অসম চুক্তিৰ ৬নং দফা কাৰ্য্যকৰীকৰণ পৰ্য্যালোচনাৰ বাবে শনিবাৰে গঠন কৰা উচ্চস্তৰীয় সমিতিত কেন্দ্ৰই আছুলৈ আগবঢ়োৱা প্ৰতিনিধিত্বৰ প্ৰস্তাৱ পোনচাটে প্ৰত্যাখ্যান কৰিছে সমুজ্জ্বল ভট্টাচাৰ্য্যই।
যোৱা বুধবাৰে বহা নৰেন্দ্ৰ মোদী কেবিনেটৰ অনুমোদন মৰ্মে গঠিত সমিতিখনক “অৰ্থহীন”ৰূপে অভিহিত কৰিছে আছুৰ মুখ্য উপদেষ্টাজনে।
“কেন্দ্ৰীয় চৰকাৰে অসম চুক্তিৰ ৬নং দফা ৰূপায়ণ কৰাৰ বাবে সমিতি গঠন কৰাৰ কথা কোৱাৰ বিপৰীতে নাগৰিকত্ব সংশোধনী বিধেয়কৰ জৰিয়তে ৫নং দফা উলংঘা কৰিব বিচাৰিছে। গতিকে এই সমিতিখন অৰ্থহীন,” নৰ্থ ইষ্ট নাও-ত মন্তব্য ভট্টাচাৰ্য্যৰ।
আছুৰ মুখ্য উপদেষ্টা হোৱাৰ লগতে উত্তৰ-পূবৰ সমূহ জাতীয় ছাত্ৰ সংগঠনৰ প্ৰধান মুখ ভট্টাচাৰ্য্যই বিজেপি নেতৃত্বাধীন কেন্দ্ৰীয় চৰকাৰৰ প্ৰস্তাৱ প্ৰত্যাখ্যান কৰাতো ৰাজনৈতিকভাৱে অত্যন্ত তাৎপৰ্য্যপূৰ্ণৰূপে পৰিগণিত হৈছে। অসমীয়াৰ সাংবিধানিক সুৰক্ষাৰ প্ৰতিশ্ৰুতি বহনকাৰী অসম চুক্তিৰ ৬নং দফা কাৰ্য্যকৰীকৰণ আৰু একে সময়তে ৰাজ্যৰ খিলঞ্জীয়াই সৰ্বাত্মক বিৰোধ কৰা নাগৰিকত্ব বিধেয়কলৈ খোদ প্ৰধান মন্ত্ৰী নৰেন্দ্ৰ মোদীৰ শেহতীয়া সমৰ্থন আসন্ন লোকসভা নিৰ্বাচনলৈ লক্ষ্য ৰাখি আগবঢ়োৱা বিজেপি চৰকাৰৰ টোপৰূপে ৰাজ্যজুৰি সমালোচিত হৈছিল।
লগতে পঢ়ক– মোদী কেবিনেটৰ সিদ্ধান্তসমূহ: অসম চুক্তিৰ ৬নং দফা আৰু বড়ো দাবী সন্দৰ্ভত
লগতে পঢ়ক– আছুৰ বন্ধলৈ সৰ্বাত্মক সমৰ্থন ৭০টা সংগঠনৰ
মোদী কেবিনেটৰ অনুমোদনক্ৰমে কেন্দ্ৰৰ গৃ্হ বিভাগে গঠন কৰা সমিতিখনত অধ্যক্ষৰূপে লোৱা হৈছে অৱসৰপ্ৰাপ্ত আই এ এছ বিষয়া মদন প্ৰসাদ বেজবৰুৱাক।
আছুৰ এজনলৈ প্ৰতিনিধিত্বৰ প্ৰস্তাৱেৰে সমিতিখনত সদস্যৰূপে ৰখা হৈছে অৱসৰপ্ৰাপ্ত আই এ এছ বিষয়া সুভাষ দাস, অসম সাহিত্য সভাৰ প্ৰাক্তন সভাপতি, প্ৰাক্তন সাংসদ অধ্যাপক নগেন শইকীয়া, জ্যেষ্ঠ সাংবাদিক ধীৰেন্দ্ৰ নাথ বেজবৰুৱা, লখিমপুৰ ছোৱালী মহাবিদ্যালয়ৰ প্ৰাক্তন অধ্যক্ষ মুকুন্দ ৰাজবংশী, অসমৰ মহাধিবক্তা ৰমেশ বৰপাত্ৰগোহাঁই আৰু অসম সাহিত্য সভাৰ প্ৰাক্তন সভাপতি ৰংবং তেৰাঙক।
গৃহ মন্ত্ৰ্যালয়ৰ যুটীয়া সচিব সমিতিখনৰ সদস্য সচিবৰূপে থাকিব।
সমিতিখনে পৰৱৰ্তী ৬ মাহৰ ভিতৰত ইয়াৰ প্ৰতিবেদন দাখিল কৰিব লাগিব আৰু এই ক্ষেত্ৰত সকলো প্ৰশাসনীয় আৰু যাৱতীয় সহযোগিতা আগবঢ়াব ৰাজ্য চৰকাৰে।
