বি পি এফে পুনৰ উদ্ধাৰ কৰিব পাৰিবনে কোকৰাঝাৰ লোকসভা সমষ্টি? বিগত ২০১৪ চনত কোকৰাঝাৰ লোকসভা সমষ্টি বি পি এফৰ হাতৰ পৰা ওলাই যোৱাৰ পিছত এইবেলিও নিৰ্বাচনৰ পূৰ্বে অৱতাৰণা হৈছে সেই একে প্ৰশ্নৰ। কিন্তু বি পি এফ বাহিনী জপিয়াই পৰিছে সমষ্টি পুনৰ উদ্ধাৰত।
১২ মাৰ্চত বাক্সাৰ বৰমাত বি পি এফে কোকৰাঝাৰ লোকসভা সমষ্টিৰ প্ৰাৰ্থী হিচাপে দলটোৰ জ্যেষ্ঠ নেত্ৰী প্ৰমিলা ৰাণী ব্ৰহ্মৰ নাম ঘোষণা কৰাৰ পিছতেই ১৩ মাৰ্চত কোকৰাঝাৰৰ আৰনাই হোটেলত বি পি এফৰ এখন গুৰুত্বপূৰ্ণ বৈঠক অনুষ্ঠিত হয় । উক্ত বৈঠকত কিৰণ চন্দ্ৰ বসুমতাৰীক অধ্যক্ষ আৰু শান্তলা বসুমতাৰীক মুখ্য আহ্বায়ক হিচাপে লৈ এখন ৫৩ জনীয়া নিৰ্বাচন পৰিচালনা সমিতি গঠন কৰে।
সভাৰ অন্তত বি পি এফৰ সভাপতি হাগ্ৰামা মহিলাৰীয়ে এবছু সমৰ্থিত প্ৰাৰ্থীৰ স’তে প্ৰতিদ্বন্দ্বিতা হ’ব বুলি মন্তব্য কৰি এবছুক কঠোৰ ভাষাৰে সমালোচনা কৰে। তদুপৰি অগপ -বিজেপিৰ মিত্ৰতাত বি পি এফৰ একো লাভ লোকচান নহয় বুলি মত প্ৰকাশেৰে অগপ বিজেপি একেলগে থাকিলে ভাল বুলিও উল্লেখ কৰে।
নিৰ্বাচন উপলক্ষে কোকৰাঝাৰ লোকসভা সমষ্টিৰ অন্তৰ্গত প্ৰতিটো বিধানসভা সমষ্টিত বিশাল নিৰ্বাচনী সভা অনুষ্ঠিত কৰা হ’ব আৰু অহা ২৫ মাৰ্চত গোসাঁইগাঁৱত প্ৰথমখন বিশাল নিৰ্বাচনী সভা অনুষ্ঠিত হব বুলি সদৰী কৰি কোকৰাঝাৰ লোকসভা সমষ্টিত এইবাৰ বি পি এফে জয়লাভ কৰিব বুলি মন্তব্য কৰিছে হাগ্ৰামা মহিলাৰীয়ে।
ইপিনে কোকৰাঝাৰ লোকসভা সমষ্টিৰ প্ৰাৰ্থী প্ৰমিলা ৰাণী ব্ৰহ্মই দলৰ সিদ্ধান্তত সুখী বুলি মন্তব্য কৰি ৰাইজৰ ওপৰত আস্থা প্ৰকাশ কৰি তেওঁৰ প্ৰাৰ্থিত্বত ৰাইজ সুখী হোৱা বুলি কয়। ৰাজ্যৰ ৰাজনীতিৰ পৰা দিল্লীৰ ৰাজনীতিলৈ কিয় মন মেলিলে বুলি সাংবাদিকে সোধা এক প্ৰশ্নত্তোৰত তেওঁ মন মেলাৰ পূৰ্বেই দলে মন মেলিলে বুলি তাৎপৰ্যপূৰ্ণ উত্তৰ প্ৰদান কৰে প্ৰমিলা ৰাণী ব্ৰহ্মই।