ৰাজ্যত পুনৰ শিক্ষক সমাজক লজ্জানত কৰা এক ঘটনা সংঘটিত হৈছে। এইবাৰ এই ঘটনা ঘটিছে বোকাখাতত। এগৰাকী প্ৰধান শিক্ষকৰ বিৰুদ্ধে উত্থাপিত হৈছে বিদ্যালয়ৰ এগৰাকী ছাত্ৰীক যৌন নিৰ্যাতনৰ অভিযোগ।
বোকাখাতৰ কাকজান বনুৱা প্ৰাথমিক বিদ্যালয়ৰ প্ৰধান শিক্ষক সুভাশীষ মুখাৰ্জীৰ বিৰুদ্ধে এগৰাকী ছাত্ৰীক যৌন উৎপীড়ন চলোৱাৰ অভিযোগ উত্থাপিত হৈছে।
অভিযোগ অনুসৰি, যোৱা বৃহস্পতিবাৰে অভিযুক্ত নিজ বিদ্যালয়ৰে এগৰাকী পঞ্চম শ্ৰেণীৰ ছাত্ৰীক বিদ্যালয় ছুটীৰ পিছত আমলখি বুটলি নিয়াৰ চলেৰে ঘৰৰ পৰা লৈ যায় কাষৰে এখন চাহ বাগিচালৈ।
ইফালে চাহ বাগিচাৰ মাজৰ নিৰ্জন এলেকাত শিক্ষক গৰাকীয়ে ছাত্ৰী গৰাকীক গালত চুমা খোৱাৰ লগতে গোপন অংগতো হাত দিয়ে।
আনহাতে শিক্ষক গৰাকীৰ এনে কাৰ্যত বাধা দিয়াৰ লগতে পলায়নৰ চেষ্টা কৰা ছাত্ৰীগৰাকীক এইকথা পৰিয়ালৰ আগত অৱগত নকৰিবলৈও ভাবুকি প্ৰদান কৰে শিক্ষকগৰাকীয়ে।
অৱশ্যে কোনোমতে উক্ত স্থানৰ পৰা পলায়ন কৰি অৱশেষত অকলেই ঘৰত উপস্থিত হয়গৈ ছাত্ৰী গৰাকী। ইফালে নিশালৈ মাতৃৰ আগত ঘটনাৰ সবিশেষ বিৱৰি কয় ছাত্ৰী গৰাকীয়ে।
ইফালে ঘটনাৰ পিছদিনাই বিদ্যালয়ত ৰাজহুৱা সভাৰ আয়োজন কৰে স্থানীয় ৰাইজে। সভাত শিক্ষক গৰাকীয়ে নিজৰ ভুল স্বীকাৰ কৰাৰ লগতে ক্ষমা বিচাৰে ছাত্ৰী গৰাকীৰ পিতৃ-মাতৃৰ লগতে স্থানীয় ৰাইজৰ ওচৰত।
শিক্ষকতা বৃত্তিত নিয়োজিত এগৰাকী ব্যক্তিৰ এনে লজ্জাজনক কাণ্ডক লৈ ধিক্কাৰ দিয়াৰ লগতে শিক্ষক গৰাকীৰ শাস্তিমুলক দাবীৰে যোৱা শনিবাৰে অভিভাৱকৰ লগতে স্থানীয় ৰাইজে এক গোচৰ দাখিল কৰিছে বোকাখাত আৰক্ষী থানাত।
কিন্তু ইয়াৰ পিছতে অভিযুক্ত প্ৰধান শিক্ষক সুভাশীষ মুখাৰ্জী পলাতক বুলি জানিব পৰা গৈছে। পলাতক মুখাৰ্জীৰ সন্ধানত অভিযান অব্যাহত ৰাখিছে বুলি আৰক্ষীয়ে জানিবলৈ দিয়ে।
