংকিত কৰিছে লাখ লাখ লোকক।

এখন ৰাজহুৱা স্বাৰ্থজড়িত আৱেদনৰ শুনানিৰ সময়ত ৩০ ডিচেম্বৰত দিয়া গুৰুত্বপূৰ্ণ নিৰ্দেশটোত Assam Land and Revenue Regulation Act, 1886 আইনৰ দশম অধ্যায়টো কঠোৰভাৱে বলৱৎ কৰিবলৈ কোৱা হৈছে।

অসম ভূমি আৰু ৰাজহ নীতি আইন, ১৮৮৬খনৰ সংশ্লিষ্ট অধ্যায়টোৰ মতে, ট্রাইবেল বেল্ট আৰু ব্লকসমূহত অজনজাতীয় বা সুৰক্ষিত বুলি বিবেচিত শ্ৰেণীবোৰৰ অন্তৰ্ভুক্ত নোহোৱা কোনো লোকে মাটিৰ অধিকাৰ নাপায় বা দখল, বিনিময়, কিনা-বেচা আদি কৰিব নোৱাৰে আৰু কৰিলেও সেইবোৰ উক্ত আইনৰ দ্বাৰা নাকচ হ’ব পাৰে৷

ন্যায়ালয়ে বঙাইগাঁও, কামৰূপ (মহানগৰ), মৰিগাঁও, শোণিতপুৰ আৰু তিনিচুকীয়া জিলাৰ উপায়ুক্তসকলৰ লগতে বিটিচিৰ মুখ্য সচিবলৈ জাৰি কৰা নিৰ্দেশটোত ৩ ফেব্ৰুৱাৰিৰ ভিতৰত উচ্ছেদ কাৰ্য্যকৰী কৰা সন্দৰ্ভত প্ৰতিবেদন দিবলৈও কৈছে।

নিৰ্দেশটোৰ বাবে এই জিলাকেইখন আৰু বিটিচিৰ অন্তৰ্গত জনজাতীয় বেল্ট আৰু ব্লকবোৰত বাস কৰি থকা লাখ লাখ লোকৰ জীৱন প্ৰভাৱিত হোৱাৰ শংকাই দেখা দিছে। তথ্যমতে, ৰাজ্যত বৰ্তমান মুঠ ৪৭টা জনজাতীয় বেল্ট আৰু ব্লক আছে।

স্বাধীনতাৰ পিছত একাধিকবাৰ এই বেল্ট আৰু ব্লকত নতুন অঞ্চল অন্তৰ্গত কৰা হৈ আহিছে। তাৰোপৰি অনুসূচিত জনজাতিয়েই নহয়, সুৰক্ষিত শ্ৰেণীৰ ভিতৰত চাওঁতালী, নেপালী আদি আন আন কিছুমান জনজাতিও অন্তৰ্ভুক্ত আছে, যিসকলৰ ভূমি সুৰক্ষিত কৰা আৰু এই অঞ্চলবোৰত ভূমিৰ অধিকাৰ পাবৰ যোগ্য হিচাপে তালিকাভুক্ত কৰি ৰাখিছে।

তৰুণ গগৈ নেতৃত্বাধীন কংগ্রেছৰ তৃতীয়খন চৰকাৰৰ দিনত তদানীন্তন ৰাজহ মন্ত্রী পৃথ্বী মাঝিয়ে বিধানসভাত দিয়া তথ্য অনুসৰি অসমৰ ৮২,১৪,৯৮৫ বিঘা ভূমি ট্রাইবেল বেল্ট আৰু ব্লকসমূহৰ অধীনত আছে।

ইয়াৰে ১,৯৩,৯৭৮ বিঘা দুই কঠা ৭ লেচা ভূমি বেদখলৰ কবলত।

অৱশ্যে এই বেদখল অজনজাতীয় লোকৰ দ্বাৰা নে বিদেশী অনুপ্ৰৱেশকাৰীৰ দ্বাৰা সেই কথা তথ্যটোৰ পৰা স্পষ্ট নহয়।

তথ্যত উল্লেখ নাথাকিলেও এইসকলৰ গৰিষ্ঠ সংখ্যকেই যে থলুৱা অজনজাতীয় লোক সেয়া অনুমেয়। গুৱাহাটী উচ্চ ন্যায়ালয়ৰ ৰায়টোৰ পিছত এই লোকসকলৰ মাজত স্বাভাৱিকতেই শংকাই গা কৰি উঠিছে।

আনহাতে বিষয়টোত চৰকাৰৰ ভূমিকাও লক্ষণীয় হ’ব এইবাবেই যে এই অঞ্চলবোৰত থকা থলুৱা লোকসকলক উচ্ছেদে চৰকাৰৰ বিৰুদ্ধে প্ৰচণ্ড ক্ষোভৰ সৃষ্টি কৰিব পাৰে।

২০১৮ চনৰ নৱেম্বৰত মুখ্য মন্ত্ৰী সোণোৱালে ৰাজহ বিভাগক নিৰ্দিষ্ট ধৰণৰ কঠোৰ ভূমি নীতি প্ৰস্তুত কৰাৰ বাবে নিৰ্দেশ দিছিল, যাতে জনজাতীয় বেল্টসমূহত চলি থকা বেদখলৰ বিৰুদ্ধে ব্যৱস্থা ল’ব পাৰে। ন্যায়ালয়ৰ ৩০ ডিচেম্বৰৰ নিৰ্দেশটোৱে মুখ্য মন্ত্ৰীক এই ক্ষেত্ৰত আইনীভাৱেও সহায় কৰাৰ সম্ভাৱনা।

আনহাতে কাজিৰঙাত যুগ যুগ ধৰি বাস কৰি থকা লোকসকলক আগতীয়া ব্যৱস্থা নকৰাকৈ উচ্ছেদ কৰা কাৰ্য্যক সমৰ্থন আৰু আনন্দ প্ৰকাশ কৰা সকলে ট্ৰাইবেল বেল্ট আৰু ব্লকত যুগ যুগ ধৰি বাস কৰি অহা থলুৱা লোকসকলৰ উচ্ছেদত কেনে প্ৰতিক্ৰিয়া কৰে সেয়া চাব লগীয়া হ’ব।