জাৰ্মেনি নিবাসী অসমীয়া বুৰঞ্জীবিদ ড০ নিৰোদ কুমাৰ বৰুৱাই অহা ১২ অক্তোবৰত গুৱাহাটীত “বৃটিছ ৰাজ তথা মুছলিম লীগৰ অসমক পাকিস্তানত অন্তৰ্ভুক্ত কৰাৰ ষড়যন্ত্ৰ আৰু ৰক্ষকৰ ভূমিকাত ভাৰত ৰত্ন গোপীনাথ বৰদলৈ” শীৰ্ষক এক বক্তৃতা প্ৰদান কৰিব।
দিচপুৰ প্ৰেছ ক্লাবে দিচপুৰস্থিত গড়কাপ্তানী বিভাগৰ প্ৰশিক্ষণ কেন্দ্ৰত দিনৰ ৩ বজাৰ পৰা আয়োজন কৰা এই বক্তৃতানুষ্ঠানত সকলোকে উপস্থিত থাকিবৰ বাবে আহ্বান জনাইছে ক্লাবৰ সম্পাদক কুঞ্জমোহন ৰায়ে।
অসমৰ প্ৰথমগৰাকী মুখ্য মন্ত্ৰী, স্বাধীনতা সংগ্ৰামী গোপীনাথ বৰদলৈ আৰু সমসাময়িক ৰাজনীতিত তেওঁৰ ভূমিকা সম্পৰ্কীয় ব্যাখ্যাৰ বাবে বিশেষভাৱে জনাজাত ড০ বৰুৱা। বৰুৱাৰ গ্ৰন্থ ‘এজন সত্যাগ্ৰহীৰ ৰাজনীতি: গোপীনাথ বৰদলৈ আৰু আসাম, তেতিয়া আৰু এতিয়া’ অসমত এক সুদীৰ্ঘ বৌদ্ধিক বিতৰ্কৰ আধাৰ আছিল।
“সন্ত্ৰাসবাদবিৰোধী”, ভাৰতৰ লগত অসমৰ “প্ৰান্তীয় একাত্মবোধ”ত বিশ্বাসী আধুনিক বুৰঞ্জীৰ গৱেষক ড০ বৰুৱা Chatto: The Life and Times of an Anti-Imperialist in Europe, India and the official Germany, 1886–1914 আদিৰো স্ৰষ্টা।
“বুৰঞ্জীৰ বিকৃতকৰণৰ অপচেষ্টা ৰোধ কৰা আৰু প্ৰকৃত সত্য উদঘাটন কৰাৰ উদ্দেশ্যে তথা অসমৰ সমসাময়িক সমাজ ইতিহাস সন্দৰ্ভত নৱ-প্ৰজন্মক সজাগ-সচেতন কৰি তোলাৰ উদ্দেশ্যে”, বক্তৃতানুষ্ঠানটো আয়োজন কৰা হৈছে বুলি মন্তব্য কৰিছে আয়োজক প্ৰেছ ক্লাবে।
