উচ্চতম ন্যায়ালয়ৰ ধমক। প্ৰদূষণক লৈ নাগৰিকৰ অসন্তুষ্টি। এই হেঁচাত কেন্দ্ৰই পৰিৱেশ সুৰক্ষা আইনৰ অধীনত জৰিমনা বিধিৰ বৃহৎ পৰিৱৰ্তন আনিলে। এতিয়াৰে পৰা কৃষকসকলে কৃষিভূমিত শস্যৰ শিপা জ্বলাই দিলে যথেষ্ট জৰিমনা ভৰিব লাগিব।
দৰাচলতে শস্যৰ শিপা জ্বলোৱাৰ বাবে সমগ্ৰ উত্তৰ ভাৰত শীতকালৰ আৰম্ভণিতে প্ৰদূষণৰ আৱৰণে আৱৰি থাকে। এইবাৰো নৱেম্বৰৰ আৰম্ভণিৰ পৰা দিল্লী আৰু কাষৰীয়া অঞ্চলত প্ৰদূষণৰ সমস্যা। উচ্চতম ন্যায়ালয়ত কেইবাটাও গোচৰ ৰুজু হৈছে। অভিযোগ উত্থাপন হৈছে যে মূলতঃ পঞ্জাৱ আৰু দিল্লীৰ সীমান্তত কৃষকসকলে শস্য জ্বলোৱাৰ বাবে ৰাজধানী দিল্লীৰ লগতে উত্তৰ ভাৰতৰ এক বৃহৎ অঞ্চলত আকাশত ধোঁৱাৰ আৱৰণৰ সৃষ্টি হয়। বিগত সময়ত এই শস্যৰ জ্বলন নিয়ন্ত্ৰণত ব্যৰ্থ হোৱাৰ বাবে দিল্লী, পঞ্জাৱ আৰু কেন্দ্ৰীয় চৰকাৰে উচ্চতম ন্যায়ালয়ৰ তীব্ৰ সমালোচনাৰ সন্মুখীন হৈছে।
শেহতীয়াকৈ উচ্চতম ন্যায়ালয়ে কেন্দ্ৰৰ প্ৰদূষণ বিৰোধী আইনক ভিত্তিহীন বুলি তীব্ৰ সমালোচনা কৰিছে। ইয়াৰ পিছত বুধবাৰে কেন্দ্ৰই নতুন অধিসূচনা জাৰি কৰি ভূমিত শস্য জ্বলোৱাৰ শাস্তি দুগুণ কৰাৰ সিদ্ধান্ত গ্ৰহণ কৰে। কেৱল এয়াই নহয়, অনুমতি অবিহনে শস্য জ্বলোৱা কৃষকৰ বিৰুদ্ধে আইনী ব্যৱস্থা লোৱাৰ সকীয়াই দিছে।
কেন্দ্ৰীয় চৰকাৰৰ নতুন অধিসূচনা অনুসৰি ২ একৰতকৈও কম মাটিত শস্যৰ শিপা জ্বলাই দিলে ৫ হাজাৰ টকাৰ জৰিমনা ভৰিব লাগিব। দুইৰ পৰা পাঁচ একৰ মাটিত শস্য জ্বলোৱাৰ শাস্তি ১০ হাজাৰ টকা। যিসকলৰ মাটি ৫ একৰতকৈ অধিক হ’ব তেওঁলোকে ৩০ হাজাৰ টকা জৰিমনা ভৰিব লাগিব। কিন্তু এনেদৰে জৰিমনা বৃদ্ধি কৰি প্ৰদূষণ নিয়ন্ত্ৰণ কৰা সম্ভৱনে সেয়া প্ৰশ্নই হৈ আছে।
