গুজৰাটত তিনি মহলীয়া ঘৰ ভাঙি এগৰাকী বৃদ্ধা আৰু নাতিনী দুগৰাকীৰ মৃত্যু হয়। দীৰ্ঘসময় ধৰি ধ্বংসাৱশেষত আবদ্ধ হৈ আছিল তিনিও। উদ্ধাৰ অভিযানৰ অন্তত বুধবাৰে আৰক্ষীয়ে জনোৱা মতে, তিনিওজনৰ মৃত্যু হৈছে।
মঙলবাৰে নিশা দ্বাৰকা জিলাৰ জাম খাম্বলিয়া চহৰত সংঘটিত হয় এই ঘটনা। স্থানীয় সূত্ৰৰ পৰা জানিব পৰা মতে, মহানগৰীৰ গগনৱালি অঞ্চলৰ তিনিমহলীয়া ঘৰটো কেইবাদিনো বিপদজনক অৱস্থাত আছিল। মঙলবাৰে হোৱা নেৰানেপেৰা বৰষুণৰ ফলত ঘৰৰ এটা অংশ ভাঙি পৰে। এগৰাকী বৃদ্ধা আৰু নাতিনী দুগৰাকী ঘৰত আছিল। ইয়াৰ পাছত মাজনিশালৈকে ছয় ঘণ্টীয়া দীঘলীয়া উদ্ধাৰ অভিযানৰ অন্তত তিনিজনৰে মৃতদেহ উদ্ধাৰ কৰা হয়। ইয়াৰ বাহিৰেও সেই ঘৰৰ আন পাঁচজন বাসিন্দা আছিল। আৰক্ষীৰ সূত্ৰ অনুসৰি তেওঁলোককো উদ্ধাৰ কৰা হৈছে।
ৰাষ্ট্ৰীয় দুৰ্যোগ সঁহাৰি বাহিনী (এন ডি আৰ এফ), আৰক্ষী আৰু অগ্নিনিৰ্বাপক বাহিনীৰ কেইবাটাও দলৰ একত্ৰিত প্ৰচেষ্টাত ধ্বংসাৱশেষ পৰিষ্কাৰ কৰা সম্ভৱ হৈ উঠিছিল। ৫জন আহত লোকক প্ৰাথমিক চিকিৎসাৰ বাবে স্থানীয় চিকিৎসালয়লৈ প্ৰেৰণ কৰা হৈছে। আৰক্ষীয়ে জনোৱা মতে, নিহত দুজন হৈছে কেশৰবেন কাঞ্জৰিয়া (৬৫), প্ৰীতিবেন কাঞ্জৰিয়া (১৫) আৰু পয়ালবেন কাঞ্জৰিয়া (১৮)।
যোৱা কেইবাদিনো ধৰি ধাৰাসাৰ বৰষুণৰ ফলত গুজৰাট বুৰাই পেলাইছে। বুধবাৰে পুৱালৈকে গুজৰাটত বন্ধ নহ’ল বৰষুণ। বিপদসীমাৰ ওপৰেৰে বৈ আছে কেইবাখনো নদী। সৌৰাষ্ট্ৰ আৰু দক্ষিণ গুজৰাট জিলাত ধাৰাসাৰ বৰষুণৰ পৰা অতি ধাৰাসাৰ বৰষুণ হয়। কেৱল চুৰাটৰ উমৰপাৰা তালুকত যোৱা ২৪ ঘন্টাত ২৭৬ মিলিমিটাৰ বৰষুণ হৈছে। নৱসাৰি, জুনাগধ, দ্বাৰকা, কুচ, ডাং আৰু টাপি জিলাতো ধাৰাসাৰ বৰষুণ সংঘটিত হয়। অবিৰত বৰষুণৰ ফলত তুলনামূলকভাৱে নিম্নভূমি অঞ্চলত বানপানীৰ সৃষ্টি হৈছে। ইফালে প্ৰশাসনে বাসিন্দাসকলক প্ৰয়োজন নহ’লে ঘৰৰ পৰা ওলাই নাযাবলৈ পৰামৰ্শ দিয়ে।
