সমগ্ৰ ৰাজ্যজুৰি চলি থকা নাগৰিকত্ব সংশোধনী বিধেয়ক বিৰোধী প্ৰতিবাদটোক লঘু আৰু বদনামী কৰিবলৈ অহৰহ চেষ্টা চলাই অহা মন্ত্ৰী হিমন্তই এইবাৰ অৰ্ণমাই বৰা, বদৰুদ্দিনক আজমলক এৰি ‘আলফা’ক টানি আনিছে।
‘‘আন্দোলনটোৱে এটা বেলেগ দিশত গতি লৈছে’’, এইদৰে কৈ আজি মন্ত্ৰীজনেও আন্দোলনটোৰ প্ৰসংগত আগৰ কথাবোৰৰ পৰা ফালৰি কাটে।
আন্দোলনটোক নিয়ন্ত্ৰণ কৰা শক্তি বিদেশত আছে আৰু এই কথাটো চৰকাৰৰ মানুহ হিচাপে তেওঁ নিজে গম পাই থকা বুলি জানিবলৈ দিয়ে। তেওঁ লগতে দাবী কৰে, “আন্দোলনটোত ক’ৰবাত নহয় ক’ৰবাত আলফাই ভূমিকা লৈ আছে।”
‘‘তিনিচুকীয়াত কোনে ফোন কৰি প্ৰতিবাদ উলিয়াইছে? আমিও আন্দোলন দেখিছো। বিদেশৰ পৰা এটা ফোন আহিছে যে প্ৰতিবাদ উলিয়াওক’’, তিনিচুকীয়াৰ ঘটনা সন্দৰ্ভত সাংবাদিকৰ প্ৰশ্নৰ উত্তৰত হিমন্ত বিশ্ব শৰ্মাৰ মন্তব্য।
তেওঁ কালৈ কেতিয়া বিদেশৰ পৰা ফোন আহে চৰকাৰত থকা মানুহ হিচাপে সেয়া গম পাই থকা বুলি দাবী কৰে। তেওঁৰ মতে অসমৰ কিছুমান মানুহৰ ফোনত বিদেশৰ পৰা অহৰহ ফোন আহি আছে।
‘‘কাৰ ওচৰলৈ ফোন আহি আছে, কোন সাংবাদিকলৈ ফোন আহি আছে, চৰকাৰত থাকি আমি গম পাই আছো’’, সংবাদ মাধ্যমকো অসমৰ পৰিস্থিতিৰ বাবে জগৰীয়া কৰি মন্ত্ৰীজনৰ এই দাবী।
অৱশ্যে মন্ত্ৰীজনৰ আজি এই নতুন সূত্ৰৰ আৱিষ্কাৰক কটাক্ষ কৰা দেখা গৈছে বহুতক। ধৰ্ষণ আৰু হত্যাৰ বলি হোৱা ‘অৰ্ণমাই বৰা’ৰ নাম ব্যৱহাৰ কৰিবলৈ গৈ হিতে বিপৰীত হোৱা দেখিয়ে মন্ত্ৰীজনৰ এই নতুন সূত্ৰ আৱিষ্কাৰ বুলি ছ’চিয়েল মিডিয়াত বহুতক মন্তব্য কৰা দেখা গৈছে।