হাইলাকান্দি জিলাৰ ইনাৰ লাইন সংৰক্ষিত বনাঞ্চলত চলি থকা বৃহৎ পৰিসৰৰ উচ্ছেদ অভিযানে মঙলবাৰে দুটা দিন অতিক্ৰম কৰিলে। বন বিভাগৰ তথ্য অনুসৰি, ইনাৰ লাইন সংৰক্ষিত বনাঞ্চলৰ গৰমুৰা ৰেঞ্জৰ অধীনত মুঠ ৫১৬টা অবৈধ ঘৰ চিনাক্ত কৰা হৈছিল। হাইলাকান্দিৰ সংমণ্ডল বন বিষয়া অখিল দত্তই সংবাদ মাধ্যমক জনোৱা মতে, অভিযানটো সম্পূৰ্ণ শান্তিপূৰ্ণভাৱে আৰু আইনী বিধান অনুসৰি পৰিচালিত হৈছে। তেওঁ কয়, “মুঠ ৫১৬টা ঘৰৰ ভিতৰত সোমবাৰে প্ৰায় ৫০ শতাংশ উচ্ছেদ কৰা হৈছিল। মঙলবাৰে বাকী থকা ১, ২, ৩ আৰু ৪ নং খণ্ডত উচ্ছেদ প্ৰক্ৰিয়া চলি আছে।”
বন বিষয়গৰাকীয়ে স্পষ্ট কৰি দিয়ে যে উক্ত বনাঞ্চলত তামোল (Betel nut), কফি, চাহ বা ৰবৰৰ বাগিচাৰ দৰে বাণিজ্যিক আৰু অ-বনজ কাম-কাজ বন সংৰক্ষণ আইন, ১৯৮০ অনুসৰি সম্পূৰ্ণ নিষিদ্ধ। আইন ৰক্ষাৰ স্বাৰ্থতেই এই উচ্ছেদ চলোৱা হৈছে বুলি তেওঁ ব্যাখ্যা কৰে। উচ্ছেদ স্থলীত যাতে কোনো অপ্ৰীতিকৰ পৰিস্থিতিৰ সৃষ্টি নহয়, তাৰ বাবে ১১টা চেকপইণ্ট স্থাপন কৰাৰ লগতে বৃহৎ সংখ্যক আৰক্ষী বাহিনী মোতায়েন কৰা হৈছে। তেওঁ লগতে উল্লেখ কৰে যে বহু লোকে নিজাববীয়াকৈ উচ্ছেদিত অঞ্চল খালী কৰি দিছে।
ইফালে, কাটলিচেৰাৰ বিধায়ক চুজাম উদ্দিন লস্কৰে এই উচ্ছেদ অভিযানৰ তীব্ৰ বিৰোধিতা কৰিছে। এ.আই.ইউ.ডি.এফ. ৰ বিধায়কগৰাকীয়ে চৰকাৰৰ বিৰুদ্ধে পক্ষপাতিত্বৰ অভিযোগ উত্থাপন কৰি কয় যে উক্ত বনাঞ্চলত হিন্দু, মুছলমান আৰু খ্ৰীষ্টান আদিকে ধৰি সকলো সম্প্ৰদায়ৰ লোক বাস কৰে যদিও চৰকাৰে উচ্ছেদৰ ক্ষেত্ৰত কেৱল এক বিশেষ সম্প্ৰদায়ৰ লোককহে লক্ষ্য কৰি লৈছে।
লস্কৰে লগতে অভিযোগ কৰে যে উচ্চ ন্যায়ালয়ত শুনানিৰ সময়ত বাসিন্দাসকলক ১০ দিনৰ সময় দিয়া হৈছিল যদিও চৰকাৰে তেওঁলোকৰ নথি-পত্ৰ গ্ৰহণ নকৰিলে। তেওঁ উচ্ছেদিত ভূমিহীন ভাৰতীয় নাগৰিকসকলক কাটলিচেৰা চক্ৰৰ অধীনত থকা খালী চৰকাৰী ভূমিত একৰ পৰা দুই বিঘা মাটি আবণ্টন দি পুনৰ সংস্থাপন কৰিবলৈ চৰকাৰক আহ্বান জনায়।
সোমবাৰৰ পৰা আৰম্ভ হোৱা এই অভিযানত হাইলাকান্দি জিলাৰ ৫, ৬ আৰু ৭ নং ছেক্টৰৰ প্ৰায় ২৮০০ বিঘা সংৰক্ষিত বনাঞ্চল বেদখলমুক্ত কৰাৰ লক্ষ্য নিৰ্ধাৰণ কৰিছে চৰকাৰে।
