কোকৰাঝাৰ লোকসভা সমষ্টি পুনৰুদ্ধাৰৰ বাবে ন ন কৌশল অৱলম্বন কৰা বি পি এফ দলে আজি গোসাঁইগাঁৱৰ হাৰাফুটাত এক বিশাল নিৰ্বাচনী সভা অনুষ্ঠিত কৰি বি পি এফ প্ৰধান হাগ্ৰামা মহিলাৰীয়ে এবছু, য়ু পি পি আৰু কৃষক নেতা অখিল গগৈক তীব্ৰ সমালোচনা কৰে।
সভাত হাগ্ৰামা মহিলাৰীয়ে প্ৰমোদ বড়ো আৰু অখিল গগৈক ৰাজনৈতিক ট্ৰেডাৰছ আখ্যা দিয়াৰ লগতে তেওঁলোক বি পি এফৰ বাবে কোনো ফেক্টৰ নহয় বুলি মন্তব্য কৰা দেখা যায়।
ইয়াৰ উপৰি হাগ্ৰামাই কয় যে য়ু পি পি এলক আৰ্থিকভাৱে সহায় কৰাৰ উদ্দেশ্যে এবছু আৰু এন ডি এফ বি(পি)এ কচুগাঁও সংৰক্ষিত বনাঞ্চলৰ বহু মূল্যৱান গছ কাটিছে। ৰাজনীতিৰ বাবে প্ৰকৃতি ধ্বংস কৰাটো অসহনীয় বুলি উল্লেখ কৰি এই সম্পৰ্কে জিলা প্ৰশাসনক অৱগত কৰোৱা হৈছে বুলিও আজিৰ সভাত মহিলাৰীয়ে উল্লেখ কৰে।
বি পি এফ কৰ্মী তথা সদস্যসকলক বিভিন্ন ধৰণে ভয়-ভাবুকি দেখুওৱা বুলিও এবছু আৰু এন ডি এফ বিৰ বিৰুদ্ধে অভিযোগ তোলে হাগ্ৰামা মহিলাৰীয়ে।
আনহাতে অখিল গগৈৰ বিৰুদ্ধেও সৰৱ হোৱা দেখা যায় বি টি চি প্ৰধানজনক। তেওঁ কয়, ‘অখিলক সদাই আন্দোলনৰ প্ৰয়োজন। আন্দোলন নকৰিলে অখিল গগৈ মৃগী বেমাৰীৰ দৰে হ’ব। ১২ মাহে কেৱল আন্দোলন বিচৰা অখিলে নিজৰ স্বাৰ্থৰ বাবেহে কাম কৰে’।
তেওঁ লগতে আগন্তুক নিৰ্বাচনত কাক ভোট দিব লাগে সেয়া অখিল আৰু প্ৰমোদ বড়োৱে ক’ব নালাগে বুলিও দুয়োজনকে কটাক্ষ কৰে। তদুপৰি এইবাৰ কোকৰাঝাৰ লোকসভা সমষ্টিৰ পৰা বি পি এফ সহজে বিজয় সাব্যস্ত কৰিব বুলিও কয়।
আনহাতে মন্ত্ৰী চন্দন ব্ৰহ্মই নিজৰ ভাষণ প্ৰসংগত বি পি এফৰ প্ৰাৰ্থীগৰাকী বিপুল ভোটত জয়ী হ’ব বুলি মন্তব্য কৰে।
আজিৰ এই বি পি এফৰ নিৰ্বাচনী প্ৰচাৰত বি পি এফৰ প্ৰাৰ্থী প্ৰমীলা ৰাণী ব্ৰহ্ম, ৰাজ্যসভাৰ সাংসদ বিশ্বজিৎ দৈমাৰীৰ লগতে আন বহুতো শীৰ্ষ পৰ্যায়ৰ নেতা উপস্থিত থাকে।
