গুৱাহাটীৰ ৰাজভৱনৰ পৰা ৫ কিলোমিটাৰ ব্যাসাৰ্ধৰ ভিতৰত ভাৰতীয় নাগৰিক সুৰক্ষা সংহিতা (বিএনএছএছ)ৰ ১৬৩ নং ধাৰাৰ অধীনত নিষেধাজ্ঞা জাৰি কৰা হৈছে। উপ-আৰক্ষী আয়ুক্ত (কেন্দ্ৰীয়) অমিতাভ বসুমতাৰীৰ নিৰ্দেশনা অনুসৰি এই নিষেধাজ্ঞাৰ জৰিয়তে উক্ত অঞ্চলৰ সুৰক্ষা আৰু শান্তি বজাই ৰখাৰ লক্ষ্যৰে যিকোনো সম্ভাব্য শান্তি বিঘ্নিতকাৰী কাৰ্যকলাপ নিষিদ্ধ কৰা হৈছে।
এই নিৰ্দেশনাত উল্লেখ কৰা অনুসৰি ৰাজভৱনৰ আশে-পাশে কিছুমান বিশেষ কাৰ্যকলাপৰ ফলত এই উচ্চ নিৰাপত্তাসম্পন্ন অঞ্চলৰ সুৰক্ষা, নিৰাপত্তা আৰু পবিত্ৰতাৰ প্ৰতি ভাবুকিৰ সৃষ্টি হৈছে। ৰাজ্যৰ ৰাজ্যপালৰ চৰকাৰী বাসগৃহ হিচাপে ৰাজভৱনৰ কাৰ্যকলাপ অব্যাহত ৰাখিবলৈ উচ্চ নিৰাপত্তা আৰু শান্তিপূৰ্ণ পৰিৱেশৰ প্ৰয়োজন। সেয়েহে, এই অঞ্চলত সকলো ধৰণৰ ৰাজহুৱা সমাৱেশ, প্ৰতিবাদ, বিক্ষোভ বা অন্যান্য বিঘ্নিতকাৰী কাৰ্যকলাপ নিষিদ্ধ কৰা হৈছে।
উল্লেখ্য যে নিষেধাজ্ঞাৰ অধীনত নিম্নলিখিত কাৰ্যকলাপ সম্পূৰ্ণৰূপে নিষিদ্ধ কৰা হৈছে:
লাউডস্পীকাৰ, আতচবাজী, ক্ৰেকাৰ বা অন্যান্য শব্দ উৎপাদনকাৰী যন্ত্ৰৰ ব্যৱহাৰ।
পূৰ্বানুমতি অবিহনে বাহন বা ব্যক্তিৰ অকৰ্তৃত্বশীল চলাচল।
নিৰ্মাণ কাম বা অন্যান্য সম্ভাব্য বিঘ্নিতকাৰী কাৰ্যকলাপ যিয়ে নিৰাপত্তা বা শান্তি ভংগ কৰিব পাৰে।
এই নিষেধাজ্ঞা আগন্তুক দুমাহৰ বাবে বলবৎ হৈ থাকিব। নিৰ্দেশ উলংঘা কৰা যিকোনো ব্যক্তি বা গোষ্ঠীয়ে ভাৰতীয় নাগৰিক সুৰক্ষা সংহিতাৰ সংশ্লিষ্ট ধাৰাৰ অধীনত শাস্তিৰ বাবে দায়বদ্ধ হ’ব।
নিৰ্দেশনাত ক্ষুব্ধ যিকোনো ব্যক্তিয়ে নিজৰ লিখিত আপত্তি উপ-আৰক্ষী আয়ুক্ত (কেন্দ্ৰীয়)ৰ কাৰ্যালয়ত দাখিল কৰি এই এক্স-পাৰ্ট অৰ্ডাৰ বাতিল বা সংশোধনৰ বাবে আবেদন কৰিব পাৰিব বুলিও নিৰ্দেশনাত উল্লেখ কৰিছে। আৰু গুৱাহাটীৰ জনসাধাৰণক এই নিৰ্দেশ মানি চলি আইন-শৃংখলা ৰক্ষাত সহযোগিতা কৰিবলৈ আহ্বান জনাইছে।
