বাহিৰত প্ৰতিবাদ অব্যাহত আছে। উত্তৰাখণ্ডৰ নিৰ্মাণাধীন সুৰংগটোৰ ভিতৰত এসপ্তাহৰো অধিক সময় আবদ্ধ হৈ আছে ৪১ জন শ্ৰমিক। তেওঁলোকৰ উদ্ধাৰ পদ্ধতি সলনি কৰাৰ পিছতো সফলতা লাভ কৰা নাই। প্ৰতিবাদথলীৰ পৰা প্ৰশ্ন কৰা হৈছে প্ৰধানমন্ত্ৰীয়ে ক্ৰিকেট বিশ্বকাপৰ ফাইনেল চাবলৈ যাব পাৰে, কিন্তু আৱদ্ধ শ্ৰমিকৰ উদ্ধাৰ চাবলৈ আহিব নোৱাৰে। বিয়পি পৰিছে প্ৰতিবাদ।
প্ৰতিবাদকাৰী শ্ৰমিক সকলৰ প্ৰশ্ন হ’ল, ‘মোদীজী চন্দ্ৰলৈ গ’লে কি হ’ব? সুৰংগৰ ভিতৰৰ পৰা শ্ৰমিকসকলক শীঘ্ৰে উদ্ধাৰ কৰক।‘
কেন্দ্ৰীয় আৰু ৰাজ্যিক সংস্থাসমূহৰ মাজত পাৰস্পৰিক সমন্বয়ৰ জৰিয়তে শ্ৰমিকসকলক নিৰাপদে উদ্ধাৰ কৰা হ’ব বুলি প্ৰধানমন্ত্ৰীয়ে কয়। আৱদ্ধ শ্ৰমিকসকলৰ মনোবল বজাই ৰাখিব লাগে বুলিও তেওঁ কয়। মুখ্যমন্ত্ৰী ধামীয়ে কয় যে সুৰংগটোত আবদ্ধ হৈ থকা শ্ৰমিকসকল নিৰাপদ। চৰকাৰে সকলো সংস্থাৰ পৰা এতিয়ালৈকে উদ্ধাৰ অভিযানত অগ্ৰগতিৰ প্ৰতিবেদন বিচাৰিছে ।
উত্তৰাখণ্ডৰ উত্তৰকাশীৰ নিৰ্মাণাধীন সুৰংগত আবদ্ধ হৈ থকা ৪১ জন শ্ৰমিকৰ উদ্ধাৰ অভিযান নৱম দিনত ভৰি দিয়াৰ লগে লগে আৱদ্ধ শ্ৰমিকসকলৰ ওচৰলৈ গৈ উদ্ধাৰৰ বাবে বিভিন্ন সংস্থাক কেনেদৰে বিভিন্ন দায়িত্ব দিয়া হৈছিল সেই কথা জানিব পৰা গৈছে।
১২ নৱেম্বৰত ভাঙি পৰা ছিলকিয়াৰা সুৰংগটোৰ বৰকোট মূৰত উলম্ব ড্ৰিলিং আৰম্ভ কৰিছে অ’এনজিচিয়ে। সোমবাৰে অ’এনজিচিৰ ড্ৰিলিং মুৰব্বীগৰাকীয়ে স্থান পৰিদৰ্শন কৰিব আৰু পিছদিনা প্ৰতিবেদন দাখিল কৰাৰ সম্ভাৱনা আছে।
ইয়াৰ পিছত ২২ নৱেম্বৰ (বুধবাৰ)ৰ ভিতৰত অ’এনজিচিৰ প্ৰতিবেদনৰ ভিত্তিত পথ প্ৰান্তিককৰণ চূড়ান্ত কৰিব বিআৰঅ’ই। ছিলকিয়াৰা শেষত উলম্ব ড্ৰিলিঙৰ দায়িত্ব ৰেল বিকাশ নিগম লিমিটেডক অৰ্পণ কৰা হৈছে। দেওবাৰে বিআৰঅ’ই সুৰংগটোলৈ যোৱা মুঠ পৰিকল্পিত ১১৫০ মিটাৰ পথৰ ভিতৰত ৯৭০ মিটাৰ পথ সম্পূৰ্ণ কৰে। বাকী থকা দূৰত্ব সোমবাৰৰ ভিতৰত সম্পূৰ্ণ কৰাৰ সম্ভাৱনা আছে। সূত্ৰ অনুসৰি, ২৬ নৱেম্বৰ (দেওবাৰ)ৰ ভিতৰত উলম্ব ড্ৰিলিং সম্পূৰ্ণ হোৱাৰ কথা।
আৰভিএনএলে নিৰ্দিষ্ট সঁজুলি ব্যৱহাৰ কৰি ১৭০ মিটাৰ দৈৰ্ঘ্যৰ সুৰংগ নিৰ্মাণৰ পৰিকল্পনা কৰিছে, যিটো ২১ নৱেম্বৰৰ ভিতৰত (মঙলবাৰ) স্থানত উপস্থিত হ’ব। ২৩ নৱেম্বৰ (বৃহস্পতিবাৰ)ৰ ভিতৰত এই ছেটআপ সম্পূৰ্ণ হোৱাৰ সম্ভাৱনা আছে।
ছাইট এচেছমেণ্ট আৰু জনশক্তি ক্ৰয় সম্পূৰ্ণ কৰাৰ পিছত টি এইচ ডি চি ইণ্ডিয়া লিমিটেডক ৪৮৩ মিটাৰ দৈৰ্ঘ্যৰ সুৰংগ নিৰ্মাণৰ দায়িত্ব অৰ্পণ কৰিছে। সোমবাৰৰ পৰা আৰম্ভ হ’ব টানেল ব’ৰিং।
ৰাষ্ট্ৰীয় ঘাইপথ আৰু আন্তঃগাঁথনি উন্নয়ন নিগম লিমিটেডক এই সুৰংগটো শক্তিশালী কৰাৰ দায়িত্ব দিয়া হৈছে। জৰুৰীকালীন সেৱাৰ বাবে ধ্বংসাৱশেষৰ মাজেৰে ১৫০ মিমি ষ্টীলৰ পাইপ বিছাৰিছে আৰু তৃতীয়বাৰৰ বাবে চেষ্টা চলাই আছে। ১-১.২ মিটাৰ ব্যাসৰ ব’ৰহ’ল খন্দাৰ দায়িত্ব অৰ্পণ কৰা হৈছে সাতলুজ জাল বিদ্যুৎ নিগম লিমিটেড (SJVNL)ক। আজি অৰ্থাৎ সোমবাৰৰ পৰা কাম আৰম্ভ হোৱাৰ কথা।
অগ্ৰগতি নিৰীক্ষণৰ বাবে স্থানত আছে সেনা। সুৰংগ স্থানত উপস্থিত হৈছে এখন ড্ৰোন, যিয়ে আকাশী নিৰীক্ষণত সহায় কৰিব আৰু প্ৰকল্পটোৰ সুদক্ষ ৰূপায়ণত সহায় কৰিব।আই এ এছ বিষয়া নীৰজ খেৰৱাল, ন’ডেল বিষয়া আজি ছিলকিয়াৰা সুৰংগত উপস্থিত হোৱাৰ সম্ভাৱনা আছে।
গড়কাপ্তানী, পৰিবহণ আৰু ঘাইপথ সচিব অনুৰাগ জৈনে দেওবাৰে কয় যে চৰকাৰে ৪১ জন শ্ৰমিকলৈ মাল্টিভিটামিন, এন্টিডিপ্ৰেছন আৰু ড্ৰাই ফ্ৰুট প্ৰেৰণ কৰিছে। শুকুৰবাৰে বিয়লি স্থগিত ৰখা হয় উদ্ধাৰ অভিযান। ৮০০ মিলিমিটাৰ ব্যাসৰ সাতটা পাইপ সুমুৱাই দিয়া হয়। ছয় ইঞ্চি ব্যাসৰ পাইপ এতিয়াও শ্ৰমিকসকলৰ ওচৰলৈ যাব পৰা নাই, যাৰ ফলত তেওঁলোকৰ বাবে উপযুক্ত খাদ্য যোগান নিশ্চিত হ’ব।
দেওবাৰে সেই স্থান পৰিদৰ্শন কৰাৰ পিছত কেন্দ্ৰীয় পথ পৰিবহণ মন্ত্ৰী নীতিন গাডকাৰীয়ে কয় যে তেওঁ ডেৰ-দুই দিনৰ ভিতৰত এক অগ্ৰগতি লাভৰ আশা কৰিছে। শ্ৰমিকসকলক উদ্ধাৰৰ বাবে চলি থকা সাহায্য আৰু উদ্ধাৰ অভিযান সন্দৰ্ভত প্ৰধানমন্ত্ৰী নৰেন্দ্ৰ মোদীয়ে উত্তৰাখণ্ডৰ মুখ্যমন্ত্ৰী পুষ্কৰ সিং ধামীৰ সৈতে ফোনযোগে কথা পাতিছে।
