বাংলাদেশত বৃদ্ধি হিন্দুৰ সংখ্যা, পূৰাদমে চলি আছে ধৰ্ম চৰ্চা; নিৰ্য্যাতন ক’ত?

ওপৰৰ ছবিখন বাংলাদেশত ভাৰতীয় উচ্চায়ুক্ত হৰ্ষ বৰ্ধন স্ৰিংলাই কক্স বজাৰৰ ইছকন মন্দিৰত সেৱা আগবঢ়াই থকা অৱস্থাত তোলা। কক্স বজাৰস্থিত মন্দিৰটোত পূজা আগবঢ়াই ভক্তসকলৰ সৈতে মত বিনিময় কৰা বুলি শনিবাৰে সদৰী কৰিছে উচ্চায়ুক্তজনে।

মাত্ৰ কেইদিনমান পূৰ্বে শাৰদীয় দুৰ্গা পূজাত ঢাকাস্থিত বাংলাদেশৰ সৰ্ব বৃহৎ মন্দিৰ ঢাকেশ্বৰীত সেৱা আগবঢ়াইছিল উচ্চায়ুক্ত স্ৰিংলাই। মহা অষ্টমীৰ পূজাত ভক্তৰ মাজত প্ৰসাদো বিতৰণ কৰিছিল উচ্চায়ুক্তজনে।

আনহাতে এইবাৰ বিজয়া দশমীত উচ্চায়ুক্তজনক শুভেচ্ছা জনাই সাক্ষাৎ কৰিছিল ঢাকাৰ ৰামকৃষ্ণ মিছন আৰু মঠৰ মুৰব্বী স্বামী ধ্ৰুৱেচানন্দই।

High Commissioner @harshvshringla offered prayers at the #ISKCON temple at Cox’sbazar.

হাই কমিশনার শ্রী হর্ষ বর্ধন শ্রিংলা #কক্সবাজার #ইসকন মন্দিরে পূজা দেন। pic.twitter.com/JFD0Vd0L2h

— India in Bangladesh (@ihcdhaka) October 28, 2018

ভাৰতীয় উচ্চায়ুক্ত কাৰ্য্যালয়ে বিভাগীয়ভাৱে প্ৰকাশ কৰি আহিছে বাংলাদেশত মুক্তভাৱে হিন্দু উৎসৱ পালন কৰি অহাৰ এইসমূহ বাতৰি।

এইবাৰ দুৰ্গা পূজাত ইছলামী দেশখনৰ আটাইতকৈ বৃহৎ মন্দিৰ ঢাকেশ্বৰী দৰ্শন কৰি মন্দিৰটোক কাষৰীয়া ১.৫ বিঘা ভূমি দান কৰিছিল প্ৰধান মন্ত্ৰী শ্বেখ হাছিনাই। দান কৰা ভূমিখিনিৰ মূল্য বাংলাদেশী মুদ্ৰাৰ হিচাপত ৫০ কোটি টাকা। লগতে হিন্দু কল্যাণ ন্যাস (Hindu Kalian Trust) নামৰ ন্যাসটোৰ পুঁজি ২১ কোটি টকাৰ পৰা ১০০ কোটি টকালৈ বৃদ্ধি কৰিছে আৱামী লীগৰ নেত্ৰীগৰাকীয়ে।

“বাঙালী ঐক্য” শিৰোগত কৰি আগবঢ়া ইছলামী দেশখনত ২০১৭ বৰ্ষত ৩০ হাজাৰ দুৰ্গা পূজা হোৱাৰ বিপৰীতে এই বছৰ পূজা মণ্ডপৰ সংখ্যা বৃদ্ধি পাইছে ৩১,২৭২ খনলৈ। দুৰ্গা পূজা বাংলাদেশৰ জাতীয় উৎসৱ। এই পূজাত দেশজুৰি ৫ দিনীয়া চৰকাৰী বন্ধ থাকে।

তাৎপৰ্য্যপূৰ্ণভাৱে বাংলাদেশৰ সংখ্যালঘু হিন্দুৰ ‘‘বন্ধু” হাছিনাই হিন্দুসকলৰ মংগলৰ বাবে লোৱা কাৰ্য্যসূচীক পৰ্য্যাপ্ত নহয় বুলিহে সমালোচনা কৰি আহিছে বিৰোধী দল তথা অধিক ইছলামবাদীৰূপে পৰিচিত বি এন পি আৰু ইয়াৰ সহযোগী জামাত-এ-ইছলামিয়ে।

ইছলামী ৰাষ্ট্ৰখনৰ হাছিনা চৰকাৰৰ শ্ল’গান হৈছে “ধৰ্ম নিজৰ নিজৰ, উৎসৱ সকলোৰে”।

বাংলাদেশত ২০১১ চনত হিন্দু আছিল মুঠ জনসংখ্যাৰ ৮.৪ শতাংশ। ২০১৭ চনত সেই সংখ্যা বাঢ়ি ১০.৭ শতাংশ হোৱাৰ লগতে অকল ২০১৮ চনতে সংখ্যালঘু হিন্দুৰ সংখ্যাবৃদ্ধি হৈছে ২ শতাংশ। সংসদত দাখিল কৰা এই সমূহ তথ্য বৈদেশিক পৰিক্ৰমা মন্ত্ৰী সুষমা স্বৰাজৰ।

বিজেপিৰ প্ৰবীণ নেত্ৰীগৰাকীয়ে সদনত এই কথাও ঘোষণা কৰিছে যে বাংলাদেশত সংখ্যালঘুসকলৰ ওপৰত নিৰ্য্যাতনৰ অভিযোগ ”বাংলাদেশ চৰকাৰে গুৰুত্ব সহকাৰে লৈছে আৰু দোষীসকলৰ বিৰুদ্ধে কঠোৰ ব্যৱস্থাও তেওঁলোকে গ্ৰহণ কৰিছে।”

চুবুৰীয়া বাংলাদেশত সংখ্যালঘু হিন্দুসকলে মুক্তভাৱে কৰি থকা ধৰ্ম চৰ্চাই বিজেপি আৰু একাংশ দল-সংগঠনে প্ৰচাৰ চলোৱা “নিপীড়ণ”ৰ কাহিনীক আখ্যানত পৰিণত কৰা নাইনে?

বিজেপি উত্থাপিত নাগৰিকত্ব বিধেয়কে অসমৰ খিলঞ্জীয়া লোকৰ নিদ্ৰা হৰণ কৰাৰ সময়ত স্বাভাৱিকতেই প্ৰশ্ন উঠিছে— ক’ত নিৰ্য্যাতন হিন্দুক?