গুৱাহাটীত ৰাজভৱনলৈ যোৱা পথত ভয়ংকৰ ভূমিস্খলন
গুৱাহাটীৰ খাৰঘূলিত ৰাজভৱনলৈ যোৱা পথত সংঘটিত হৈছে এক ভয়ংকৰ ভূমিস্খলনৰ ঘটনা।
আজি বিয়লিভাগত এই ভূমিস্খলনৰ ঘটনা সংঘটিত হৈছে।
যিকোনো মুহূৰ্তত সেই অঞ্চলটোত সৃষ্টি হ’ব পাৰে ভয়ংকৰ পৰিবেশৰ। সেই আশংকা কৰিয়েই বৰঠাকুৰ ক্লিনিক আৰু নাৰ্ছিং হোম বন্ধ ৰখাৰ নিৰ্দেশ দিছে কামৰূপ মহানগৰ জিলা প্ৰশাসনে।
বৰঠাকুৰ ক্লিনিকৰ ১০১ নং কোঠাৰ খিৰিকি শিলৰ টুকুৰা পৰি ভাঙি যোৱা বুলি জানিব পৰা গৈছে।
এক জাননী যোগে কামৰূপ মহানগৰ জিলা উপায়ুক্তই চিকিৎসক-নাৰ্ছ আৰু ৰোগীসকলক স্থানান্তৰ কৰি হাস্পতাল খালি কৰাৰ নিৰ্দেশ দিয়াৰ লগতে হাস্পতালখন ছীল কৰি দিয়া হ’ব বুলি উল্লেখ কৰিছে।
উক্ত নাৰ্ছিংহোমখন পাহাৰৰ কাষত থকা বাবে যিকোনো মুহূৰ্তত ভূমিস্খলন হৈ ভয়ংকৰ বিপদৰ সন্মুখীন হ’ব পাৰে।
ইয়াৰোপৰি ৰাজভৱনৰ পাছফালে থকা ব্ৰহ্মপুত্ৰ গাৰ্ড ৱালখনো বিপদজনক অৱস্থাত আছে বুলি নিৰ্দেশনাটোত কোৱা হয়।
উল্লেখযোগ্য যে কিছুদিন ধৰি পুৱাৰ ভাগৰ পৰা দুপৰীয়া ভাগলৈকে নেৰা-নেপেৰা বৰষুণ দি থকাৰ ফলত মহানগৰীত ভূমিস্খলনৰ ঘটনা বৃদ্ধি পাইছে।
কালি মহানগৰীৰ কাহিলীপাৰাত গাৰ্ডৱাল খহি পৰি পাৱাৰ হাউছৰ সমীপৰ এটা গৃহ সম্পূৰ্ণৰূপে ভাঙি পৰাৰ লগতে তিনিগৰাকী লোক গুৰুতৰভাৱে আঘাতপ্ৰাপ্ত হয়। ইয়াৰে এগৰাকীয়ে মৃত্যুক সাবটি লয়।
ইয়াৰ উপৰি কালিৰ দিনটোতে উত্তৰ গুৱাহাটীৰ আমিনগাঁৱত বৌদ্ধ মন্দিৰৰ কাষত ভূমিস্খলন হৈ ৩১ নং ৰাষ্ট্ৰীয় ঘাইপথ আৱদ্ধ হৈ পৰিছল, যাৰ ফলত সেই পথেৰে গুৱাহাটীলৈ আহ-যাহ সম্পূৰ্ণৰূপে বন্ধ হৈ পৰিছে।