ৰাজ্যখনৰ এচাম বুদ্ধিজীৱীয়ে আলফালৈ যুৱক যোৱাৰ কথা কৈ পৰেশ বৰুৱাক লাইমলাইটলৈ আনিব বিচাৰে। বৃহস্পতিবাৰে তিনিচুকীয়াত নিৰ্বাচনী প্ৰচাৰ চলাবলৈ আহি বিত্ত মন্ত্ৰী হিমন্ত বিশ্ব শৰ্মাই এইদৰে মন্তৱ্য কৰে।
উল্লেখযোগ্য যে কিছুদিন পূৰ্বে মন্ত্ৰী শৰ্মাই আলফালৈ প্ৰতি বছৰে শ শ ল’ৰা যোৱাটো কোনো নতুন কথা নহয় বুলি মন্তব্য কৰিছিল। কিন্তু তিনিচুকীয়াৰ নিৰ্বাচনী প্ৰচাৰত মন্ত্ৰী গৰাকীৰ সুৰ এইবাৰ সলনি হোৱা দেখা গ’ল। মন্ত্ৰী শৰ্মাই এইবাৰ বুদ্ধিজীৱীকহে তেওঁৰ আক্ৰমণৰ লক্ষ্য কৰি লয়।
পঞ্চায়ত নিৰ্বাচনৰ প্ৰচাৰৰ মুখ্য দায়িত্বত থকা মন্ত্ৰী গৰাকীয়ে কয়, ‘’ আলফালৈ যোৱা যুৱক এজনৰ বাতৰিটোৱে পৰিয়ালক কিমান দুখ দিয়ে সেয়া বুদ্ধিজীৱীসকলে উপলব্ধি কৰিব নোৱাৰে। টিভিৰ আলোচনাত ভাগ লৈ আলফালৈ যুৱক যোৱা প্ৰসংগত চিঞৰি থকা সকলৰ ল’ৰাই আলফালৈ কেতিয়াও নাযায়। গাঁৱৰ যুৱকহে আলফালৈ যায়।‘’
বৃহস্পতিবাৰে তিনিখনকৈ নিৰ্বাচনী সভাত অংশ গ্ৰহণ কৰিবলৈ অহা মন্ত্ৰী গৰাকীয়ে হেলিকপ্টাৰ যোগে বাহাদুৰ চালিআলি ৰংগমঞ্চত বিয়লি অনুষ্ঠিত এখন নিৰ্বাচনী প্ৰচাৰ সভাত অংশগ্ৰহণ কৰে।
মন্ত্ৰী শৰ্মাই ভাষণ প্ৰসংগত এচাম বৃদ্ধিজীৱীয়ে ন-অসমীয়া বনোৱাৰ ফেক্টৰী খুলিছে বুলি কৈ কটাক্ষ কৰে। পূৰ্বৰ কংগ্ৰেছ চৰকাৰক কেৱল সূতা-কম্বলৰ ৰাজনীতিতে আবদ্ধ হৈ থকা আৰু কংগ্ৰেছৰ দিনত গ্ৰামাঞ্চলসমূহত উন্নয়ন স্থবিৰ হৈ পৰা বুলি উল্লেখ কৰি কংগ্ৰেছক চোকা সমালোচনা কৰে।
কংগ্ৰেছৰ দিনত হোৱা দুৰ্নীতি এতিয়া নোহোৱা হৈছে বুলি উল্লেখ কৰি শৰ্মাই এইবাৰ সম্পূৰ্ণ স্বচ্ছ ৰূপত এপিএছচিৰ পৰীক্ষাৰ ফল ওলোৱা বুলি দাবীও কৰে। বৃহস্পতিবাৰে নিৰ্বাচনী সভাত কেইবা হাজাৰ লোকৰ উপস্থিতিত মন্ত্ৰী গৰাকীয়ে বিজেপিৰ সপক্ষে ভোট দিয়াৰ বাবে ৰাইজক আহ্বান জনায়।