শিক্ষক নিযুক্তি কেলেংকাৰীত ১০ বছৰৰ কাৰাবাস হোৱা আৰু বৰ্তমান পেৰ’লত থকা হাৰিয়ানাৰ প্ৰাক্তন মুখ্যমন্ত্ৰী ওম প্ৰকাশ চৌতালা আগতীয়াকৈ কাৰামুক্ত হোৱাৰ বাবে সাজু হৈছে।
দিল্লী চৰকাৰে ছয় মাহৰ শাস্তি ৰেহাই দিয়াৰ বাবে এইদৰে তিহাৰ জে’লৰ পৰা মুকলি আকাশৰ তললৈ আহিবলৈ সাজু হৈছে চৌতালা।
কোভিড-১৯ অতিমাৰীৰ প্ৰতি লক্ষ্য ৰাখি জে’লত ভিৰ হ্ৰাস কৰাৰ বাবে দিল্লী চৰকাৰে সোমবাৰে ১০ বছৰীয় কাৰাদণ্ড খাটি থকা কাৰাবন্দীসকলৰ যিসকলে ৯বছৰ ছয়মাহ সম্পূৰ্ণ কৰিছে তেওঁলোকক বিশেষ ৰেহাই দিয়াৰ বাবে অনুমোদন দিয়ে। সেই মতে, এতিয়া চৌতালা জে’লৰ পৰা মুক্তি পোৱাৰ বাবে যোগ্য বিবেচিত হৈছে।
হাৰিয়ানাৰ চাৰিবাৰৰ মুখ্যমন্ত্ৰীগৰাকীক যোৱা ২০১৩চনৰ ১৬জানুৱাৰীত কৰাদণ্ড বিহা হৈছিল। তেওঁ যোৱা বছৰৰ ২৬ মাৰ্চৰ পৰা জৰুৰীকালীন পেৰ’লত আছিল।
তেওঁ ২০২১ৰ ২১ফেব্ৰুৱাৰীত পুনৰ জে’ললৈ ঘুৰি যাবলগীয়া আছিল যদিও উচ্চ ন্যায়ালয়ে তেওঁৰ পেৰ’ল বৃদ্ধি কৰিছিল।
যোৱা ২১ ফেব্ৰুৱাৰীত চৌতালাই দুমাহ ২৭দিন কাৰাবাসৰ সময় বাহিৰত আছিল যিটো এতিয়া ৰেহাইৰ ভিতৰত ধৰা হ’ব।
তিহাৰ জে’লৰ বিষয়াই জানিবলৈ দিয়া মতে তেওঁৰ জে’ল কৰ্তৃপক্ষৰ ওচৰত আত্মসমপৰ্ন কৰাৰ পাছতেই আনুষ্ঠানিকভাৱে মুকলি কৰি দিব।
চৌতালা, তেওঁৰ ডাঙৰ পুত্ৰ অজয় চৌতালা, আই এ এছ বিষয়া সঞ্জীৱ কুমাৰকে ধৰি আন ৫৩গৰাকীৰ ব্যক্তি ২০০০চনত ৩,২০৬গৰাকী জুনিয়ৰ বেছিক ট্ৰেইনিং শিক্ষকৰ অবৈধ নিযুক্তিৰ গোচৰত দোষী সাৱ্যস্ত হৈছিল।
২০১৩ৰ জানুৱাৰীত চিবিআইৰ এখন বিশেষ আদালতে তেওঁলোকক গোচৰটোত ব্যক্তি বিশেষে কাৰাদণ্ডৰ শাস্তি ঘোষণা কৰিছিল।
উল্লখ্য যে ২০১৮ চনত কেন্দ্ৰই ৬০ বছৰৰ উৰ্ধৰ ১০ বছৰৰ কাৰাবাস খাটি থকা কাৰাবন্দীৰ যিসকলে তেওঁলোকৰ অৰ্ধেক কাৰাবাস সম্পূৰ্ণ কৰিছে তেনে কাৰাবন্দীক মুকলি কৰি দিয়াৰ বাবে এক বিশেষ ৰেহাই আঁচনি আনিছিল।
সেই নিয়মৰ উল্লেখেৰে চৌতালাই ৰেহাইৰ বাবে দিল্লী উচ্চ ন্যায়ালয়ৰ এখন আবেদন জনাইছিল। তেঁ আবেদনত উল্লেখ কৰিছিল যে তেওঁৰ বয়স ৮৯ বছৰ আৰু শৰীৰৰ ৭০ শতাংশই দুৰ্বল।
যিয়েই নহওক, অৱশেষত পৰিস্থিতিৰ বাবে দিল্লী চৰকাৰে অনুমোদন জনোৱা ৰেহাইৰ বাবে প্ৰাক্তন মুখ্যমন্ত্ৰীগৰাকী মুকলি আকাশৰ তললৈ আহিবলৈ সাজু হৈছে।
হাৰিয়ানাৰ দৰে ৰাজ্যৰ চাৰিবাৰকৈ মুখমন্ত্ৰী পদত অধিষ্ঠিত হোৱা শক্তিশালী ৰাজনৈতিক নেতা ওম প্ৰকাশ চৌতালাই কেলেংকাৰীৰ বাবে ১০ বছৰৰ শাস্তিৰ সন্মুখীন হোৱা আৰু ইতিমধ্যে ৯ বছৰ ৬মাহ কাৰাবাস খটাৰ পাছত বাকী মুখ্যমন্ত্ৰীসকলে দুৰ্নীতি-কেলেংকাৰী সংঘটিত কৰাৰ ক্ষেত্ৰত কিবা শিক্ষা ল’বনে?
বিশেষকৈ আমাৰ উত্তৰ-পূৰ্বাঞ্চলৰ মুখ্যমন্ত্ৰী তথা নেতাসকলৰ বিৰুদ্ধে বিভিন্ন সময়ত দুৰ্নীতি-কেলেংকাৰীৰ অভিযোগ উত্থাপিত হৈ আহিছে যদিও ৰাজনৈতিক কাৰণতে হওক বা উপযুক্ত তদন্তৰ অভাৱতে হওক এতিয়ালৈকে কোনেও শাস্তিৰ সন্মুখীন হোৱা দেখা পোৱা নাই।
হাৰিয়ানাৰ প্ৰাক্তন মুখ্যমন্ত্ৰী ওম প্ৰকাশ চৌতালাই তিহাৰ জে’লত কটাৱো ১০ বছৰৰ কাৰাদাণ্ডৰ উদাহৰণে আমাৰ নেতা-মন্ত্ৰীসকলক দুৰ্নীতি-কেলেংকাৰীৰ পৰা দূৰত থকাৰ কিবা শিক্ষা দিবনে?