অহা কিছু দিনৰ ভিতৰত ভাৰতৰ স্বাস্থ্য মন্ত্ৰী ডাঃ হৰ্ষবৰ্ধনে বিশ্ব স্বাস্থ্য সংস্থা (WHO)ৰ কাৰ্যবাহী ব’ৰ্ডৰ অধ্যক্ষৰ দায়িত্বভাৰ গ্ৰহণ কৰিব।
WHOৰ এটা সূত্ৰৰ পৰা জানিব পৰা মতে ক’ৰ’না বিৰোধী যুঁজত গুৰুত্বপূৰ্ণ ভূমিকা লোৱা স্বাস্থ্য মন্ত্ৰী হৰ্ষবৰ্ধনে অহা ২২ মে’ত নতুন দায়িত্ব গ্ৰহণ কৰাৰ সম্ভাৱনা আছে।
জাপানৰ ডাঃ হিৰোকী নকাটনীৰ ঠাইত অধ্যক্ষৰ দায়িত্ব ল’ব হৰ্ষবৰ্ধনে।
বিশ্ব স্বাস্থ্য সংস্থাৰ কাৰ্য্যবাহী পৰিষদলৈ মঙলবাৰে ভাৰত নিৰ্বাচিত হৈছে। ভাৰতৰ উপৰি আন ৯ খন দেশ বিশ্ব স্বাস্থ্য সংস্থাৰ কাৰ্য্যবাহী পৰিষদলৈ নিৰ্বাচিত হয়।
ভাৰতক অহা তিনি বছৰলৈ কাৰ্যবাহী পৰিষদলৈ নিৰ্বাচিত কৰাৰ বাবে WHOৰ দক্ষিণ-পূব গোটে যোৱা বছৰতে সিদ্ধান্ত লৈছিল।
জানিব পৰা মতে অহা ২২ মে’ত হ’বলগীয়া কাৰ্যবাহী পৰিষদৰ বৈঠকত হৰ্ষবৰ্ধনক নিৰ্বাচিত কৰা হ’ব। কাৰ্যবাহী পৰিষদৰ অধ্যক্ষৰ পদটো এবছৰৰ মূৰে মূৰে সলনি হৈ থাকে।
৩৪ জনীয়া সদস্যৰে গঠিত কাৰ্যবাহী পৰিষদ। এই পৰিষদৰ আটাইবোৰ সদস্য স্বাস্থ্যখণ্ডৰ পৰা অহা। পৰিষদখনে সাধাৰণতে বছৰত দুবাৰকৈ বৈঠকত মিলিত হয়।