বাংলাদেশত পুনৰ ভাৰতীয়সকলক লক্ষ্য কৰি লোৱা হৈছে। এইবাৰ ওচমান হাদিৰ আধৰুৱা স্বপ্ন পূৰণৰ বাবে আগবাঢ়ি আহিছে ‘ইনকিলাব মঞ্চ’ নামৰ সংগঠনটো।
দেওবাৰে নিশা প্ৰায় ১০ বজাত শাহবাগ মোৰত আয়োজিত এক ‘সৰ্বাত্মক অৱৰোধ’ কাৰ্যসূচীৰ পৰা সংগঠনটোৰ সদস্য সচিব আব্দুল্লাহ আল জাবে অন্তৱৰ্তীকালীন চৰকাৰৰ ওচৰত কেইবাটাও দাবী উত্থাপন কৰাৰ লগতে এক নিৰ্দিষ্ট সময়সীমা বান্ধি দিয়ে।
মঞ্চৰ প্ৰধান দাবী হ’ল ওচমান হাদিৰ হত্যাকাণ্ডৰ সৈতে প্ৰত্যক্ষ বা পৰোক্ষভাৱে জড়িত প্ৰতিজন দোষীক বিচাৰৰ আওতালৈ আনি অহা ২৪ দিনৰ ভিতৰত তেওঁলোকৰ শাস্তি নিশ্চিত কৰিব লাগে। নিজৰ চাৰি দফীয়া দাবীৰ তালিকাত ইনকিলাব মঞ্চই বাংলাদেশত কৰ্মৰত ভাৰতীয়সকলৰ কৰ্মসংস্থাপনৰ অনুমতি বা ৱৰ্ক পাৰ্মিট বাতিল কৰিবলৈ দাবী জনাইছে।
ইয়াৰ উপৰি সংগঠনটোৱে মুখ্য উপদেষ্টা মুহাম্মদ ইউনূছক অনুৰোধ জনাইছে যে ভাৰতত আশ্ৰয় গ্ৰহণ কৰা প্ৰাক্তন প্ৰধানমন্ত্ৰী শ্বেখ হাছিনা আৰু আৱামী লীগৰ নেতা-কৰ্মীসকলক যদি বাংলাদেশে ওভতাই নাপায়, তেন্তে আন্তঃৰাষ্ট্ৰীয় আদালতত ভাৰতৰ বিৰুদ্ধে গোচৰ তৰিব লাগে।
চতুৰ্থটো দাবী হিচাপে তেওঁলোকে বাংলাদেশৰ চোৰাংচোৱা সংস্থা আৰু সেনাৰ ভিতৰত থকা হাছিনা পন্থীসকলক চিনাক্ত কৰি আইনী ব্যৱস্থা ল’বলৈ আহ্বান জনাইছে। এই সকলোবোৰ দাবী পূৰণৰ বাবে ইউনূছ চৰকাৰক ২৪ দিনৰ সময় দিছে।
