ডকু ছিৰিজ ‘ইন্দ্ৰাণী মুখাৰ্জী: দ্য বাৰিড ট্ৰুথ’ মুক্তিৰ পূৰ্বেই বাধাৰ সন্মুখীন হৈছিল। শ্বীনা বৰা হত্যাকাণ্ডৰ আধাৰত নিৰ্মিত এই ডকু ছিৰিজ। নেটফ্লিক্সত মুক্তি পোৱাৰ কথা আছিল এই ছিৰিজ। কিন্তু শেহতীয়াকৈ চিবিআইয়ে এই ছিৰিজ মুক্তিৰ ক্ষেত্ৰত বাধা দিয়াৰ দাবীৰে বম্বে উচ্চ ন্যায়ালয়ৰ কাষ চাপিছিল। বৃহস্পতিবাৰে উচ্চ ন্যায়ালয়ে ডকু ছিৰিজখন স্থগিত ৰখাৰ আবেদন নাকচ কৰে। এতিয়া এই ৱেব ডকু ছিৰিজখন অতি সোনকালে অ’টিটিত মুক্তি পাব।
যোৱা ২০ ফেব্ৰুৱাৰীত মুম্বাইৰ বিশেষ আদালতত এই গোচৰৰ শুনানি গ্ৰহণ কৰা হৈছিল। তেতিয়াই চিবিআইয়ে শ্বীনা বৰা হত্যাকাণ্ডৰ ডকু ছিৰিজ প্ৰচাৰৰ বাবে চিবিআইৰ আবেদন নাকচ কৰে। চিবিআইৰ বিশেষ ন্যায়াধীশ এছ পি নাইৰ নিম্বালকাৰে কয় যে আদালতৰ সম্প্ৰচাৰ বন্ধ কৰাৰ কোনো কাৰণ নাই। ইয়াৰ পিছতে চিবিআইয়ে উচ্চ ন্যায়ালয়ৰ কাষ চাপে। সেই আবেদনো বৃহস্পতিবাৰে নাকচ কৰা হৈছে।
উচ্চ ন্যায়ালয়ৰ বিভাগীয় বিচাৰপীঠৰ দুগৰাকী ন্যায়াধীশ ৰেৱতী মোহিতে দেৰে আৰু মঞ্জুছা দেশপাণ্ডে এই ৱেব ডকু-ছিৰিজখন চাইছিল। তেওঁলোকৰ মতে, শ্বীনা বৰা হত্যাকাণ্ডৰ চিবিআইয়ে চলি থকা তদন্তত বাধা দিব পৰা এই শ্ব’টোত একো নাই।
লগতে পঢ়কঃ ১ মে’ৰ পৰা বন্ধ হ’ব পাৰে ৰে’ল সেৱা! পুৰণি পেঞ্চনৰ দাবীত ধৰ্মঘটৰ আহ্বান ৰে’ল শ্ৰমিক সংগঠনৰ
তেওঁলোকে দাবী কৰে, ‘আমি নাভাবো যে তেনেকুৱা কিবা আছে। আমি প্ৰথমতে ভাবিছিলো কিবা এটা হ’ব পাৰে আৰু সেয়েহে আমিও ছিৰিজখন চাইছিলো। জনসাধাৰণৰ ধাৰণা আমাৰ উদ্বেগৰ কাৰণ নহয়। আনকি ইন্দ্ৰানীয়ে ছিৰিজখনত কোৱা কথাবোৰ ৰাজহুৱা ডমেইনতো আছে। স্পষ্টকৈ ক’বলৈ গ’লে আমি বিচাৰৰ বিৰুদ্ধে যোৱা একো বিচাৰি পোৱা নাই। আমি আপোনালোকক ছিৰিজখন চোৱাৰ সুযোগ দিছো আৰু সিদিনা আনটো পক্ষক তৰ্ক কৰিবলৈও নিদিলোঁ। অভিযুক্তক দোষী বুলি ধৰি ল’ব নোৱাৰি”।
যোৱা শনিবাৰে চিবিআইয়ে এই ডকু ছিৰিজখনকলৈ আপত্তি কৰি গোচৰ ৰুজু কৰিছিল। তেওঁলোকে দাবী কৰে যে ছিৰিজখনৰ প্ৰচাৰৰ বাবে ব্যৱহাৰ কৰা পোষ্টাৰখনত ২৫ বছৰীয়া শ্বীনা বৰাৰ নিৰুদ্দেশ আৰু তাৰ পিছত সংঘটিত হোৱা চাঞ্চল্যকৰ পৰিঘটনাসমূহৰ বিষয়ে নতুন তথ্যৰ কেপচন দিয়া হৈছে।
চিবিআইৰ অভিযোগ অনুসৰি, প্ৰমাণ প্ৰদান নকৰাকৈ আৰু অভিযুক্তৰ এখন মিডিয়া ফাৰ্মৰ সৈতে অতীতৰ সম্পৰ্ক অবিহনে, ছিৰিজখনৰ ‘পুনৰ মুক্তি’ৰ দাবীৰ প্ৰতি লক্ষ্য ৰাখি ছিৰিজৰ উপাদান/চিত্ৰনাট্য সৰবৰাহ কৰাৰ আঁৰত যুক্তিসংগত কাৰণ আছে, যাৰ বাবে তথ্যৰ সম্ভাৱ্য সালসলনি সন্দৰ্ভত চিবিআইয়ে উদ্বেগ প্ৰকাশ কৰে।
লগতে পঢ়কঃ বাৰে বাৰে পেৰ’লত মুকলি; ৰাম ৰহিমক পুনৰ জেললৈ ঘূৰাই পঠিওৱাৰ নিৰ্দেশ ক্ষুব্ধ উচ্চ ন্যায়ালয়ৰ
উল্লেখ্য যে ২৫ বছৰীয়া শ্বীনা বৰাৰ নৃশংস হত্যাকাণ্ডত সমগ্ৰ দেশ স্তম্ভিত হৈ পৰিছিল। ২০১২ চনত শ্বীনাক হত্যা কৰা হৈছিল। হত্যাকাণ্ডৰ পিছত ৩ বছৰ ধৰি ‘নিৰুদ্দেশ’ হৈ আছিল শ্বীনা। তেওঁৰ কোনো শুংসূত্ৰ পোৱা হোৱা নাছিল। ৩ বছৰৰ পাছত এই হত্যাকাণ্ডৰ কথা পোহৰলৈ আহে।
তদন্তত মাতৃ ইন্দ্ৰাণীয়ে কন্যাক হত্যা কৰাৰ ঘটনা পোহৰলৈ আহে। এই ঘটনাত দেশবাসী স্তম্ভিত হৈ পৰে। ২০১৫ চনত শ্বীনা বৰা হত্যাকাণ্ডৰ গোচৰত গ্ৰেপ্তাৰ হৈছিল মাতৃ ইন্দ্ৰাণী মুখাৰ্জী। জামিনত মুকলি হোৱাৰ পিছতো ইন্দ্ৰানীৰ বিৰুদ্ধে গোচৰ চলি আছে। এই তদন্ত চলাইছে চিবিআইয়ে।
