গুৱাহাটীৰ প্ৰাগজ্যোতি আইটিএ সাংস্কৃতিক কেন্দ্ৰত দেওবাৰে (১৩ জুলাই) বেংগালুৰুৰ বিশিষ্ট পৰিৱেশকর্মী দত্তাত্রেয় টি দেৱৰে ‘আন্তঃগাঁথনি নিৰ্মাণৰ বাবে গছ ধ্বংস উন্নয়ন আৰু পৰিৱেশতন্ত্ৰৰ ভাৰসাম্যতা ৰক্ষা’ শীর্ষক তথ্যপূৰ্ণ বক্তৃতা প্ৰদান কৰে।
গুৱাহাটীৰ সচেতন নাগৰিকৰ দ্বাৰা আয়োজন কৰা এই বক্তৃতাত অনুষ্ঠানত প্ৰসংগ ক্ৰমে বক্তাই আন্তঃগাঁথনিৰ নামত পৰিৱেশৰ অবাধ ধ্বংস ডেভলপমেণ্ট নহয়, ডেভিলপমেণ্ট বুলি আখ্যা দিয়ে। বেংগালুৰুৰ বিস্তৃত অভিজ্ঞতাৰ আধাৰত দেৱাৰে অসংখ্য উদাহৰণ দাঙি ধৰে।
তেওঁৰ ভাষণৰ বিশেষ অংশত দেৱাৰে কিছুমান আন্তঃগাঁথনি প্ৰকল্পৰ ওপৰত তীব্ৰ অভিযোগ কৰি নিৰ্দ্বিধায় সেইবোৰক ডেভিলপমেণ্ট বুলি অভিহিত কৰে। দেৱাৰে কয়, প্ৰগতি হিচাপে প্ৰচাৰ কৰা প্ৰকল্পসমূহে কেনেকৈ পৰিৱেশৰ অপৰিৱৰ্তনীয় ক্ষতি কৰিব পাৰে আৰু সম্প্ৰদায়সমূহক স্থানচ্যুত কৰিব পাৰে।
অসমত বৃক্ষ আইনৰ অনুপস্থিতিত উদ্বেগ প্ৰকাশ কৰি তেওঁ শক্তিশালী বৃক্ষ আইনৰ জৰুৰী প্ৰয়োজনীয়তাৰ ওপৰত গুৰুত্ব আৰোপ কৰে। তেওঁ ব্যাখ্যা কৰে যে এনে আইনসমূহে গছ সুৰক্ষা, প্ৰতিস্থাপন আৰু জবাবদিহিতাৰ বাবে এক গুৰুত্বপূৰ্ণ আইনী কাঠামো প্ৰদান কৰে।
তেওঁ অপৰিকল্পিত তথা বিবেচনাহীন উন্নয়নে কি দৰে পৰিৱেশৰ ওপ্ৰত প্ৰভাৱ পেলাব পাৰে বা পেলাইছে তাৰ বিশদ বিশ্লেষণ দাঙি ধৰে আৰু ২০১৬ চনত প্ৰস্তাৱিত উৰণীয়া সেতুৰ বিৰুদ্ধে বহুলভাৱে প্ৰচাৰিত প্ৰতিবাদকে ধৰি বেংগালুৰুত বিভিন্ন ৰাজহুৱা প্ৰতিবাদত অংশগ্ৰহণ কৰাৰ উদাহৰণ দাঙি ধৰে। আৰু বহনক্ষম নগৰ উন্নয়নৰ সমাধান সন্দৰ্ভত আলোকপাত কৰে।
তেওঁ সমস্যাবোৰৰ ওপৰত আলোকপাত কৰাৰ লগতে ব্যৱহাৰিক সমাধানো আগবঢ়াইছিল। তেওঁ নিৰ্বিচাৰ গছ কটা বন্ধ কৰিবলৈ গুৱাহাটীৰ নাগৰিক আৰু কৰ্তৃপক্ষই গ্ৰহণ কৰিব পৰা আইনী, চৰকাৰী, পৰিৱেশ, আৰু সমাজৰ একাধিক ব্যৱস্থাৰ ৰূপৰেখা দাঙি ধৰে।
উন্নয়নৰ নামত গছ কটাৰ বিৰোধিতা কৰাত তথ্যৰ গুৰুত্বৰ ওপৰত গুৰুত্ব আৰোপ কৰি তেওঁ কয়, আদালতে তথ্য আৰু পৰিসংখ্যা বিচাৰে; সেয়েহে পৰিৱেশৰ প্ৰভাৱ মূল্যায়নৰ সঠিক অধ্যয়ন কৰাটো গুৰুত্বপূৰ্ণ। গুৱাহাটীৰ দীঘলীপুখৰি অঞ্চলত শেহতীয়াকৈ গ্ৰহণ কৰা গছ স্থানান্তৰ কথা উল্লেখ কৰি তেওঁ কয় যে, গছ স্থানান্তৰ শেষ উপায় হোৱা উচিত।
সামগ্ৰিক কৌশলেৰে স্থানীয় প্ৰশাসনৰ সৈতে জড়িত হোৱা, পৰিৱেশ সুৰক্ষাৰ বাবে আইনী পথ অনুসৰণ কৰা, আৰু গছ ৰক্ষাৰ বাবে জনসাধাৰণৰ নেতৃত্বত লোৱা পদক্ষেপসমূহৰ ওপৰতো গুৰুত্ব আৰোপ কৰে।
তেওঁ বিধানসভাৰ ত্ৰুটিসমূহ আঙুলিয়াই দিয়ে যে অসমত হিট ৱেভ একচন প্লেনৰ অভাৱ, আৰু উচ্চতম ন্যায়ালয়ৰ ৰায়দানৰ কথা সোঁৱৰাই কয়, বন কটাৰ আগতে বনানীকৰণ সম্পূৰ্ণ হ’ব লাগে, যিটো গুৱাহাটীৰ বৰ্তমানৰ উন্নয়নমূলক কামত প্ৰায়ে উপেক্ষা কৰি অহিছে।
আন্তঃগাঁথনি উন্নয়নৰ ফলত হোৱা পৰিৱেশৰ অৱক্ষয় লাঘৱ কৰাৰ উপায় হিচাপে তেওঁ বিকল্প ৰোপণ প্ৰক্ৰিয়া যেনে মিয়াৱাকি পদ্ধতি, উলম্ব বাগিচা, পথৰ কাষত গছ ৰোপণ আদিৰ বিষয়ে উল্লেখ কৰে।
