যি সময়ত বিজেপি নেতৃত্বাধীন চৰকাৰে ‘আয়ুষ্মান ভাৰত’, ‘অটল অমৃত যোজনা’ৰ দৰে আঁচনি ঘোষণাৰে ৰোগৰ বিনামূলীয়া চিকিৎসা সেৱা প্ৰদানৰ কথা কৈ আছে তেনে সময়তে খোদ ৰাজধানী গুৱাহাটীত ১৬টাকৈ এইচ আই ভি আক্ৰান্ত শিশুৱে কৰিবলগীয়া হৈছে হাহাকাৰ। কাৰণ আৰু মাত্ৰ কেইটামান দিনৰ পাছতেই ঠিকনাহীন হৈ পৰিব তেওঁলোক।
ছয়মাইলৰ সুৰুয নগৰত এটা ভাড়াঘৰত চলি থকা কস্তুৰী চিল্ড্ৰেন কেয়াৰ হ’ম নামৰ এইচ আই ভি আক্ৰান্ত শিশুৰ আশ্ৰয়, মানসিক পৰিচৰ্যা আৰু শিক্ষা প্ৰদান কেন্দ্ৰটোত থকা শিশু কেইটাৰ কথা কৈছো আমি। আচাম নেটৱৰ্ক অৱ পজিটিভ পিপল নামৰ সংস্থাৰ তত্বাৱধানত চলি থকা এই কেন্দ্ৰটোৱে এতিয়া এটা নতুন ভাড়াঘৰ বিচাৰি হাহাকাৰ কৰিবলগীয়া হৈছে। আমাৰ পূৰ্বৰ বাতৰিতো এই বিষয়ে সবিস্তাৰে প্ৰকাশ পাইছিল।
এইচ আই ভি আক্ৰান্ত শিশু ৰাখিবলৈ ভাড়াঘৰ নোপোৱাত শিশুকেইটাৰ আশ্ৰয়কলৈ এতিয়া প্ৰশ্ন উত্থাপিত হৈছে। সেই লৈ চিন্তিত সংস্থাটোৰ বিষয়ববীয়া। ডিচেম্বৰৰ পাছত শিশু কেইটা ক’ত থাকিব?
আৰু এইচ আই ভিৰ দৰে ৰোগত আক্ৰান্ত ১৬ টাকৈ দুৰ্ভগীয়া শিশুৰ প্ৰতি নিৰুদ্বেগ অসম ৰাজ্যিক এইডছ নিয়ন্ত্ৰণ সমিতি। নতুন ভাড়াঘৰ নোপোৱা কথাটো বহুবাৰ জনোৱাৰ পাছতো এইডছ নিয়ন্ত্ৰণ সমিতিয়ে এতিয়ালৈকে কোনো ব্যৱস্থা গ্ৰহণ নকৰাৰ অভিযোগ কৰিছে সংস্থাটোৰ সভানেত্ৰী জাহ্নৱী গোস্বামীয়ে।
“মই এইডছ নিয়ন্ত্ৰণ সমিতিৰ লগত যোগাযোগ কৰি কৰি ভাগৰি পৰিছো। বহু আবেদন কৰিলো কোনো সঁহাৰি পোৱা নাই। যিটো বিভাগৰ অধীনত কাম কৰি কৰি আছো, তেওঁলোকেই একো মুখেৰে নামাতে,” জাহ্নৱী গোস্বামীয়ে ক’লে।
বৰ্তমানৰ ভাড়াঘৰটো খালী কৰিবলৈ মালিকে এমাহৰ সময় দিছে সংস্থাটোক। কিন্তু অসমৰ বৰ্তমান অৱস্থা এই যে এইচ আই ভি আক্ৰান্তক ভাৰাঘৰ দিয়া মালিক এজনো এতিয়া নাই গুৱাহাটীত।
এই সন্দৰ্ভত ৰাজ্য চৰকাৰৰ স্বাস্থ্য আৰু পৰিয়াল কল্যাণ বিভাগৰ আয়ুক্ত সচিব অনুৰাগ গোৱেলৰ মত হৈছে, “এন জি অ’ই দায়িত্ব লৈছে, গতিকে ভাড়াঘৰ বিচৰি উলিওৱাটো তেওঁলোকৰ কাম। আমিয়ো ঘৰ বিচাৰি আছো যদিও দায়িত্ব তেওঁলোকৰ। এতিয়া যদি ঘৰ নাপায়, বৰ্তমান থকা ঘৰটোতে আৰু কিছুদিন থাকিবলৈ দিয়াৰ বাবে ঘৰটোৰ মালিকক অনুৰোধ জনাম।”
স্বাস্থ্য বিভাগে শিশুকেইটাৰ আশ্ৰয় আৰু পৰিচৰ্যাৰ দায়িত্ব সংস্থাটোক দিছে সঁচা, কিন্তু চৰকাৰৰ দায়িত্ব সিমানতেই শেষ নেকি? গুৰুতৰ ৰোগত আক্ৰান্ত শিশুকেইটাৰ বাবে চিন্তা কৰিবলৈ সংস্থাটোৰ গালৈকে দায় ঠেলি বিভাগটো আঁতৰি থকাটো কিমান গ্ৰহণযোগ্য?
২০১২ চনৰ আগষ্টত কেন্দ্ৰটোৰ শুভাৰম্ভ কৰি তদানীন্তন মুখ্য মন্ত্ৰী তৰুণ গগৈয়ে এক স্থায়ী ঘৰ দিয়াৰ কথা দিছিল, কিন্তু সেয়া পৰিণত হ’ল ফুটুকাৰ ফেনত, অভিযোগ জাহ্নৱী গোস্বামীৰ।
দুৰ্ভগীয়া শিশুকেইটাক এই পৰিস্থিতিৰ সন্মুখীন হ’বলৈ এৰি দিয়াটো এখন চৰকাৰৰ দায়িত্বনে?
