‘’কংগ্ৰেছত থাকি ২৫ টা বছৰ অপচয় কৰাৰ বাবে মই অনুতপ্ত। মই যেতিয়া ভাৰতীয় জনতা যুৱ মৰ্চাৰ সদস্যসকলক লগ পাওঁ, আপোনালোক সকলোৱে ‘ভাৰত মাতা কি জয়’ ধ্বনি দিয়া দেখি অন্তৰ চুই যায়। কংগ্ৰেছত আমাক ‘ৰাহুল গান্ধী কি জয়’ শিকোৱা হৈছিল।‘’
তেলেংগানাৰ হায়দৰাবাদত চলি থকা ভাৰতীয় জনতা যুৱ মৰ্চাৰ যুৱ মহা অধিৱেশনত দেওবাৰে ভাষণ দি অসমৰ বিত্ত মন্ত্ৰী হিমন্ত বিশ্ব শৰ্মাই এইদৰে কয়। তেওঁ এই ভাষণত ভাৰতীয় জাতীয় কংগ্ৰেছৰ সভাপতি ৰাহুল গান্ধীক আক্ৰমণৰ প্ৰধান লক্ষ্য কৰি লয়।
কংগ্ৰেছক ক্ষুৰধাৰ সমালোচনা কৰি শৰ্মাই কয় যে ৰাফেল চুক্তিৰ বিষয়টোত কংগ্ৰেছ দলে পাকিস্তানৰ সৈতে মিলি ভাৰতক অস্থিৰ কৰাৰ ষড়যন্ত্ৰত লিপ্ত হৈছে।
কংগ্ৰেছে স্বাধীনতা সংগ্ৰামত গুৰুত্বপূৰ্ণ বৰঙণি যোগোৱা সুভাষ চন্দ্ৰ বসু আৰু চৰ্দাৰ বল্লভ ভাই পেটেলক অৱজ্ঞা কৰি আহিছে বুলি উল্লেখ কৰি শৰ্মাই কয় যে কংগ্ৰেছৰ সভাবোৰত মহাত্মা গান্ধী, চৰ্দাৰ বল্লভ ভাই পেটেল, সুভাষ চন্দ্ৰ বসুৰ নাম লোৱা নহয়।
তেওঁ লগতে কয় যে প্ৰধানমন্ত্ৰী নৰেন্দ্ৰ মোডীৰ নেতৃত্বৰ বৰ্তমান বিজেপি চৰকাৰে চৰ্দাৰ পেটেল, সুভাষ বসু, গোপীনাথ বৰদলৈৰ দৰে নেতাসকলৰ বৰঙণিৰ কথা স্বীকাৰ কৰে।
বিজেপিৰ অৰ্বাচীন নেতাজনে লগতে কয় যে নেহৰুৱে চীনৰ আক্ৰমণৰ সময়ত অসমক প্ৰায় এৰি দিছিল, কিন্তু প্ৰধান মন্ত্ৰী নৰেন্দ্ৰ মোডীয়ে অসম তথা উত্তৰ-পূৰ্বাঞ্চলক অৱিচ্ছেদ্য অংগ বুলি কয়। প্ৰধানমন্ত্ৰী আৰু বিজেপিৰ সভাপতি অমিত শ্বাহে উত্তৰ-পূৰ্বাঞ্চলক ৰাষ্ট্ৰীয় মূলসুঁতিলৈ অনাৰ বাবে নিৰৱিচ্ছিন্নভাৱে কাম কৰি আছে।
অনুষ্ঠানত উপস্থিত থকা বিজেপিৰ যুৱ মৰ্চাৰ সদস্যসকলৰ আগত তেওঁ উদাত্ত কণ্ঠে কয় যে আগন্তুক ২০১৯’ৰ লোকসভা নিৰ্বাচনত আকৌ এবাৰ বিজেপিয়ে ৪০০ তকৈয়ো অধিক আসনত বিজয়ী হ’ব।
